បុរសអាយុ ៩៤ ឆ្នាំម្នាក់ មកពីរដ្ឋ Karnataka (ឥណ្ឌា) បានអះអាងថា គាត់មិនដែលកាត់សក់ម្តងណាឡើយក្នុងមួយជីវិតនេះ ពោលគឺជិតមួយសតវត្សរ៍ហើយៗ ឥឡូវនេះ គាត់ត្រូវរុំសក់ទាំងនេះមានប្រវែងជាង ៧ ម៉ែត្រ នៅជុំវិញក្បាល ដើម្បីអាចដើរទៅណាមកណាបាន។ តែទោះយ៉ាងណា គាត់ពិតជាមានការឈឺចាប់ ដោយសារតែទម្ងន់សក់ទាំងនេះ។
Doddapalliah ដែលត្រូវបានមនុស្សជាច្រើនគេគោរពដូចអាទិទេព រស់នៅក្នុងទីប្រជុំជន Molakalmuru ស្រុក Chitradurga។ ដើម្បីអាចដើរបាន នោះសក់របស់គាត់ត្រូវតែចងស្វាយជារង្វេលដ៏ធំនៅលើក្បាលរបស់គាត់ ហើយក៏ត្រូវបានគ្របដោយក្រណាត់ផងដែរ ពីព្រោះវាមានប្រវែងដល់ទៅ ៧,៣ ម៉ែត្រ ឯណោះ។
មនុស្សនៅក្នុងភូមិ ដែលជាអ្នកមានជំនឿ គឺតែងតែមានបំណងប៉ះសក់របស់គាត់ ដើម្បីប្រាថ្នាបួងសួងសុំសេចក្តីចម្រើន ខណៈដែល Doddapalliah បានជឿថា គាត់ជាព្រះ ហេតុដូច្នេះហើយ បានជាគាត់មិនដែលកាត់សក់របស់គាត់នោះទេ ព្រោះខ្លាចប៉ះពាល់ដល់រូបព្រះ។
បើទោះជាសក់របស់គាត់វែង និងធ្ងន់ បង្កជាឧបសគ្គសម្រាប់វ័យរបស់គាត់នៅពេលនេះយ៉ាងណា ក៏គាត់ពុំកាត់វាចេញឡើយ ដោយគាត់គ្រាន់តែស្នើឲ្យប្រជាជនជួយរុំសក់ឲ្យគាត់ទៅបានហើយ។
ដោយសារតែសក់របស់គាត់ពុំដែលត្រូវទឹក ពោលគឺគាត់ពុំដែលកក់សក់ម្តងណាឡើយអស់រយៈពេលជាច្រើនឆ្នាំ ហេតុនេះ សក់ទាំងនោះក៏ចាប់ផ្តើមរមូរចូលគ្នា និងក្លាយទៅជាកណ្តាញ់បែបនេះតែម្តង។
គួរបញ្ជាក់ផងដែរ មុននេះ ក៏មានបុរសឥណ្ឌាម្នាក់ឈ្មោះ Sakal Dev Tuddu ត្រូវបានដឹងថា ក៏ពុំដែលបានកាត់សក់អស់រយៈពេល ៤ ទសវត្ស ផងដែរ៕ ដោយ៖ លឹម ហុង
