បាត់ដំបង៖ក្រសួងផែនការ បានផ្តល់ថេបប្លែតចំនួន១០២គ្រឿង ដល់ក្រុមប្រឹក្សាឃុំ-សង្កាត់ទូទាំងខេត្តបាត់ដំបង ដើម្បីដោះស្រាយនិងឆ្លើយតប ទៅនឹងការខ្វះខាតនូវមធ្យោបាយសម្ភារ សម្រាប់ការអនុវត្តនិងបំពេញនូវនីតិវិធី កត់ត្រានៃការកំណត់អត្តសញ្ញាណកម្មគ្រួសារក្រីក្រពិតប្រាកដ ក្នុងអំឡុងពេលកូវីដ-១៩នេះ។
ពិធីនេះប្រគល់ទទួលនេះ បានប្រព្រឹត្តធ្វើឡើងកាលពីថ្ងៃទី២២ ខែកក្កដា ឆ្នាំ២០២០ នៅសាលាខេត្តបាត់ដំបង ក្រោមអធិបតីភាព ឯកឧត្តម ងួន រតនៈ អភិបាលខេត្តបាត់ដំបង ព្រមទាំងឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរវិស័យផ្ទាល់ និងអាជ្ញាធរស្រុក-ក្រុងពាក់ព័ន្ធទូទាំងខេត្ត ក្នុងគោលបំណងសំខាន់ ពីការកំណត់អត្តសញ្ញាណកម្មគ្រួសារក្រីក្រពិតប្រាកដ តាមការស្នើសុំក្នុងអំឡុងពេលកូវីដ-១៩នេះ។
ឯកឧត្តម ងួន រតនៈ អភិបាលខេត្តបាត់ដំបង បានមានប្រសាសន៍ថា នេះគឺជានីតិវិធីថ្មី ដែលក្រសួងផែនការ បានចាប់ផ្តើមអនុវត្តលើកដំបូងនិង មានលក្ខណៈទំនើបទាន់សម័យនិងឆាប់រហ័ស ដើម្បីបំពេញបន្ថែមនូវនីតិវិធី នៃការកំណត់អត្តសញ្ញាណកម្មគ្រួសារក្រីក្រពិតប្រាកដនៅក្នុងជុំធម្មតា ដែលមានរយៈពេល ៣ឆ្នាំម្តងដោយផ្តោតសំខាន់ទៅលើគ្រួសារក្រីក្រ ដែលអវត្តមានទាំងគ្រួសារទៅឆ្ងាយ ដោយសារមូលហេតុផ្សេងៗ ទៀតនៅជុំធម្មតា។ គ្រួសារដែលបាត់បង់ថវិកាច្រើនភ្លាមៗ ដោយសារតែការចំណាយព្យាបាលជំងឺឬរងគ្រោះដោយសារគ្រោះធម្មជាតិផ្សេងៗ និងដោយសារមូលហេតុផ្សេងៗ ដែលនាំឲ្យគ្រួសារពួកគាត់ធ្លាក់ទៅជាគ្រួសារក្រីក្រនិងគ្រួសារដែលបាត់បង់ប្រាក់ចំណូលប្រចាំថ្ងៃ ក្នុងអំឡុងពេលកូវីដ១៩ ដែលនាំឲ្យជីវភាពគ្រួសារគាត់ក្រីក្រ។
ឯកឧត្តម ងួន រតនៈ អភិបាលខេត្តបាត់ដំបង បានមានប្រសាសន៍ក្រើនរំលឹកនិងណែនាំ ដោយជំរុញទៅកាន់មន្ត្រីមូលដ្ឋានឃុំ-សង្កាត់ទាំងអស់ថា ក្នុងឱកាសប្រគល់ និងទទួលនូវថេបប្លែតដល់ក្រុមប្រឹក្សាឃុំ-សង្កាត់បន្ថែម ០១គ្រឿងទៀត សម្រាប់យកទៅអនុវត្តការងារឲ្យបានកាន់តែឆាប់រហ័ស ដើម្បីជួយសម្រួលការងារឲ្យបានទាន់ពេលវេលា និងសំដៅជួយអន្តរាគមន៍ដល់គ្រួសារក្រីក្រពិតប្រាកដ ក្នុងដំណាក់កាលកូវីដ-១៩នេះ៕ ដោយ៖អ៊ុងសារុំ
