ខេត្តព្រះសីហនុ៖ រដ្ឋបាលខេត្តព្រះសីហនុ បានដឹកនាំមន្ត្រីរាជការពុទ្ធបរិស័ទឬប្រជាពលរដ្ឋ ក្នុងមូលដ្ឋាននេះ ប្រារព្ធពិធីបុណ្យមាឃបូជា ដោយមានធ្វើពិធីដង្ហែក្បួន បង្ហាញពីការរីកចម្រើន របស់វិស័យព្រះពុទ្ធសាសនា ដែលជាសាសនា របស់រដ្ឋ នៅតាមដងផ្លូវសាធារណៈ មុននឹងជួបទីជួបជុំគ្នាប្រារព្វធ្វើពិធីបុណ្យនេះ ជាផ្លូវការ នៅក្នុងបរិវេណឥន្ទញ្ញាណ ស្ថិតក្នងសង្កាត់លេខ៣ ក្រុងខេត្តព្រះសីហនុ។
ព្រះតេជគុណ ប៊ុន ណេង ព្រះចៅអធិការវត្តឥន្ទញ្ញាណ មានសង្ឃដីកា ឲ្យដឹងថា ការគោរពពិធីបុណ្យមាឃបូជាឆ្នាំនេះ ក៏ដូចជាឆ្នាំមុនៗដែរ គឺថ្នាក់ដឹកនាំខេត្តព្រះសីហនុ មន្ត្រីរាជការ ប្រជាពលរដ្ឋ នៅទូទាំងខេត្ត បានរួមគ្នារៀបចំ ឲ្យមានការដង្ហែក្បួន របស់ព្រះសង្ឃ និងពុទ្ធបរិស័ទព្រមទាំងធ្វើកិច្ចផ្សេងៗ ទៅតាមទំនៀមទម្លាប់ព្រះពុទ្ធសាសនា ដើម្បីផ្សព្វផ្សាយពិធីបុណ្យមាឃជាផង និងបង្ហាញអំពីការវិវត្តន៍រីកចំរើនខាងវិស័យព្រះពុទ្ធសាសនា ក៏ដូចជាការវិវត្តន៍រីកចម្រើន របស់ប្រទេសជាតិផងដែរ។
បុណ្យនេះត្រូវចំថ្ងៃ១៥កើតពេញបូណ៌ម៉ី ខែមាឃ ឆ្នាំរកានព្វស័កពុទ្ធសករាជ ២៥៦១ ត្រូវនឹងថ្ងៃទី៣១ ខែមករា ឆ្នាំ២០១៨ ដើម្បីរំឭកដល់ថ្ងៃព្រះសម្មាសម្ពុទ្ធ ព្រះបរមគ្រូ ចំពោះហេតុ ២យ៉ាង គឺទ្រង់ដាក់ព្រះជន្មាយុសង្ខារ និងទ្រង់ធ្វើចតុរង្គ មហាសន្និបាត នៃព្រះអរហន្តទាំង១២៥០អង្គ។
ពិធីបុណ្យមាឃបូជា គឺជាបុណ្យមួយក្នុងបណ្តាបុណ្យធំៗ ទាំងឡាយក្នុងព្រះពុទ្ធសាសនា ដែលប្រទេសកាន់ព្រះពុទ្ធសាសនា លើពិភពលោកតែងតែប្រារព្ធធ្វើពុំដែលខាន។ ចំពោះពុទ្ធសាសនិកជនខ្មែរយើង ក៏តែងតែប្រារព្ធបុណ្យមាឃបូជា នៅគ្រប់វត្តអារាមទូទាំងប្រទេសជារៀងរាល់ឆ្នាំជាបន្តបន្ទាប់មកនេះ។
ងាកមកខេត្តព្រះសីហនុឯណោះវិញ រដ្ឋបាលខេត្តនេះ ក៏បានចាត់ចែងរៀបចំពិធីបុណ្យមាឃបូជានេះ នៅក្នុងបរិវេណ វត្តឥន្ទញ្ញាណ ដោយមានថ្នាក់ដឹកនាំមន្ត្រីរាជការ លោកគ្រូ អ្នកគ្រូ សិស្សានុសិស្សរួម និងពុទ្ធបរិស័ទច្រើនកុះករចូលរួម ធ្វើឲ្យពិធីបុណ្យនេះ មានភាពសប្បាយរីករាយ ស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា ដែលចែងថា ព្រះពុទ្ធសាសនា ជាសាសនា របស់រដ្ឋ។
ពិធីបុណ្យមាឃបូជានេះ ឯកឧត្តម យន្ត មីន អភិបាលខេត្តព្រះសីហនុ ក៏បានចាត់តាំង និងណែនាំដល់ថ្នាក់ដឹកនាំនៅគ្រប់មន្ទីរអង្គភាពស្ថាប័នរដ្ឋក្នុងខេត្ត និងមន្ទីរធម្មការ និងសាសនាខេត្តចាត់តាំងពិធីបុណ្យមាឃបូជាជាផ្លូវការ នៅវត្តឥន្ទញ្ញាណ ដោយរៀបចំពីធីបុណ្យ ទំនៀមទម្លាប់ នៃព្រះពុទ្ធសាសនានេះ ឲ្យស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា បានចែងថា ព្រះពុទ្ធសានាជាសាសនារបស់រដ្ឋ៕ ដែន សីមា