នេះជាខណៈពេលដែលយើងគ្រប់គ្នាបានឃើញហើយ ពិតជាស្លុតរន្ធត់ និងស្រៀវសាច់ជំនួសជាខ្លាំង នៅពេលដែលស្ត្រីម្នាក់ជាម្តាយ និងកូនប្រុសម្នាក់របស់នាង បានឡើងចូលទៅក្នុងអាងពោរពេញដោយសត្វក្រពើ នៅក្នុង Minnesota (អាមេរិក) ដើម្បីរើសកាបូបរបស់នាងដែលបានធ្លាក់ចូល។
តាមរយៈវីដេអូដែលត្រូវបានថតដោយសាក្សីម្នាក់ឈ្មោះ Ashlynn Curtis បានបង្ហាញឲ្យឃើញស្ត្រីម្នាក់ និងកូនប្រុសរបស់នាង បានឡើងតាមរបងការពារដាច់ដោយឡែកពីគ្នា និងលោតចូលទៅក្នុងតំបន់អាងក្រពើ នៅឯសួនសត្វ Safari North Wildlife Park នៅក្នុង Minnesota បន្ទាប់ពីម្តាយរូបនោះបានធ្លាក់កាបូបដៃដោយចៃដន្យ ចូលទៅក្នុងតំបន់នោះដែលពោរពេញដោយក្រពើ។
ស្ត្រី និងកូនប្រុសរបស់នាង ពុំត្រូវបានគេស្គាល់អត្តសញ្ញាណនៅឡើយទេ ។ ទោះយ៉ាងណា វីដេអូនេះដែលបង្ហាញពីខណៈពេលដ៏គ្រោះថ្នាក់ ត្រូវបានមនុស្សជាច្រើនចូលទស្សនា និងបង្កឲ្យមានមតិយោបល់ចម្រុះតែម្តង។
ក្នុងវីដេអូ ស្ត្រីរូបនេះអាចត្រូវបានឃើញថា បានព្យាយាមយកដុំថ្មគប់ចូលទៅក្នុងទឹក ដើម្បីគំរាមដល់សត្វក្រពើទាំងនោះឲ្យចាកចេញពីមាត់អាង ហើយចុងក្រោយ នាងបានរើសយកកាបូបពណ៌ផ្កាឈូករបស់នាងដោយជោគជ័យ។
បន្ទាប់ពីចាប់យកកាបូបរួច ស្ត្រីនោះបានស្រែកហៅកូនប្រុសរបស់ខ្លួន ដែលកំពុងលាក់ខ្លួននៅខាងក្រោយគុម្ពោតព្រៃ រួចឡើងតាមរបងមកខាងលើវិញ។ នេះចាត់ទុកជាសំណាងហើយ ប្រសិនបើម្តាយ និងកូននេះ ហ៊ានតែប្រហែសបន្តិចនោះៗ អ្នកទាំងពីរអាចនឹងត្រូវវាយប្រហារពីសត្វក្រពើទាំងនោះគ្រោះថ្នាក់ធ្ងន់ធ្ងរហើយ៕ ដោយ៖ លឹម ហុង