ភ្នំពេញ៖ អភិបាលនៃគណៈអភិបាលរាជធានីភ្នំពេញ លោកឃួង ស្រេង បានព្រមានត្រង់ៗ ក្នុងការដកតំណែងរបស់ប្រធានផ្សារដើមគរ និងប្រធានបេនឡានផ្សារដើមគរ ខណៈដែលមានប្រជាពលរដ្ឋ និងអាជីវកររាយការណ៍ផ្ទាល់មាត់ប្រាប់លោកអភិបាលរាជធានីភ្នំពេញថា បេនឡានផ្សារដើមគរ បង្កភាពអានាធិបតេយ្យ មិនមានសណ្តាប់ធ្នាប់ និងបានបិទច្រកចេញ ចូលទៅក្នុងផ្សារ បង្កឱ្យមានការថ្នាំងថ្នាក់ ពីសំណាក់ពីបងប្អូនប្រជាពលរដ្ឋ និងអាជីវករយ៉ាងខ្លាំង។
ការព្រមានបែបនេះ របស់លោកឃួង ស្រេង បានធ្វើឡើងកាលពីព្រឹកថ្ងៃទី២៤ កក្កដា ២០២០ ក្នុងឱកាសដែលលោកបានអញ្ជើញ ជាអធិបតីភាពក្នុងពិធី បើកសម្ពោធដាក់ឲ្យប្រើប្រាស់ ជាផ្លូវការនូវស្ពានអាកាសថ្មើជើង ក្នុងសង្កាត់ផ្សារដើមគរ ជាប់ព្រំប្រទល់ សង្កាត់បឹងសាលា ខណ្ឌទួលគោក រាជធានីភ្នំពេញ។
លោកឃួង ស្រេង បានមានប្រសាសន៍ថា ប្រធានបេនឡានផ្សារដើមគរ ត្រូវសណ្ដាប់ធ្នាប់របៀបរៀបរយឲ្យបានល្អ ជៀសវាងការថ្នាំងថ្នាក់ ពីសំណាក់ប្រជាពលរដ្ឋនិងអាជីវករ ដូច្នេះទេប្រធានផ្សារ និងអ្នកគ្រប់គ្រងបេនឡានផ្សារដើមគរ ត្រូវរួមគ្នាដើម្បីរៀបចំសណ្ដាប់ធ្នាប់ នៅក្នុងពេលនេះ ឲ្យបានល្អសំខាន់ត្រូវឲ្យមានច្រកចេញចូលទៅក្នុងផ្សារឲ្យបានស្រួល ។ បើមិនដូច្នោះទេ អ្នកទាំងពីរប្រឈម និងការតួនាទីចេញពីការងារនេះហើយ។ លោកព្រមានថា “បើប្រធានផ្សារនិងប្រធានបេន មិនត្រូវគ្នា គឺដកទាំង២នាក់តែម្តង”។
គួរបញ្ជាក់ផងដែរថា មុននៃការចាប់ផ្ដើមពិធីសម្ពោធដាក់ឲ្យប្រើប្រាស់ នូវស្ពានអាកាសថ្មើរជើងខាងលើនេះ លោកឃួង ស្រេង បានចូលទៅសំណេះសំណាល ជាមួយបងប្អូនអាជីវករនៅក្នុងផ្សារដើមគរ ហើយត្រូវបានបងប្អូនប្រជាពលរដ្ឋ និងអាជីវករក្នុងផ្សារ ស្នើសុំនិងសំណូមពរឲ្យលោកអភិបាលរាជធានីភ្នំពេញ ជួយអន្តរាគមន៍ បើកផ្លូវចេញ ចូលផ្សារ ខណៈដែល បេនឡានបានយកឡានមកចតបាំងផ្លូវ មិនអាចឲ្យប្រជាពលរដ្ឋ ក៏ដូចជាអាជីវករ ចេញចូលបាន។ ផ្ដើមចេញពីបញ្ហានេះ ទើបលោកអភិបាលនៃគណៈអភិបាលរាជធានីភ្នំពេញ ធ្វើការព្រមានដកប្រធានផ្សារ និងប្រធានបេនផ្សារដើមគរ ដោយលោកបញ្ជាក់ថា បើធ្វើការងារមិនត្រូវគ្នាទេ បើដកគឺដកទាំងពីរនាក់តែម្តង៕
ដោយ៖កូឡាប
