ភ្នំពេញ៖ មន្ទីរសាធារណការ និងដឹកជញ្ជូនរាជធានីភ្នំពេញ សហការជាមួយរដ្ឋបាលខណ្ឌទួលគោកនៅថ្ងៃអង្គារ៍ ១៤កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៣០ខែមករាឆ្នាំ២០១៨នេះ បានចុះបិទអាជីវកម្មយានដ្ឋានគ្មានច្បាប់ចំនួន ៦កន្លែង នៅក្នុងមូលដ្ឋានខណ្ឌទួល ក្រោយពីធ្វើការផ្សព្វផ្សាយអោយពួកគាត់ទៅបំពេញបែបបទផ្លូវច្បាប់ នៅសាលាខណ្ឌទួលគោកជាច្រើនដងមកហើយនោះ។
លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បានអោយដឹងថា បន្ទាប់ពីបានចុះផ្សព្វផ្សាយអនុក្រឹត្យលេខ ១៨០ ស្តីពីការគ្រប់គ្រងយានដ្ឋានជួសជុល និងយានដ្ឋានកែច្នៃតម្លើងយានយន្តដល់គ្រប់ទីកន្លែងធ្វើអាជីវកម្មឃើញថា មានប្រជាពលរដ្ឋមួយចំនួនធំ បានមកបំពេញកាតព្វកិច្ចចុះបញ្ជីធ្វើអាជីវកម្មនិងគោរពតាមបទដ្ឋានបច្ចេកទេសរបស់ក្រសួងសាធារណការ និងដឹកជញ្ជូន។ក្នុងនោះក៏មានប្រជាពលរដ្ឋដែលបើកអាជីវកម្មមួយចំនួនមិនបំពេញកាតព្វកិច្ចចុះបញ្ជីធ្វើអាជីវកម្មនិងគោរពតាមបទដ្ឋានបច្ចេកទេសរបស់ក្រសួងសាធារណការ និងដឹកជញ្ជូនដែរ ទើបនៅថ្ងៃទី៣០ខែមករាឆ្នាំ២០១៨នេះ
មន្ទីរសាធារណការ និងដឹកជញ្ជូនរាជធានីភ្នំពេញ សហការជាមួយរដ្ឋបាលខណ្ឌទួលគោក ចុះបិទអាជីវកម្មយានដ្ឋានគ្មានច្បាប់ចំនួន៦កន្លែងនៅក្នុងមូលដ្ឋានខណ្ឌទួល ខណៈដែរពិនិត្យឃើញថា មិនមានច្បាប់ត្រូវ។
លោកសាំ ពិសិដ្ឋ ក៏បានអំពាវនាវ អោយម្ចាស់អាជីវកម្មយានដ្ឋានមកបំពេញកាតព្វកិច្ចចុះបញ្ជីស្របតាមច្បាប់អោយបានគ្រប់ៗគ្នា។
គួររំលឹកផងដែរថា អាជ្ញាធរខណ្ឌទួលគោកនិងមន្ទីរសាធារណការនិងដឹកជញ្ជូនរាជធានីភ្នំពេញកន្លងមកនេះធ្លាប់បានព្រមានរួចហើយ ថានឹងបិទយានដ្ឋានជួសជុលរថយន្តជាង១០០កន្លែងនៅក្នុងមូលដ្ឋានខណ្ឌទួលគោកបើនៅតែមិនព្រមធ្វើច្បាប់អោយបានត្រឹមត្រូវទៅតាមការណែនាំរបស់អាជ្ញាធរនិងមន្ទីរជំនាញ ខណៈដែលមានយានដ្ឋានជាង១០០កន្លែងផ្សេងទៀត គេបានរួសរាន់ធ្វើច្បាប់ត្រឹមត្រូវហើយនោះ។ ការព្រមានបែបនេះបានធ្វើឡើងកាលថ្ងៃទី១៥ វិច្ឆិកា ក្នុងកិច្ចជុំមួយជាមួយម្ចាស់អាជីវកម្ម យានដ្ឋានជួសជុលរថយន្ត ដែលមានមូលដ្ឋាននៅក្នុងខណ្ឌទួលគោក ដើម្បីអោយពួកគាត់បំពេញច្បាប់អោយបានត្រឹមត្រូវ។
លោកស្រីបុផ្ផា ផានី អនុប្រធានមន្ទីរសាធារណការនិងដឹកជញ្ជូនរាជធានីភ្នំពេញកាលណោះបានមានប្រសាសន៍លើកឡើងថា ការកោះហៅម្ចាស់យានដ្ឋានមកប្រជុំនេះគឺ ដើម្បីអោយពួកគាត់ទៅបំពេញច្បាប់បើកយានដ្ឋាន ហើយក្រោយបញ្ចប់ ស្នើផ្តល់ព័ត៌មាន មកលោកស្រីនឹងចុះធ្វើច្បាប់ជូន ។បើនៅតែមិនព្រមធ្វើច្បាប់ ខាងមន្ទីរនិងសហការជាមួយអាជ្ញាធរដែនដីនឹងចុះបិទនៅក្នុងខែធ្នូ ចុងឆ្នាំ២០១៧ខាងមុខនេះហើយ ដោយសារតែច្បាប់នេះបានកំណត់ បើហួសពីខែ១២ ទៅគឺមិនចេញច្បាប់អោយទេ ។ដូច្នេះនៅចន្លោះពេលនេះលោកស្រីស្នើអោយប្រជាពលរដ្ឋម្ចាស់យានដ្ឋានទាំងអស់ត្រូវមកធ្វើច្បាប់អោយបានគ្រប់គ្នា និងអោយបានទាន់ពេល។
លោកស្រីបានបញ្ជាក់ថា ហេតុអ្វីបានជាយើងជម្រុញអោយមានច្បាប់ ដោយសារតែយានដ្ឋានខ្លះកែច្នៃមិនមានស្តង់ដាបច្ខេកទេស ប្រឈមនឹងបើកបរទៅជួបគ្រោះថ្នាក់ ដូចជាតទ្រុង លើសទំងន់ តឡានជា២ ជា៣កំណាត់ជាដើម។ លោកស្រីបញ្ជាក់ថាមិនគោរពច្បាប់ គឺមានទោស មិនមែនចេះតែធ្វើស្រេចតែចិត្តទេ ហើយបើយោងតាមលិខិតពីក្រសួងសាធារណការនិងដឹកជញ្ជូន គឺសម្រេច ចុះបិទអាជីវកម្មយានដ្ឋានអត់ច្បាប់ទាំង១២ខណ្ឌនៅខែធ្នូ ចុងឆ្នាំ២០១៧នេះតែម្តង៕ ដោយ៖បញ្ញាស័ក្តិ
