ភ្នំពេញ៖ អគ្គនាយកដ្ឋានសាធារណការ បានណែនាំមួយចំនួនដល់មន្ទីរសាធារណការ និងដឹកជញ្ជូនរាជធានី-ខេត្ត ព្រមទាំងអ្នកពាក់ព័ន្ធទាំងអស់ អំពីការរៀបចំធ្វើបច្ចុប្បន្នភាពបញ្ជីសារពើភ័ណ្ឌ និងការគ្រប់គ្រងដែកស្ពានបេឡេតិ៍ ដើម្បីពង្រឹងដល់ការប្រើប្រាស់ ការគ្រប់គ្រង។
នាព្រឹកថ្ងៃសុក្រ ទី២៤ ខែកក្កដា ឆ្នាំ២០២០ នៅបន្ទប់ប្រជុំ (A1) នៃទីស្ដីការក្រសួង ឯកឧត្តម ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ បានដឹកនាំកិច្ចប្រជុំពិភាក្សាអំពីការធ្វើបច្ចុប្បន្នភាពបញ្ជីសារ ពើភ័ណ្ឌ និងការគ្រប់គ្រងដែកស្ពានបេឡេតិ៍ ដោយមានការចូលរួមពីលោក-លោកស្រី ដែលជាអគ្គនាយករង ប្រធាននាយកដ្ឋាន ប្រធានមន្ទីរសាធារណការ និងដឹកជញ្ជូនរាជធានី-ខេត្ត តំណាងដៃគូអភិវឌ្ឍ រួមទាំងមន្ដ្រីពាក់ព័ន្ធមួយចំនួន។
កិច្ចប្រជុំពិភាក្សានេះ រៀបចំឡើងក្នុងគោលបំណងជម្រាបជូននូវគោលការណ៍ណែនាំមួយចំនួនដល់មន្ទីរសាធារណការ និងដឹកជញ្ជូនរាជធានី-ខេត្ត ព្រមទាំងអ្នកពាក់ព័ន្ធទាំងអស់ អំពីការរៀបចំធ្វើបច្ចុប្បន្នភាពបញ្ជីសារ ពើភ័ណ្ឌ និងការគ្រប់គ្រងដែកស្ពានបេឡេតិ៍ ដើម្បីពង្រឹងដល់ការប្រើប្រាស់ ការគ្រប់គ្រង និងការចាត់ ចែងដែកស្ពានបេឡេតិ៍ទាំងអស់ដែលជាកម្មសិទ្ធិរបស់ក្រសួងសាធារណការ និងដឹកជញ្ជូន ឱ្យទទួលបានប្រសិទ្ធភាព និងប្រសិទ្ធផលខ្ពស់ក្នុងបំពេញការងាររបស់ខ្លួន។
ឯកឧត្តមអគ្គនាយក បានណែនាំដល់មន្ទីរសាធារណការ និងដឹកជញ្ជូនរាជធានី-ខេត្តនីមួយៗ ត្រូវរៀបចំរបាយការណ៍បច្ចុប្បន្នភាពអំពីស្ពានដែកបេឡេតិ៍ដែលស្ថិតនៅក្នុងដែនសមត្ថកិច្ចរបស់ខ្លួន ដោយបញ្ជាក់អំពីចំនួនស្ពាន ប្រវែងស្ពាន ប្រភេទស្ពាន និងគ្រឿងបង្គុំរបស់ស្ពានដែកបេឡេតិ៍ទាំងនោះផងដែរ។ ជាមួយគ្នានេះ មន្ទីរសាធារណការ និងដឹកជញ្ជូនរាជធានី-ខេត្តនីមួយៗ ត្រូវសហការជាមួយអង្គភាពត្រួតពិនិត្យបច្ចេកទេស ក្នុងករណីមានការរុះរើស្ពានដែកបេឡេតិ៍ និងត្រូវពង្រឹងសមត្ថភាពក្នុងទុកដាក់ ព្រមទាំងថែទាំដែកស្ពានបេឡេតិ៍ទាំងនោះឱ្យបានល្អប្រសើរ។
ជាការឆ្លើយតប ប្រធានមន្ទីរសាធារណការ និងដឹកជញ្ជូនរាជធានី-ខេត្ត និងតំណាងដៃគូអភិវឌ្ឍដែលបានចូលរួម បានធ្វើសេចក្ដីរាយការណ៍ដោយសង្ខេបអំពីការអនុវត្តរបស់ខ្លួននាពេលកន្លងមកពាក់ព័ន្ធនឹងកិច្ចការងារនេះ ហើយបានទទួលយកនូវគោលការណ៍ណែនាំខាងលើ និងបេជ្ញាអនុវត្តប្រកបដោយស្មារតីទទួលខុសត្រូវខ្ពស់៕ ដោយ៖កូឡាប
