ភ្នំពេញ៖ ក្រសួងសុខាភិបាលកម្ពុជា នៅថ្ងៃទី២៥ ខែកក្កដា ឆ្នាំ២០២០នេះ ចេញសេចក្តីប្រកាសព័ត៌មាន ពីការរកឃើញករណីវិជ្ជមានជំងឺកូវីដ១៩ ចំនួន២៣ករណីថែមទៀត និងមានអ្នកជំងឺ១នាក់បានជាសះស្បើយ។
ករណីវិជ្ជមានវីរុសកូវីដ១៩ ដែលបានរកឃើញនៅថ្ងៃទី២៤ខែកក្កដាឆ្នាំ២០២០ សរុបចំនួន២៣នាក់ (ស្រី២នាក់) ក្នុងនោះមានជនជាតិខ្មែរ១៩នាក់ (ស្រី១នាក់) និងជនជាតិឥណ្ឌូណេស៊ី៤នាក់ (ស្រី១នាក់) ដែលធ្វើដំណើរតាមជើងហោះហើរចំនួន៣ផ្សេងគ្នា គឺជើងហោះហើរ AK 538 មានករណីវីរុសកូវីដ១៩ មានចំនួន៤នាក់ (ស្រី១នាក់ ) ជាជនជាតិឥណ្ឌូណេស៊ី។ ជើងហោះហើរ KR 708 មានករណីវិជ្ជមានវីរុសកូវីដ១៩ មានជនជាតិខ្មែរចំនួន៤នាក់ (ស្រី១នាក់) ។ សម្រាប់ការធ្វើតេស្តលើកទី៣ នៃក្រុមបុរសជនជាតិខ្មែរ ជាអ្នកដំណើរមកពីប្រទេសរុស្ស៊ី និងអេហ្ស៊ីប តាមជើងហោះហើរម៉ាឡេស៊ី មកដល់កម្ពុជាកាលពីថ្ងៃទី១៩ ខែកក្កដាឆ្នាំ២០២០ មានករណីវិជ្ជមានវីរុសកូវីដ១៩ ចំនួន១៥នាក់។ ចំណែកករណីជាសះស្បើយមាន១នាក់ បុរសជនជាតិខ្មែរ អាយុ២៦ឆ្នាំ មានអាសយដ្ឋាននៅភូមិជុំទិច ឃុំជុំទិច ស្រុកក្រូចឆ្មារ ខេត្តត្បូងឃ្មុំ ជាអ្នកធ្វើដំណើរមកពីប្រទេសឥណ្ឌូណេស៊ី ។
លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល បានថ្លែងប្រាប់អ្នកសារព័ត៌មាន តាមបណ្តាញសង្គមតេឡេក្រាម នៅថ្ងៃទី២៥កក្កដានេះថា “លទ្ធភាពនៃការចម្លងវីរុសកូវីដ-១៩ ចូលសហគមន៍ យើងមិនអាចមើលរំលងបានឡើយ។ ដូច្នេះហើយ បានជាក្រសួងសុខាភិបាល តែងតែអំពាវនាវហើយអំពាវនាវទៀត ឲ្យបងប្អូនប្រជាពលរដ្ឋ ត្រូវតែបន្តកិច្ចការពារខ្លួនជាប់ជានិច្ច។ ថ្ងៃនេះ ថ្វីត្បិតតែការរកឃើញអ្នកវិជ្ជមានវីរុសកូវីដ-១៩ ចំនួន ២៣នាក់ ទៀត ជាករណីនាំចូលក៏ពិតមែន តែវាជាចំនួនច្រើនណាស់ ដែលយើងមិនអាចដឹងបានថា តើបន្តទៅមុខទៀតយ៉ាងណាដែរនោះទេ? ដូច្នេះ សូមអ្នកដើរកម្សាន្តទាំងអស់ ត្រូវតែចេះប្រុងប្រយ័ត្នមែនទែន ដោយសារហានិភ័យនៃការចម្លងវីរុសកូវីដ-១៩ ដែលអាចកើតមានគ្រប់ពេលវេលា គ្រប់កាលៈទេសៈ និងគ្រប់ទីកន្លែងទាំងអស់។ សុំកុំភ្លេចខ្លួន និងសុំកុំសន្តិភាពនិយមជាមួយវីរុសកូវីដ-១៩ នេះឲ្យសោះ។ សូមជូនពរបងប្អូនប្រជាពលរដ្ឋទាំងអស់មានសុខភាពល្អ ចៀសផុតការចម្លងវីរុសដ៏កាចសាហាវមកបុគ្គល មកក្រុមគ្រួសារ និងចៀសផុតពីការចម្លងចូលសហគមន៍ជាបន្តទៀត។ សូមរីករាយថ្ងៃចុងសប្តាហ៍ទាំងអស់គ្នា និងសូមអរគុណ”៕
ដោយ៖កូឡាប
