ភ្នំពេញ៖ ដូចដែលប្រិយមិត្តបានដឹងហើយ ស្ត្រីម្នាក់បានបង្កនូវក្តីរន្ធត់ និងរលកកំហឹងកក្រើកពេញបណ្តាញសង្គមហ្វេសប៊ុក ក្រោយពីប្រព្រឹត្តនូវទង្វើដ៏សាហាវព្រៃផ្សៃ យកកាំបិតឆូតមុខក្មេងស្រីអាយុ៥ឆ្នាំម្នាក់ ជាកូនអ្នកជិតខាង ព្រោះខឹងក្មេងស្រីរងគ្រោះគប់ដុំថ្មលើកូនប្រុសខ្លួនអាយុជាង២ឆ្នាំ បណ្តាលឲ្យបែកក្បាលដេរអស់១ថ្នេរ កាលពីថ្ងៃទី១៤ ខែកក្កដា ឆ្នាំ២០២០ កន្លងទៅនេះ នៅនៅក្នុងបុរីពិភពថ្មី ស្ថិតភូមិតិក្ខប្បញ្ញោ សង្កាត់សំរោងក្រោម ខណ្ឌពោធិសែនជ័យ។
ជាលទ្ធផលនៃអំពើដ៏ឃោរឃៅនេះ នៅថ្ងៃទី១៨ ខែកក្កដា ឆ្នាំ២០២០ លោក សុខ កែវ បណ្ឌិត ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានសម្រេចធ្វើការចោទប្រកាន់លើ ស្ដ្រីរូបនេះ ពីបទធ្វើទារុណកម្ម និងអំពើឃោរឃៅ តាមបញ្ញាតិមាត្រា ២១១ នៃ ក្រមព្រហ្មទណ្ឌ ដែលអាចប្រឈមជាប់គុកពី ១០ ឆ្នាំ ទៅ ២០ ឆ្នាំ។
ដោយឡែក ក្មេងស្រីរងគ្រោះខាងលើ ក្រោយទទួលបានការព្យាបាលយ៉ាងយកចិត្តទុកដាក់ពីក្រុមគ្រូពេទ្យ អស់រយៈជាច្រើនថ្ងៃមកនេះ ឃើញថាស្ថានភាពមុខរបួសរបស់នាងដែលត្រូវបានដេរអស់ជាង១០០ថ្នេរ ហាក់ល្អប្រសើរជាងមុនច្រើន ដោយនៅលើផ្ទៃមុខរបស់នាងតូចនៅមានស្លាកស្លាមថ្នេរខ្លះប៉ុណ្ណោះ។ នេះបើតាមការពិនិត្យមើលឃើញជាក់ស្តែង នូវរូបថត១សន្លឹក ដែលគណនីហ្វេសប៊ុកឈ្មោះ Ah Cheng បានចែករំលែក ដោយភ្ជាប់សារសរសេរយ៉ាងខ្លីថាៈ «អូនៗៗធូរតិចៗហើយអ៊ី ពូៗៗ» ។
យ៉ាងណាមិញ ក្រោយពីបានឃើញបែបនេះ អ្នកប្រើប្រាស់បណ្តាញសង្គមភាគច្រើន បានត្រេកអរយ៉ាងខ្លាំង និងជូនពរឲ្យក្មេងស្រីរងគ្រោះ បានឆាប់ជា និងបាត់ស្នាមឆាប់ៗផងដែរ៕ ដោយ៖ លឹម ហុង