ភ្នំពេញ ៖ បងស្រីម្នាក់ ដែលគាត់រស់នៅក្នុងបុរីអង្គរភ្នំពេញ កាលពីថ្ងៃទី២៥ ខែកក្កដា ឆ្នាំ២០២០ បានចែករំលែកនូវរឿងរ៉ាវដ៏គួរឲ្យភ្ញាក់ផ្អើលមួយ ទាក់ទងករណីអ្នករត់កង់បីឥណ្ឌា (PassApp) បានប្រើល្បិចថា មានគេឲ្យមកទទួលយកក្មេងទៅក្រៅ តែជាសំណាងល្អ កូនរបស់គាត់បដិសេធទៅជាមួយ ហើយនាងបានខលទូរស័ព្ទមកសួរនាំគាត់ជាមុន កុំអីត្រូវអ្នករត់កង់បីឥណ្ឌានោះយកទៅបាត់ហើយ។
បើយោងតាមគណនីហ្វេសប៊ុកឈ្មោះ Mango Love បានសរសេរប្រាប់ពីហេតុការណ៍ខាលើនេះឲ្យដឹងថា៖ «ព្រឹកមិញកង់បី pass app នេះមកផ្ទះខ្ញុំ ថាមកទទួលក្មេងទៅក្រៅ សំណាងហើយដែលកូនខ្ញុំចេះតេលេហ្វូនសួរ កុំអីទៅតាមគេបាត់ ស្អែកចង់ទៅស្រាវជ្រាវរកម្ចាស់កង់បីមកសួរនាំសិនថាបម្រុងនាំក្មេងទៅណា? សូមអាណាព្យាបាលទាំងអស់បន្ថែមការប្រុងប្រយ័ត្នចំពោះកូនតូចៗ»។
នេះជារឿងគួរដាស់តឿនមួយផងដែរ ទៅដល់អាណាព្យាបាលគ្រប់រូប គួរតែមានការប្រុងប្រយ័ត្នខ្ពស់ នៅពេលពេលចាកចេញទៅខាងក្រៅ ដោយទុកកូនៗនៅផ្ទះតែឯង ដោយណែនាំពួកគេ ត្រូវសួរនាំឪពុកម្តាយជាមុនសិន មុនពេលយល់ព្រមធ្វើរឿងអ្វីមួយ ជាមួយអ្នកខាងក្រៅដែលជាមនុស្សមិនស្គាល់ ជាក់ស្តែងដូចករណីខាងលើនេះជាដើម៕ ដោយ៖ លឹម ហុង
