នារីវ័យក្មេងម្នាក់ រួមនឹងមិត្តភក្តិប្រុសស្រីមួយក្រុម ត្រូវបានដឹងថាបានធ្វើដំណើរកម្សាន្តក្នុងថ្ងៃវិសម្សកាល ទៅកាន់តំបន់ទេសចរណ៍មួយកន្លែង នៅក្នុង Costa Rica (អាមេរិក) ។ តែទោះយ៉ាងណា ដំណើរកម្សាន្តរបស់នាង នៅវេលាមួយនោះ បានប្រែទៅជាតក់ស្លុតបំផុត គឺនៅពេលសត្វក្រពើ១ក្បាល បានប៉ុនប៉ងខាំត្របាក់ជើងរបស់នាង ខណៈនាងកំពុងរអិលខ្លួនតាមខ្សែរ៉តឆ្លងកាត់ទន្លេ។
តាមរយៈវីដេអូ បានបង្ហាញនារីរូបនោះ ដែលពុំត្រូវបានស្គាល់ឈ្មោះ បានជិះខ្សែរ៉តឆ្លងកាត់ទន្លេ ប៉ុន្តែ ខណៈពេលទៅដល់ជិតគោលដៅចុះចត ស្រាប់តែមានសត្វក្រពើ១ក្បាលហក់ពីក្នុងទឹក ប៉ុនប៉ងត្របាក់ជើងរបស់នាង ដែលធ្វើឲ្យនាងស្រែកភ័យរន្ធត់យ៉ាងខ្លាំងតែម្តង។
នេះចាត់ទុកជាសំណាងហើយ ដែលនាងបានព្យាយាមអង្កុញជើងជាប់រហូត ពុំនោះទេ នាងអាចនឹងជួបគ្រោះថ្នាក់ហើយ ព្រោះថា ចម្ងាយជើងរបស់នាង និងផ្ទៃទឹក ប្រសិនបើទម្លាក់ចុះ គឺល្មមនឹងមាត់ក្រពើតែម្តង នេះបើតាមការពិនិត្យឃើញជាក់ស្តែង៕ ដោយ៖ លឹម ហុង
