ភ្នំពេញ ៖ គិតមកដល់ថ្ងៃទី ២៧ ខែកក្កដា ឆ្នាំ២០២០ នេះ ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ បានដំណើរការរបស់ខ្លួនលើសេវាកម្មដឹកជញ្ជូនតាមផ្លូវអាកាស អស់រយៈពេល ១១ ឆ្នាំមកហើយ ។
លោក តឹករ៉េត សំរេច ប្រធានក្រុមប្រឹក្សាភិបាលនៃ ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែ បានឲ្យដឹងថានៅឆ្នាំ ២០០៩ ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ ជាក្រុមហ៊ុន ជាតិតែមួយគត់នៅកម្ពុជា ដែលប្រតិបត្តិការបម្រើអតិថិជនជាតិ និងអន្តរជាតិ ។
លោកថា អស់រយៈពេលជាច្រើនឆ្នាំកន្លងមកនេះ ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែបានរួមចំណែកដ៏សកម្មក្នុងការ ផ្តល់សេវាកម្មដឹកជញ្ជូនអ្នកដំណើរ និងទំនិញតាមផ្លូវអាកាសនៅកម្ពុជាឲ្យកាន់តែប្រសើរឡើង មិនតែប៉ុណ្ណោះអាកាសចរណ៍ជាតិមួយនេះ ក៏បានបណ្តុះបណ្តាលធនធានមនុស្សដូចជា អាកាសយានិក បាហុនិកា និងបុគ្គលិកគាំទ្រសេវាកម្មផ្សេងៗទៀតជាច្រើននាក់ ។
រហូតមកដល់ចុងឆ្នាំ ២០១៩ ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ បានបង្កើនចំនួនជើងហោះហើរក្នុងស្រុក និងហោះទៅកាន់ប្រទេសចិន (ប៉េកាំង ក្វាងចូវ សៀងហៃ ហាងចូវ និងហៃខូវ ) ប្រទេសវៀតណាម (ហូជីមិញ) បានត ភ្ជាប់ជើងហោះហើរថ្មីភ្នំពេញ-ដាណាំង (ប្រទេសវៀតណាម) ។
ឈានចូលដល់ឆ្នាំ ២០២០នេះស្ថានភាពការដឹកជញ្ជូនផ្លូវអាកាសត្រូវបាន កាត់បន្ថយយ៉ាងគំហុក ដោយសារការរាតត្បាតជាសកលនៃមេរោគផ្លូវដង្ហើម COVID -19 ។ ជាការពិតណាស់ក្រុមហ៊ុនអាកាសចរណ៍ជាតិ យើងខ្ញុំក៏ទទួលរងនូវការប៉ះពាល់ពីការរាតត្បាតនេះដែរ ដែលតម្រូវឲ្យយើងកាត់បន្ថយ និងលុបជើងហោះហើរមួយចំនួនធំ ។
លោកថា៖ «ទោះបីជាយ៉ាងណាក៏ដោយក៏ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ នៅតែបន្តកិច្ច
ប្រតិបត្តិការរបស់ខ្លួនប្រកបដោយមោទនភាព ដោយគោរព ប្រតិបត្តិយ៉ាងខ្ជាប់ខ្ជួនតាមស្តង់ដាអន្តរជាតិ ដូចជាសេចក្តីណែនាំរបស់អង្គការសុខភាពពិភពលោក និងគោលការណ៍របស់អាជ្ញាធរអាកាសចរណ៍ជាតិ-អន្តរជាតិនានា ជាពិសេសវិធានការរបស់រាជរដ្ឋាភិបាលកម្ពុជា។»
លោកសំរេចថា៖ «ក្នុងស្ថានភាពដ៏លំបាកនេះ ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ នៅតែខិតខំប្រឹងប្រែងយ៉ាងសស្រាក់ សស្រាំក្នុងការជួយដឹកជញ្ជូនប្រជាពលរដ្ឋខ្មែរមកកាន់ទឹកដីកំណើតវិញ ពីរដ្ឋធានីញ៉ូដេលី ប្រទេសឥណ្ឌា និងដឹកប្រជាជនហ្វីលីពីន ពីរាជធានីភ្នំពេញទៅកាន់ រដ្ឋធានីម៉ានីល ប្រទេសហ្វីលីពីន ប្រកបដោយសុវត្ថិភាពខ្ពស់ ។ គួរឲ្យកត់សម្គាល់ផងដែរថា ក្រុមហ៊ុនអាកាសចរណ៍យើងមានវិធានការការពារខ្ពស់ ហើយមិនមានបុគ្គលិកណាម្នាក់ឆ្លងមេរោគកូវីត ១៩ នេះទេ»។
ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ មានសុទិដ្ឋិនិយម និងបានរៀបចំខ្លួនរួចជាស្រេចដើម្បីបង្កើនជើងហោះហើរក្នុងស្រុក និងទៅកាន់គោលដៅទេសចរណ៍អន្តរជាតិនានា ជាពិសេសគោលដៅអាស៊ីអាគ្នេយ៍ តាមផែនការយុទ្ធសាស្ត្រ បន្ទាប់ពីមានភាពធូរស្រាល ពីជំងឺរាតត្បាតជាសកលនេះ៕
ដោយ៖CEN
