នេះជារឿងដ៏អយុត្តិធម៌ និងគួរអាណិតសង្វេកខ្លាំងបំផុត ចំពោះគ្រួសារមួយ ដែលតុលាការខេត្តកណ្តាល បានចេញដីការឲ្យរុះរើផ្ទះជាបន្ទាន់ មុនថ្ងៃទី៣១ ខែកក្កដា ឆ្នាំ២០២០ ខណៈដែលពួកគាត់រស់នៅលើដីនេះតាំងពីឆ្នាំ១៩៧៩ និងសូម្បីមានឯកសារបញ្ជាក់ទីកន្លែងរស់នៅពីភូមិ-ឃុំត្រឹមត្រូវទៀតផង។
បើតាមគណនីហ្វេសប៊ុកលោក Huy Ou Dom បានបង្ហោះវីដេអូ និងសរសេរប្រាប់ថា រឿងអយុត្តិធម៌ខាងលើនេះ បានកើតឡើងនៅភូមិអញ្ជែងក្រោម ឃុំពុកឬស្សី ស្រុកខ្សាច់កណ្តាល ខេត្តកណ្តាល។ ជុំវិញរឿងរ៉ាវនេះផងដែរ បើតាមស្ត្រីម្ចាស់ផ្ទះរងគ្រោះដែលមានឈ្មោះ ប៊ូ ស្រីទូច បានប្រាប់ឲ្យដឹងថា ដើមហេតុដែលនាំឲ្យតុលាការចេញដីការឲ្យរុះរើផ្ទះរបស់ពួកគាត់ គឺផ្តើមចេញពីបុគ្គលមានលុយប៉ុន្មាននាក់ ក្នុងនោះមានឈ្មោះពូ ប៊ុន ធឿន ដែលបានបុកលុយតុលាការឲ្យធ្វើរឿងនេះឡើង។
អាស្រ័យហេតុនេះ សូមលោក គង់ សោភ័ណ្ឌ អភិបាលខេត្តកណ្ដាល មេត្តាចុះមកពិនិត្យមើលរឿងអយុត្តិធម៌នេះផង ខណៈនៅសល់តែ ៤ ថ្ងៃ ទៀតប៉ុណ្ណោះ គឺដល់ពេលកំណត់ដែលតុលាការចេញដីការឲ្យរុះរើហើយ។
ជាមួយគ្នានេះផងដែរ ក្រុមគ្រួសាររងគ្រោះ ក៏បានលើកដៃសំពះអង្វរដល់សម្តេចតេជោ ហ៊ុន សែន មេត្តាជួយរកយុត្តិធម៌ដល់កូនចៅផង ខណៈដែលពួកគាត់បាននិងកំពុងរស់នៅលើដីនេះ តាំងពីឆ្នាំ១៩៧៩ មកម្ល៉េះ និងសូម្បីមានឯកសារកាន់កាប់ត្រឹមត្រូវផងដែរ៕ ដោយ៖ លឹម ហុង