ខេត្តមណ្ឌលគិរី ៖ ករណីបាញ់សម្លាប់មន្ត្រីអាវុធហត្ថលើផ្ទៃប្រទេស មន្ត្រីឧន្យានុរក្សនៃមន្ទីរបរិស្ថានខេត្តមណ្ឌលគិរី និងបុគ្គលិកអង្គការ WCSនោះ គឺខណៈពេលនាយនគរបាលប៉ុស្តិ៍អូរលែ លោក ផល ពេញ និងឈ្មោះ កើត វេហា ឈ្មោះ ងួរ ជាមន្ដ្រីយោធាការពារព្រំដែននៅតំបន់អូររលែ ដែលរងការចោទថាបានប្រព្រឹត្តិរឿងនេះ ដែលកើតឡើងកំពុងជម្លោះបង្ក្រាបបទល្មើសព្រៃឈើ កំពុងរត់គេចខ្លួនបាត់ ខណៈសមត្ថកិច្ចចម្រុះបានចុះទៅដល់កន្លែងកើត កំពុងស្រាវជ្រាវរកចាប់ខ្លួនមកសួរនាំ។
ចំណែកមនុស្សចំនួន៥នាក់ ត្រូវបានគេរាយការណ៍ថា ត្រូវបានកោះអញ្ជើញក្នុងនាមជាសាក្សីទៅសួរនាំនៅស្នងការដ្ឋាន នគរបាលខេត្តមណ្ឌលគិរី ដើម្បីផ្តល់ព័ត៌មានការបាញ់ប្រហារនេះ។
លោកឧត្តមសេនីយ៍ត្រី សូ សុវណ្ណ ស្នងការរងនគរបាលខេត្តមណ្ឌលគិរី ទទួលផែនព្រហ្មទណ្ឌបានថ្លែងថា “រហូតមកដល់ម៉ោងនេះ មិនទាន់រកឃើញនាយនគរបាលប៉ុស្តិ៍អូររលែនៅឡើយទេ និងមន្ត្រីយោធាទាំងនោះ តាំងពីក្រោយកើតហេតុមកម្ល៉េះ តែកម្លាំងសមត្ថកិច្ច កំពុងតាមរក”។
ឧត្តមសេនីយ៍ឯក ហុង វិណុល មេបញ្ជាការរងនៃកងរាជអាវុធហត្ថលើផ្ទៃប្រទេស និងសមាជិកគណៈកម្មាធិការទប់ស្កាត់ និងបង្ក្រាបបទល្មើសព្រៃឈើថ្នាក់ជាតិ បានប្រាប់ថា គណៈកម្មាធិការថ្នាក់ជាតិបានចុះទៅប្រមូលព័ត៌មាន និងចុះពិនិត្យផ្ទាល់នៅកន្លែងកើតហេតុតែម្តងពេញមួយថ្ងៃនេះ ហើយក៏បានសួរនាំមនុស្សចំនួន៥នាក់ដែលជាសាក្សី។ លទ្ធផលនៃការស៊ើបអង្កេតនេះ នៅមិនទាន់បង្ហាញនោះទេ ដោយរង់ចាំការស្រាវជ្រាវចប់សិន ហើយការងារនេះនឹងបន្តទៀត។
លោក ឌិន ប៊ុនធឿន នាយកដែនជម្រកសត្វព្រៃកែវសីម៉ា ៖ រឿងហេតុដំបូងដែលបានកើតឡើងនោះ គឺមានជនរងគ្រោះសរុប៤នាក់ ទាំងមន្ដ្រីអាវុធហត្ថ ទាំងមន្ដ្រីឧទ្យានុរក្សរបស់លោក ទាំងបុគ្គលិកអង្គការ WCS និងអ្នកភូមិម្នាក់ទៀត ជិះម៉ូតូ២គ្រឿងចូលទៅល្បាតព្រៃឈើ។ ពេលនោះពួកគេបានពើបជាមួយជនជាតិវៀតណាមមួយក្រុម ប្រដាប់ដោយរណាយន្ដ កាំបិត និងពូថៅ កំពុងប្រព្រឹត្តបទល្មើសព្រៃឈើ។ ពេលឃើញបទល្មើសបែបនេះ ពួកគេទាំង៤នាក់ ក៏បានរាយការណ៍មកលោក ដែលជានាយកដែនជម្រកសត្វព្រៃកែវសីម៉ា តែលោកបានប្រាប់ទៅវិញថា គ្នាតិចដូច្នេះឲ្យត្រឡប់មកវិញសិន ដើម្បីយកកម្លាំងទៅថែមឈានទៅដល់ការបង្ក្រាប។ នៅពេលដែលជនរងគ្រោះទាំង៤នាក់ បើកម៉ូតូចេញមកវិញ មិនទាន់ដល់ភូមិផង ក៏រងការបាញ់ប្រហារជាច្រើនគ្រាប់ បណ្ដាលឲ្យស្លាប់៣នាក់ ហើយម្នាក់ទៀតបានរត់គេចខ្លួនចូលទៅក្នុងភូមិ។
ដោយឡែកមន្ដ្រីសមត្ថកិច្ចជាន់ខ្ពស់ម្នាក់ នៅខេត្តមណ្ឌលគិរី ឲ្យដឹងថា មុនពេលកើតហេតុ មន្ដ្រីអាវុធហត្ថ មន្ដ្រីបរិស្ថាន និងបុគ្គលិកអង្គការ WCS បានចូលទៅល្បាតព្រៃ ហើយក៏ឃើញបទល្មើសព្រៃឈើ ពេលនោះនាយនគរបាលប៉ុស្ដិ៍អូររលែ ចំណុះឲ្យវរៈនគរបាលការពារព្រំដែនគោក នៃស្នងការដ្ឋាននគរបាលខេត្តមណ្ឌលគិរី លេខ៦២១ បានចេញមកជួបក្រុមមន្ដ្រីទាំងនេះ អាចសង្ស័យថា មកចរចា និងនិយាយគ្នាពាក់ព័ន្ធការប្រព្រឹត្តិបទល្មើសនៅទីនោះ។
ដោយសារតែការចរចារ និងនិយាយគ្នាមិនត្រូវ រហូតមានការឈ្លោះប្រកែកគ្នា ហើយក៏មានការផ្ទុះអាវុធបណ្ដាលឲ្យស្លាប់យ៉ាងដូច្នេះ។ អ្នកបាញ់ប្រហារឈ្មោះ ផល ពេញ ជានាយនគរបាលប៉ុស្ដិ៍អូររលែ។
បើតាមរបាយការណ៍ របស់ស្នងការដ្ឋាននគរបាលខេត្តមណ្ឌលគិរី ដាក់ជូនទៅនាយឧត្តមសេនីយ៍សន្ដិបណ្ឌិត នេត សារឿន អគ្គស្នងការនគរបាលជាតិ ៖ ករណីផ្ទុះអាវុធនេះបង្កឡើងដោយលោក ផល ពេញ និងឈ្មោះ កើត វេហា ឈ្មោះ ងួរ ជាមន្ដ្រីយោធាការពារព្រំដែននៅតំបន់នោះ។
បើតាមរបាយការណ៍របស់លោក សូ សុវណ្ណ បានបញ្ជាក់ថា ជនរងគ្រោះ សេក វឌ្ឍនា មានស្នាមរបួសដោយគ្រាប់កាំភ្លើង បាញ់ត្រូវ៣គ្រាប់ ជនរងគ្រោះ តើន សុខណៃ ត្រូវគ្រាប់កាំភ្លើងចំនួន៣គ្រាប់ ស្លាប់នៅនិងកន្លែង ដោយឡែកជនរងគ្រោះ ថុល ខ្នា ត្រូវមួយគ្រាប់ចំពោះ ធ្លាយពោះវៀនស្លាប់ពេលបញ្ជូនមកដល់មន្ទីរពេទ្យ។ ជាមួយគ្នានេះ ក្រោយកើតហេតុសមត្ថកិច្ចជំនាញក៏បានរើសសំបកគ្រាប់ AK47 ចំនួន២សំបកផងដែរ។
ជាមួយនឹងហេតុការណ៍នេះផងដែរ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោកសាយ សំអាល់ រដ្ឋមន្ត្រីក្រសួងបរិស្ថាន ប្រកាសថ្កោលទោសយ៉ាងដាច់អហង្ការ ចំពោះជនដែលបាញ់សម្លាប់មន្ត្រីអាវុធហត្ថ មន្ត្រីបរិស្ថាន និងបុគ្គលិកអង្គការ WCS និងបញ្ជាឲ្យសមត្ថកិច្ច តាមចាប់ជនដៃដល់ឲ្យខាងតែបាន។
ជាមួយគ្នានេះទាំងសម្តេចក្រឡាហោម ស ខេង និងសម្តេចពិជ័យសេនា ទៀ បាញ់ ក៏បានបញ្ជា និងស្នើទៅកម្លាំងសមត្ថកិច្ចពាក់ព័ន្ធ ធ្វើការស៊ើបអង្កេតតាមចាប់ជនល្មើស យកមកផ្តន្ទាទោសតាមច្បាប់ជាធរមាន។
ចំណាត់ការខ្លាំងៗ និងមិនលើកលែងឲ្យក្រុមជនល្មើសខាងលើនេះ ពីប្រមុខដឹកនាំក្រសួងកងកម្លាំងប្រដាប់អាវុធទាំង២ បានធ្វើឡើងនៅក្នុងលិខិតចូលរួមរំលែកទុក្ខជាមួយក្រុមគ្រួសារសព ទាំង៣នាក់ ដែលបានផ្ញើជូនពួកគេនៅថ្ងៃទី៣១ ខែមករា ឆ្នាំ២០១៨នេះ។
នៅក្នុងលិខិតចូលរួមរំលែកទុក្ខទាំង៣ច្បាប់ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងលោកសាយ សំអាល់ រដ្ឋមន្ត្រីក្រសួងបរិស្ថាន បានបញ្ជាក់យ៉ាងដូច្នេះថា “ខ្ញុំថ្កោលទោសយ៉ាងដាច់អហង្ការ ចំពោះអំពើឧក្រិដ្ឋដែលច្បាប់បានហាមឃាត់ និងបានចាត់វិធានការយ៉ាងម៉ឺងម៉ាត់ ឲ្យសមត្ថកិច្ចពាក់ព័ន្ធធ្វើការស៊ើបអង្កេត តាមចាប់ជនល្មើសយកមកផ្តន្ទាទោសតាមច្បាប់ជាធរមាន”។
សូមបញ្ជាក់ថា កាលពីរសៀលថ្ងៃទី៣០ ខែមករា ឆ្នាំ២០១៨ មានករណីផ្ទុះអាវុធមួយបានកើតឡើង នៅចំណុចចម្ងាយប្រមាណជា២៥គីឡូម៉ែត្រ ពីប៉ុស្តិ៍នគរបាលការពារព្រំដែនគោកអូររលែ ស្ថិតក្នុងភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី រវាងកម្លាំងអាវុធហត្ថ និងមន្ត្រីបរិស្ថាន ជាមួយកម្លាំងនគរបាលការពារព្រំដែន ដែលបណ្តាលឲ្យមានអ្នកស្លាប់៣នាក់ រួមមាន៖ ទី១ ឈ្មោះ សេក វឌ្ឍនា ជាមន្ត្រីអាវុធហត្ថលើផ្ទៃប្រទេស ទី២ ឈ្មោះ កើត សុខណៃ ជាមន្ត្រីឧទ្យានុរក្ស នៃមន្ទីរបរិស្ថាន និងទី៣ ឈ្មោះ ថុល ខ្នា ជាបុគ្គលិករបស់អង្គការសមាគមនអភរិរក្សសត្វព្រៃ Wildlife Conservation Society (WCS) បានស្លាប់ពេលបញ្ជូនទៅដល់មន្ទីរពេទ្យ។
ជាមួយគ្នានេះ ជនល្មើសដែលសង្ស័យជាអ្នកបាញ់ប្រហារទៅលើជនរងគ្រោះទាំង៣នាក់ គឺនាយនគរបាលប៉ុស្តិ៍អូរលែ លោក ផល ពេញ បូករួមទាំងឈ្មោះ កើត វេហា និងឈ្មោះ ងួរ ជាមន្ដ្រីយោធាការពារព្រំដែននៅតំបន់អូររលែ ប៉ុន្តែរហូតមកដល់ពេលនេះ បាននិងកំពុងរត់គេចខ្លួន ហើយកម្លាំងសមត្ថកិច្ចកំពុងតាមចាប់ផងដែរ៕ ដោយ៖បញ្ញាស័ក្តិ
