បាត់ដំបង៖ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានមានប្រសាសន៍ក្រើនរំលឹកដល់មន្ត្រីជាន់ខ្ពស់សាលាឧទ្ធរណ៍តំបន់និងតុលាការសាលាដំបូងនិងមន្ត្រីក្រោមឱវាទ ត្រូវតែបន្តអនុវត្តនូវអភិក្រមទាំង៥ របស់សម្ដេចតេជោនាយករដ្ឋមន្ត្រី ដើម្បីឲ្យការងារយុត្តិធម៌នៅកម្ពុជាមានភាពល្អប្រសើរ រួមទាំងខិតខំដោះស្រាយនូវសំណុំរឿងដែលនៅសល់ឲ្យអស់ជាទំនុកចិត្តដល់ពលរដ្ឋក្នុងការងារស្វែងរកយុត្តិធម៌។ ការលើកឡើងនេះ ក្នុងពិធីប្រកាសតែងតាំងប្រធាននិងអគ្គព្រះរាជអាជ្ញាសាលាឧទ្ធរណ៍តំបន់បាត់ដំបងនិងព្រះរាជអាជ្ញាអមសាលាដំបូងខេត្តបាត់ដំបងកាលពីរសៀលថ្ងៃទី២៧ខែកក្កដាឆ្នាំ២០២០។
ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានមានប្រសាសន៍ថានាពេលបច្ចុប្បន្នពាក់ព័ន្ធនឹងផ្នែកច្បាប់កម្ពុជា កំពុងជួបបញ្ហាប្រឈមចំនួន២ ដែលធ្វើឲ្យការអនុវត្តច្បាប់នៅមានកម្រិត ដោយបញ្ហាទាំង២ចំណុចគឺទី១ទាក់ទងនឹងមន្ត្រីអនុវត្តច្បាប់និងទី២ទាក់ទងនឹងពលរដ្ឋ ដោយពាក់ព័ន្ធនឹងមន្ត្រីនៅត្រង់ចំណុចថាច្បាប់ចេញថ្មីៗមន្ត្រីអនុវត្តច្បាប់ ដែលរួមមានមន្ត្រីតុលាការនិងសមត្ថកិច្ចអនុវត្តច្បាប់នៅមិនទាន់ដឹងច្បាស់ពីច្បាប់ថ្មីឬហៅម្យ៉ាងទៀតថាដើរមិនទាន់ច្បាប់ ចំណែកការពាក់ព័ន្ធនឹងប្រជាពលរដ្ឋវិញគឺពួកគាត់មិនទាន់ដឹងពីវិធានការច្បាប់ថ្មីឬក៏ដឹងដែរ តែពួកគាត់មួយចំនួនមិនអនុវត្តតាមជាក់ស្ដែងឧទាហរណ៍ច្បាប់ចរាចរណ៍ផ្លូវគោកថ្មី។ដោយបញ្ហាទាំងអស់នេះហើយគឺក្រសួងតែងធ្វើការរបណ្ដុះបណ្ដាលជាប្រចាំ អំពីការយល់ដឹងពីច្បាប់ទូទៅដល់មន្ត្រីតុលាការឬមន្ត្រីសមត្ថកិច្ចអនុវត្តច្បាប់។ចំពោះការយល់ដឹងពីច្បាប់របស់ពលរដ្ឋគឺទាមទារឲ្យមានការផ្សព្វផ្សាយ បានឲ្យទូលំទូលាយពីសមត្ថកិច្ចពាក់ព័ន្ធ ដែលក្នុងនោះក៏មានអ្នកសារព័ត៌មាននានា ត្រូវចូលរួមផ្សព្វផ្សាយឲ្យបានផុលផុសផងដែរ។
ឯកឧត្តម កើត រិទ្ធ បានក្រើនរំលឹកដល់មន្ត្រីជាន់ខ្ពស់សាលាឧទ្ធរណ៍តំបន់និងតុលាការដំបូងខេត្តបាត់ដំបង ក៏ដូចជាមន្ត្រីក្រោមឱវាទ ត្រូវតែបន្តអនុវត្តនូវអភិក្រមទាំង៥ របស់សម្ដេចតេជោនាយករដ្ឋមន្ត្រី ដើម្បីឲ្យការងារយុត្តិធម៌នៅកម្ពុជាមានភាពល្អប្រសើរ រួមទាំងខិតខំដោះស្រាយនូវសំណុំរឿងដែលនៅសល់ឲ្យអស់ ជាទំនុកចិត្តដល់ពលរដ្ឋក្នុងការងារស្វែងរកយុត្តិធម៌។
ឯកឧត្តម នួន សានអគ្គព្រះរាជអាជ្ញារសាលាឧទ្ធរណ៍តំបន់បាត់ដំបងទើបឡើងកាន់តំណែងថ្មី បានប្ដេជ្ញាចិត្តអនុវត្តតាមប្រសាសន៍របស់ឯកឧត្តមរដ្ឋមន្ត្រីក្រសួងយុត្តិធម៍ឲ្យបានខ្ជាប់ខ្ជួន ក្នុងបេសកកម្មការងារថ្មី ក្នុងវិស័យយុត្តិធម៌នេះ។
គួរបញ្ជាក់ផងដែរថាសាលាឧទ្ធរណ៍តំបន់និងអគ្គមហាអយ្យការអមសាលាឧទ្ធរណ៍បាត់ដំបង មានទីតាំងនៅផ្លូវក្រវ៉ាត់ក្រុង ស្ថិតនៅក្នុងសង្កាត់ព្រែកព្រះស្ដេច ក្រុងបាត់ដំបង ដោយសាលាឧទ្ធរណ៍នេះប្រចាំឲ្យទិសចំនួន៧ខេត្ត មានខេត្តបាត់ដំបង បន្ទាយមានជ័យ ឧត្តរមានជ័យ សៀមរាប ប៉ៃលិន ពោធិ៍សាត់ និងខេត្តកំពង់ឆ្នាំង៕ ដោយៈអ៊ុងសារុំ
