ភ្នំពេញ៖ តន្ត្រីពុំត្រឹមបំពេរអារម្មណ៍យើងឲ្យជក់ចិត្តអន្លង់អន្លោចប៉ុណ្ណោះទេតែថែមទាំងអាចជួយបំបាត់នូវទុក្ខកង្វក់ទាំងឡាយទាំងពួង និងក៏ដូចជារំសាយនូវការអប្សុកផងដែរ។ តន្ត្រីក៏ជាការងប់ងល់មួយ សម្រាប់អ្នកដែលស្រឡាញ់ចូលចិត្តខ្លាំងបំផុត ដែលរហូតអ្នកខ្លះសូម្បីយកទៅតាមខ្លួន។
ងាកក្រឡេកមើលពីជីវិតព្រឹទ្ធាចារ្យម្នាក់នេះវិញ ដែលលោកតាមានឈ្មោះ ប៉េ ប៉ុន បើទោះឆ្នាំនេះមានព្រះជន្ម ៩២ ឆ្នាំ ទៅហើយក្តី តែគាត់ហាក់នៅតែមានសុខភាពមាំមួន និងសូម្បីរាងកាយស្រស់បស់ទៀតផង ដែលធ្វើឲ្យគ្រប់គ្នានៅក្នុងបណ្តាញសង្គម នាំគ្នាកោតសរសើរជាខ្លាំង។ ដែលនេះសបញ្ជាក់ឲ្យឃើញថា អាចដោយសារតែតន្ត្រីធ្វើឲ្យជីវិតរបស់គាត់ស្រស់ស្រាយរហូតហើយមើលទៅ ព្រោះថា នៅពេលដែលគាត់អប្សុកម្តងៗ គឺគាត់តែយកវាមកលេងមួយបទពីរបទទុកជាការកម្សាន្ត។
ទាក់ទងនឹងតន្ត្រីផ្នែកបុរាណនេះផងដែរ លោកតាព្រឹទ្ធាចារ្យ ក៏បានមានប្រសាសន៍យ៉ាងដូច្នេះថា៖ «ជីវិតរបស់គាត់គឺផ្សារភ្ជាប់នឹងតន្ត្រី រាល់ថ្ងៃ អារម្មណ៍គាត់នៅតែជាមួយរនាត ហើយជីវិតចុងក្រោយនេះ ស្លាប់ទៅនៅជាមួយរនាតហើយ»៕ ដោយ៖ លឹម ហុង
