មេដឹកនាំកូរ៉េខាងជើងលោក គីម ជុងអ៊ុន បានបើកកិច្ចប្រជុំនយោបាយបន្ទាន់មួយ ជាមួយមន្ត្រីជាន់ខ្ពស់ ដើម្បីសម្រេចចិត្តអនុវត្តបិទការចេញចូលនៅទីក្រុងជាប់ព្រំដែន Kaesong ។
មេដឹកនាំរូបនេះក៏បានបើកការស៊ើបអង្កេតមួយ ដើម្បីបង្ហាញពីរបៀបដែលអ្នកជំងឺអាចជ្រៀតចូលព្រំដែនដែលមានការការពារយ៉ាងតឹងរ៉ឹង ដោយព្រមានដល់អ្នកដែលទទួលខុសត្រូវថា «នឹងមានការដាក់ទណ្ឌកម្មយ៉ាងធ្ងន់ធ្ងរ»។ គិតមកដល់ពេលនេះ ជនរងគ្រោះកំពុងត្រូវបានឃុំខ្លួន ខណៈដែលអាជ្ញាធរកំពុងតាមដានអ្នកដែលមានទំនាក់ទំនងជាមួយអ្នកជំងឺ។
អ្នកជំងឺដំបូងគេរបស់ប្រទេសនេះ ត្រូវបានគេជឿជាក់ថា បានភៀសខ្លួនចេញពីប្រទេសកូរ៉េខាងជើង ទៅកាន់កូរ៉េខាងត្បូង កាលពីបីឆ្នាំមុន ប៉ុន្តែបានវិលត្រឡប់មកវិញដោយខុសច្បាប់នៅដើមខែនេះ ។ នេះបើតាមរបាយការណ៍ពី Astro Awani ។
ប្រព័ន្ធផ្សព្វផ្សាយ KCNA របស់កូរ៉េខាងជើងបានរាយការណ៍ថា «ព្រឹត្តិការណ៍បន្ទាន់នេះ បានកើតឡើងនៅក្នុងទីក្រុង Kaesong ជាកន្លែងអ្នកផ្តាច់ខ្លួនពីកូរ៉េខាងជើង ទៅកាន់កូរ៉េខាងត្បូង កាលពី៣ឆ្នាំមុន ត្រូវបានសង្ស័យថាបានឆ្លងវីរុសដ៏កាចសាហាវនេះ ប៉ុន្តែបានត្រឡប់មកកាន់ប្រទេសកូរ៉េខាងជើងវិញកាលពីថ្ងៃទី១៩ ខែកក្កដា កន្លងទៅនេះ បន្ទាប់ពីបានឆ្លងព្រំដែនដោយខុសច្បាប់»។
គួរបញ្ជាក់ផងដែរថា ខណៈពេលដែលមានការចោទប្រកាន់ពីលើកមុន អំពីករណី Covid-19 នៅក្នុងប្រទេសកូរ៉េខាងជើង លោក គឹម ជុងអ៊ុន ក៏បាន «ចាត់វិធានការធ្ងន់ធ្ងរ» ដើម្បីទប់ស្កាត់ការរីករាលដាលនៃវីរុសនេះក្នុងប្រទេសនិងបានអះអាងថា ពុំមានអ្នកជំងឺណាមួយដែលត្រូវបានធ្វើតេស្តវិជ្ជមានសម្រាប់ Coivid-19 ឡើយ៕
ដោយ៖ លឹម ហុង (ប្រភព៖ worldofbuzz)
