ប្រទេសញូវហ្សឺឡែនបានធ្វើការផ្អាកកិច្ចព្រមព្រៀងបត្យាប័នជាមួយនឹងហុងកុង និងបានធ្វើការកែប្រែមួយចំនួន ក្រោយពេលប្រទេសចិនបានដាក់ច្បាប់សន្តិសុខជាតិសម្រាប់ទីក្រុងហុងកុង។ នេះបើតាមការបញ្ជាក់របស់រដ្ឋមន្ត្រីក្រសួងការបរទេសលោក Winston Peters និយាយនៅថ្ងៃអង្គារនេះ។
លោកថ្លែងក្នុងសេចក្តីប្រកាសថា “ញូវហ្សឺឡែនមិនអាចទុកចិត្តថា ប្រព័ន្ធយុត្តិធម៌របស់ហុងកុងមានឯករាជ្យគ្រប់គ្រាន់ពីប្រទេសចិនឡើយ”។
“ការអនុម័តច្បាប់សន្តិសុខថ្មីរបស់ចិន បានលុបបំបាត់គោលការណ៍ច្បាប់ បំផ្លាញចោលនូវក្របខ័ណ្ឌប្រទេសមួយ ប្រព័ន្ធពីរ ដែលគាំទ្រដល់ឋានៈពិសេសរបស់ហុងកុង និងប្រឆាំងការប្តេជ្ញាចិត្តរបស់ចិនចំពោះសហគមន៍អន្តរជាតិ”។
“ប្រសិននៅថ្ងៃអនាគត ចិនប្រកាន់ភ្ជាប់នឹងក្របខ័ណ្ឌប្រព័ន្ធប្រទេសមួយ ប្រព័ន្ធពីរ ពួកយើងនឹងធ្វើការពិចារណាឡើងវិញពីការសម្រេចចិត្តនោះ”។
ទីក្រុងប៉េកាំងបានធ្វើការអនុម័តច្បាប់សន្តិសុខលើហុងកុងកាលពីដើមខែនេះ បើទោះបីជាមានការតវ៉ាពីប្រជាពលរដ្ឋហុងកុង និងបជ្ឍិមប្រទេសជាច្រើនក្តី។
អូស្ត្រាលី កាណាដា និងអង់គ្លេសសុទ្ធតែបានផ្អាកកិច្ចព្រមព្រៀងបត្យាប័នជាមួយនឹងទីក្រុងហុងកុងកាលពីដើមខែនេះ។ ចំណែកអាមេរិច បានប្រកាសដកការអនុគ្រោះផ្នែកសេដ្ឋកិច្ចចេញពីហុងកុង។
លោករដ្ឋមន្ត្រីការបរទេសញូវហ្សឺឡែនបាននិយាយថា ប្រទេសលោកនឹងចាត់ទុកការនាំចេញទំនិញយោធា និងបច្ចេកវិទ្យាទៅហុងកុង ដូចនឹងការនាំចេញទៅកាន់ប្រទេសចិនដែល ដែលវាជាផ្នែកមួយនៃការពិនិត្យឡើងវិញពីទំនាក់ទំនងទូទៅជាមួយនឹងហុងកុង។
ស្ថានទូតចិនប្រចាំប្រទេសញូវហ្សឺឡែន បានហៅការសម្រេចចិត្តនោះថា ជាការរំលោភច្បាប់អន្តរជាតិ និងការជ្រៀតជ្រែកចូលកិច្ចការផ្ទៃក្នុងរបស់ចិន។
សូមបញ្ជាក់ថា ចិនគឺជាដៃគូពាណិជ្ជកម្មដ៏ធំបំផុតរបស់ញូវហ្សឺឡែន ដោយពាណិជ្ជកម្មទ្វេភាគីប្រចាំឆ្នាំនៃប្រទេសទាំងពីរមានតម្លៃជាទឹកប្រាក់ ២១ពាន់លានដុល្លារ។
ទំនាក់ទំនងរវាងញូវហ្សឺឡែន និងចិនបានប្រេះឆាកាលពីពេលថ្មីៗនេះ ក្រោយពេលញូវហ្សឺឡែនគាំទ្រ ការចូលរួមរបស់កោះតៃវ៉ាន់ នៅអង្គការសុខភាពពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
