ភ្នំពេញ៖ ក្រសួងធនធានទឹកនិងឧតុនិយម បានស្នើសុំឲ្យប្រជាពលរដ្ឋ ប្រុងប្រយ័ត្នចំពោះបាតុភូត ផ្គរ រន្ទះ និងខ្យល់កន្ត្រាក់ ហើយក្រសួងជំនាញដដែល ក៏បន្តអំពាវនាវឲ្យប្រជាពលរដ្ឋរស់នៅតាមបណ្តាខេត្តទីទំនាបជាប់ជួរភ្នំ និងផ្លូវទឹក ប្រុងប្រយ័ត្នចំពោះជំនន់ទឹកភ្លៀង ខណៈខេត្តជាប់សមុទ្រមានភ្លៀងធ្លាក់ច្រើន រលកខ្លាំងៗ។
ក្រសួងធនធានទឹក និងឧតុនិយមបានចេញសេចក្តីជូនដំណឹងស្តីពី ស្ថានភាពធាតុអាកាសរបស់កម្ពុជា ចាប់ពីថ្ងៃនេះដល់ថ្ងៃទី៤ ខែសីហា ឆ្នាំ ២០២០។ តាមរយៈនៃការប្រែប្រួលជាបន្តបន្ទាប់ នៃស្ថានភាពអាកាសធាតុ សង្កេតឃើញថា ខ្យល់មូសុងនិរតីបក់ក្នុងកម្រិតបង្គួរមកលើកម្ពុជា ខណៈប្រព័ន្ធសម្ពាធទាបអូសបន្លាយលើប្រទេសថៃ ឡាវ និងវៀតណាម។
ស្ថានភាពបែបនេះធ្វើឲ្យ តាមបណ្តាខេត្តនៅតំបន់វាលទំនាបកណ្តាល ៖ សីតុណ្ហភាពអប្បបរមា មានពី ២៦-២៨°C សីតុណ្ហភាពអតិបរមា មានពី ៣២-៣៤°C ។ ភ្លៀងនឹងអាចធ្លាក់រាយប៉ាយ ជាមួយនិងបរិមាណពីមធ្យមទៅច្រើន ក្នុងនោះក៏មានផ្នែកខ្លះ អាចមានភ្លៀងធ្លាក់ខ្លាំង ។
បណ្តាខេត្តនៅតំបន់ជួរភ្នំដងរែក និងខ្ពង់រាបឦសាន ៖ សីតុណ្ហភាពអប្បបរមា មានពី ២៤-២៦°C សីតុណ្ហភាពអតិបរមា មានពី ៣០-៣២°C ។ នឹងអាចមានភ្លៀងធ្លាក់រាយប៉ាយ នៅក្នុងកម្រិតពីមធ្យមទៅបង្គួរ ក្នុងនោះក៏មានផ្នែកខ្លះ អាចមានភ្លៀងធ្លាក់ច្រើន ។
បណ្តាខេត្តនៅតំបន់មាត់សមុទ្រ ៖ សីតុណ្ហភាពអប្បបរមា មានពី ២៤-២៦°C សីតុណ្ហភាពអតិបរមា មានពី ៣០-៣២°C ។ នឹងអាចមានភ្លៀងធ្លាក់រាយប៉ាយនៅក្នុងកម្រិតពីតិចទៅបង្គួរ ។
ក្រសួងធនធានទឹកនិងឧតុនិយម សូមអំពាវនាវដល់ប្រជាពលរដ្ឋឲ្យបន្តប្រុងប្រយ័ត្នចំពោះបាតុភូត ផ្គរ រន្ទះ និងខ្យល់កន្ត្រាក់។ ចាប់ពីថ្ងៃទី ៣១ ខែកក្កដា ដល់ថ្ងៃទី ០៤ ខែសីហា ផ្នែកខ្លះនៃបណ្តាខេត្តនៅទីទំនាបជាប់ជួរភ្នំ និងផ្លូវទឹក សូមប្រុងប្រយ័ត្នចំពោះជំនន់ទឹកភ្លៀង។ ដោយឡែកនៅលើផ្ទៃសមុទ្រនឹងអាច មានភ្លៀងធ្លាក់ច្រើន និងរលកសមុទ្របក់បោកខ្លាំងចាប់ពីថ្ងៃទី១-៣ ខែសីហា ឆ្នាំ២០២០៕ ដោយ៖កូឡាប
