ភ្នំពេញ៖ គ្រោះថ្នាក់ចរាចរណ៍ នាពេលបច្ចុប្បន្ននេះ ត្រូវបានគេសង្កេតឃើញថា បានកើតឡើងគួរឲ្យតក់ស្លុត និងព្រួយបារម្ភជាខ្លាំង ព្រោះតែក្នុង១ថ្ងៃៗអត្រានៃគ្រោះថ្នាក់ស្លាប់និងរបួស បានបន្តកើនឡើងឥតឈប់ឈរ។
បើទោះជាច្បាប់បានដាក់កំហិតប្រសិនប្រជាពលរដ្ឋណាមិនគោរពច្បាប់ ដូចជាការតម្រូវឲ្យពាក់មួកសុវត្ថិភាព ដើម្បីការពារអាយុជីវិតខ្លួនឯង នឹងត្រូវតែទទួលរងនូវការផាកពិន័យធ្ងន់យ៉ាងណាក៏ដោយ ក៏គេនៅតែសង្កេតឃើញមនុស្សមួយចំនួន ពុំព្រមធ្វើតាមឡើយ។ ហើយផ្ទុយទៅវិញ ពេលអស់លុយកាក់ តាំងស្រែកឡើងថា ប៉ូលិសគាបសង្កត់ជិះទាន់រាស្ត្រ។
ជាក់ស្តែង ដូចករណីស្ត្រីរូបនេះជាដើម ដែលទើបត្រូវបានប៉ូលិសចាប់ផាកពិន័យអស់ ៦ ម៉ឺនរៀល ដោយសារតែបើកបរគ្មានមួយសុវត្ថិភាព ស្ថិតនៅម្តុំស្តុបផ្សារថ្មី ពុំត្រឹមតែមិនធ្វើឲ្យគេមានក្តីអាណិតប៉ុណ្ណោះទេ តែថែមឲ្យមហាជនស្តីបន្ទោសឲ្យយ៉ាងចាស់ៗដៃ ព្រោះខ្លួនខុសហើយ បែរជានៅហ៊ានចេញមុខមកនិយាយប្រមាថប៉ូលិស ក្នុងន័យចោទប្រកាន់ដាក់គោលដៅស្អេកស្កះពេញក្នុងក្រុង ចាំតែចាប់ផាកពិន័យអ្នកដំណើរ។
ក្នុងនោះ អ្នកប្រើប្រាស់បណ្តាញសង្គម ដែលពុំគាំទ្រនូវទង្វើមិនស្គាល់ខ្លួនខុសរបស់ស្រីខាងលើ បានដាក់ឲ្យយ៉ាងចាស់ដៃស្រដៀងៗគ្នាថា៖ «ពាក់ការពារក្បាលឯងសោះ ក៏ខ្ជិលដែរ ដល់ពេលប៉ូលិសផាក តាំងឡូឡា ប្រហែលទើបមកពីព្រៃទេដឹង បានជាមិនដឹងច្បាប់ចរាចរណ៍ផ្លូវគោកអ៊ីចឹង ផាកមួកសុវត្ថិភាពមួយតម្លៃ ៦ ម៉ឺនរៀល មិនទាន់គ្រប់ទេ គួរតែហៅទៅវាស់កម្ពស់ ហើយឲ្យរៀនសូត្រច្បាប់ចរាចរណ៍ឡើងវិញទៀត ទើបសមមុខ» ៕ ដោយ៖ លឹម ហុង