តាកែវ៖ អាជ្ញាធរខេត្តតាកែវ បានធ្វើការណែនាំទៅដល់អាជ្ញាធរតាមស្រុក ក៏ដូចជាសមត្ថកិច្ចពាក់ព័ន្ធទាំងអស់ ដែលនៅជាប់ព្រំកម្ពុជាវៀតណាម ត្រូវបន្តអនុវត្តឲ្យបានម៉ឺងម៉ាត់ នូវវិធានការរបស់ក្រសួងសុខាភិបាល ចំពោះពលរដ្ឋវៀតណាម ដែលចេញចូលមកកម្ពុជា ក្រោយពីរាជរដ្ឋាភិបាលអនុញ្ញាត ។
ថ្លែងនៅក្នុងឱកាសបើកកិច្ចប្រជុំផ្សព្វផ្សាយ សេចក្តីជូនដំណឹងរបស់ក្រសួងមហាផ្ទៃ ដែលជម្រាបមកអភិបាល នៃគណៈអភិបាលខេត្តជាប់ព្រំដែនកម្ពុជាវៀតណាម កម្មវត្ថុស្តីពីការអនុញ្ញាតឱ្យពលរដ្ឋវៀតណាមចូលមកកម្ពុជា នាថ្ងៃ ទី២៩ ខែកក្កដា ឆ្នាំ២០២០ ក្នុងសាលប្រជុំសាលាខេត្តតាកែវ លោក ខាន់ សុខា អភិបាលរងខេត្ត បានថ្លែងគូសបញ្ជាក់ថា រាជរដ្ឋាភិបាលកម្ពុជា បានអនុញ្ញាតឲ្យពល រដ្ឋវៀតណាមចេញចូលមកព្រះរាជាណាចក្រកម្ពុជា គឺស្របតាមសេចក្តីប្រកាសចុងក្រោយរបស់ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ ចុះថ្ងៃទី ២០ ខែឧសភា ឆ្នាំ២០២០ ដូចដែលបានអនុវត្តកន្លងមកជាមួយប្រទេសដទៃទៀត ហើយក្នុងនាមអាជ្ញាធរខេត្ត ស្រុក និងសមត្ថកិច្ចពាក់ព័ន្ធ ជាប់ព្រំដែន ត្រូវអនុវត្តវិធានការសុខាភិបាលដែលបានដាក់ចេញ ឲ្យអនុវត្តដើម្បីប្រយុទ្ធប្រឆាំងជម្ងឺកូវីត១៩នេះ ។
លោកអភិបាលរងខេត្ត បន្ថែមទៀតថា បើទោះបីជាមានការអនុញ្ញាតឲ្យពលរដ្ឋវៀតណាម បានចេញចូល មកប្រទេសកម្ពុជាយើងក៏ដោយ ពិសេសតាមច្រកទ្វារអន្តរជាតិភ្នំឌិន និងច្រកទ្វារព្រំដែននានាក្នុងភូមិសាស្ត្រខាងតាកែវ មន្ត្រីជំនាញពាក់ព័ន្ធនិងអាជ្ញាធរ ត្រូវតែម៉ឺងម៉ាត់ និងហ្មត់ចត់ យកចិត្តទុកដាក់ខ្ពស់ពង្រឹងវិធានការបង្ការ ទប់ស្កាត់ការរាតត្បាតនៃជំងឺកូវីដ១៩ ឆ្លងមកសហគមន៍មូលដ្ឋានរបស់យើង ឲ្យមានប្រសិទ្ធភាពខ្ពស់ ពិសេស ត្រូវប្រើវិធានចត្តាឡីស័កដល់ពលរដ្ឋវៀតណាម ឲ្យគ្រប់រយៈពេល១៤ថ្ងៃ និងបញ្ជាក់ថា អវិជ្ជមានកូវីដ១៩ មុនពេលអនុញ្ញាតឲ្យគាត់ចូលមកកម្ពុជា។
ជាមួយគ្នានេះដែរ លោក ខាន់ សុខា អភិបាលរងខេត្តតាកែវ ក៏បានសង្ឃឹមយ៉ាងមុតមាំថា អាជ្ញាធរតាមស្រុកជាប់ព្រំដែន និងសមត្ថកិច្ចពាក់ព័ន្ធ នឹងខិតខំអនុវត្តតាមតួនាទីភារកិច្ចរបស់ខ្លួន យ៉ាងមានប្រសិទ្ធភាព និងការទទួលខុសត្រូវខ្ពស់ក្នុងការគ្រប់គ្រង ពលរដ្ឋវៀតណាមដែលចេញចូលមក កម្ពុជារបស់យើង ពិសេសគឺទប់ស្កាត់ឲ្យបានដាច់ខាតនូវឆ្លងរាល់ដាលជំងឺកូវីដ១៩នេះ ក្នុងភូមិសាស្ត្រ ខេត្តតាកែវរបស់យើង ក៏ដូចជាទូទាំងប្រទេសផងដែរ ៕ដោយ៖តាកែវ
