ក្រុមហ៊ុនបច្ចេកវិទ្យាចិន Huawei បានវ៉ាដាច់ក្រុមហ៊ុនអេឡិចត្រូវនិចកូរ៉េខាងត្បូង Samsung ក្លាយជាអ្នកលក់ទូរស័ព្ទដៃដ៏ធំបំផុតក្នុងលោក នៅក្នុងត្រីមាសទី ២ ឆ្នាំ ២០២០ ដោយលក់បានរហូតដល់ ៥៥,៨លានគ្រឿង ធៀបនឹងក្រុមហ៊ុន Samsung លក់បានត្រឹម ៥៣,៧លានគ្រឿង។ នេះបើតាមទិន្នន័យពីក្រុមហ៊ុនស្រាវជ្រាវ Canalys។
ខណៈដែលការលក់របស់ Huawei ធ្លាក់ចុះ ៥ភាគរយក្នុងរយៈពេលដូចគ្នាធៀបនឹងឆ្នាំមុន ការលក់របស់ Samsung ធ្លាក់ចុះរហូតដល់ ៣០ភាគរយ ដោយសារតែការរំខាន់របស់វីរុសកូរ៉ូណា នៅក្នុងទីផ្សារដ៏សំខាន់ ដូចជា ប្រេស៊ីល អាមេរិច និងអឺរ៉ុបជាដើម។
ការនាំចេញទៅក្រៅប្រទេសរបស់Huawei ធ្លាក់ចុះចំនួន ២៧ភាគរយ នៅក្នុងត្រីមាសទី ២ ធៀបនឹងឆ្នាំមុន ប៉ុន្តែក្រុមហ៊ុនបានបង្កើនឥទ្ធិពលរបស់ខ្លួននៅក្នុងទីផ្សារចិន ដែលបានធូរស្បើយលឿនពីការរាតត្បាតរបស់វីរុសកូរ៉ូណា ហើយឥឡូវនេះ ក្រុមហ៊ុនលក់បានជាង ៧០ភាគរយនៃទូរស័ព្ទរបស់ខ្លួនទាំងអស់។
អ្នកនាំពាក្យរបស់ Huawei បាននិយាយថា “ជំនួញរបស់ពួកយើងបង្ហាញពីភាពធន់ពិសេស នៅក្នុងស្ថានភាពដ៏លំបាកនេះ។ ក្នុងអំឡុងពេលមានការធ្លាក់ចុះ និងការប្រឈមសេដ្ឋកិច្ចពិភពលោក ពួកយើងនៅតែបន្តរីកចម្រើន”។
ទោះយ៉ាងណា បុគ្គលិកជាន់ខ្ពស់របស់ក្រុមហ៊ុន Huawei បានប្រាប់ទីភ្នាក់ងារសារព័ត៌មាន Reuters បាននិយាយថា ដំណែងរបស់ Huawei ជាអ្នកលក់ទូរស័ព្ទធំបំផុតប្រហែលមានរយៈពេលខ្លី នៅពេលទីផ្សារផ្សេងៗងើបឡើងវិញពីវិបត្តិកូរ៉ូណា។
ក្រុមហ៊ុន Apple របស់អាមេរិចគ្រោងនឹងចេញផ្សាយទិន្នន័យ នាំចេញទូរស័ព្ទរបស់ខ្លួនសម្រាប់ត្រីមាសទី ២ នៅថ្ងៃសុក្រនេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
