ភ្នំពេញ៖ កាលពីថ្មីៗនេះ មានរឿងរ៉ាវដ៏គួរឲ្យភ្ញាក់ផ្អើមួយ ដោយលោកផ្កាយ២ម្នាក់ឈ្មោះ យឹម វុទ្ធី ក្នុងនាមជាដើមបណ្តឹង បានប្តឹងចោទប្រកាន់ស្ត្រីចំណាស់ម្នាក់ឈ្មោះ ផង សៀមឆេងពីបទ «លួចចិញ្ចៀនពេជ្រ និងជំរិតទារប្រាក់»។ នេះបើយោងតាមលិខិតកោះហៅរបស់នាយកដ្ឋាននគរបាលព្រហ្មទណ្ឌក្រសួងមហាផ្ទៃ អញ្ជើញស្ត្រីខាងលើឲ្យចូលខ្លួនមកបំភ្លឺ កាលពីថ្ងៃទី២៨ ខែកក្កដា ឆ្នាំ២០២០ ថ្មីៗនេះរួចហើយ។
តែយ៉ាងណា រឿងនេះត្រូវបានដឹងថា គឺជាការចោទប្រកាន់ដ៏អយុត្តិធម៌បំផុត ព្រោះស្ត្រីចំណាស់ឈ្មោះ ផង សៀមឆេង មានទីលំនៅក្នុងភូមិទ្រុងមាន់ សង្កាត់អូរបែកខ្អម ខណ្ឌសែនសុខ ពុំបានលួចដូចក្នុងលិខិតកោះអញ្ជើញនោះទេ។ នេះបើតាមគណនីហ្វេសប៊ុកឈ្មោះ សេង សុវណ្ណ មង្គល ដែលត្រូវជាកូនបានបង្ហោះកាលពីល្ងាចថ្ងៃទី២៨ ខែកក្កដា ឆ្នាំ២០២០ ឲ្យដឹងថា៖ «ឯណាយុត្តិធម៌ ! ម្ដាយខ្ញុំរើសបានចិញ្ចៀនកណ្តាលថ្នល់សោះ មិនដឹងថាចិញ្ចៀនបុគ្គលណាទេ តែបែរជាលោកផ្កាយ២ ចោទថា ម្ដាយខ្ញុំជាអ្នកលួចចិញ្ចៀនទៅវិញ ។ រូបភាព មានហើយហេតុអីបានថា គ្រួសារខ្ញុំលួចចិញ្ចៀន ប្រទេសខ្មែរមានយុត្តិធម៌ទេ សម្រាប់គ្រួសាររបស់ខ្ញុំ តើគ្រួសាររបស់ខ្ញុំទទួលបានយុត្តិធម៌យ៉ាងណា»។
បន្ថែមពីនេះ លោកជំទាវ ហ៊ុន ស៊ីណាត ប្អូនស្រីសម្តេចតេជោ ហ៊ុន សេន នាយករដ្ឋមន្ត្រី ក៏បានបញ្ចេញមតិយោបល់សង្កត់បន្ថែមថា៖ «បើតាមខ្ញុំមើលភស្តុតាងក្នុង Camera មានជាក់ស្តែង ឃើញនឹងភ្នែកច្បាស់ ប៉ុណ្ណឹង ហើយ លោកផ្កាយ គាត់ហ៊ានប្តឹង ក្នុងលក្ខណៈបំបែកសំណុំរឿងទៀត ។ គួរតែ លោកផ្កាយ ធ្វើការសម្របសម្រួល នឹង លោកយាយ ទើបជាការប្រសើរនិងមានភាពថ្លៃថ្នូរ ក្នុងនាមជាអ្នកមានឋានៈ ក្នុងសង្គមកុំយកផ្កាយមកធ្វើស្រែបុណ្យធ្វើបាបរាស្ត្រទន់ខ្សោយបែបនេះមិនល្អទេ»៕ ដោយ៖ លឹម ហុង
ដើម្បីជ្រាបច្បាស់ទាំងអស់គ្នា សូមទស្សនាវីដេអូឃ្លីបពីកាមេរ៉ាសុវត្ថិភាពខាងក្រោម៖