ភ្នំពេញ៖ ស្ត្រីម្នាក់ដោយសារម៉ូបាំងនូវការស្រឡាញ់កូនខ្លាំងពេកធ្វើឲ្យខ្វះការពិចារណា បានក្លាយជាអ្នកទោសត្រូវប្រឈមជាប់គុកពី ១០ ឆ្នាំ ទៅ ២០ ឆ្នាំ បន្ទាប់ពីបានយកកាំបិតទៅឆូតមុខក្មេងស្រីម្នាក់អាយុ ៥ ឆ្នាំ ដើម្បីជាការសងសឹកទៅលើក្មេងស្រីរងគ្រោះ ដែលបានយកដុំថ្មគប់មកលើកូនប្រុសខ្លួនបណ្តាលឲ្យបែកក្បាលដេរអស់១ថ្នេរ កាលពីថ្ងៃទី១៨ ខែកក្កដា ឆ្នាំ២០២០ ស្ថិតនៅបុរីភពថ្មីឈូកវ៉ា២ ក្នុងភូមិតិក្ខប្បញ្ញោ សង្កាត់សំរោង ខណ្ឌពោធិសែនជ័យ រាជធានីភ្នំពេញ។
ជាមួយនឹងអំពើដ៏សាហារព្រៃផ្សៃនេះ ស្រី្តដៃដល់រូបនេះដែលមានឈ្មោះថា លីវ ប៊ុនធឿន អាយុ ៤៣ ឆ្នាំ (រស់នៅទីកន្លែងកើតហេតុ) បានបង្កឲ្យមហាជនផ្ទុះកំហឹងយ៉ាងខ្លាំងក្លាពេញផ្ទៃប្រទេសតែម្តង និងព្រមទាំងសាទរចំពោះចំណាត់ការរបស់តុលាការផងដែរ។
ចំណែកក្មេងស្រីរងគ្រោះវិញ ឃើញថាបានទទួលការអាណិតអាសូរជាខ្លាំង ពីសំណាក់បងប្អូនមហាជន ដែលក្នុងនោះ មានសប្បុរសជនជាច្រើន និងក៏ដូចថ្នាក់ដឹកនាំនៃយើង ឧបត្ថម្ភថវិកាដ៏ជ្រះថ្លាមួយចំនួន ដើម្បីលើកទឹកចិត្តដល់ក្រុមគ្រួសាររបស់នាងផងដែរ។
ទោះយ៉ាងណា នៅពេលនេះ មុខរបួសរបស់ក្មេងស្រីរងគ្រោះ ឃើញថាបានជាសះល្អប្រសើរគ្រាន់បើជាងមុនជាបណ្តើរៗហើយ ប៉ុន្តែ មិនសង្ឃឹមជាសះដូចដើមទាំងស្រុងនោះទេ ។ នេះបើយោងតាមគណនីហ្វេសប៊ុកឈ្មោះ Krouch Vanna បានបង្ហោះសារថា រៀបរាប់ពីស្ថានភាពរបស់ក្មេងស្រីរងគ្រោះថា “ ក្មួយស្រីដែលត្រូវស្ត្រីម្នាក់វះមុខនោះគឺបានចេញពីមន្ទីពេទ្យ៥ថ្ងៃហើយ ស្ថានភាពមុខរបួសគឺជា៥៥%ហើយក៏មិនសង្ឃឹមថាជា១០០%ដែរ។ ដែលវិលមកសភាពដើម ដើមហេតុគឺមក ពីដុំថ្ម១ដុំនេះហើយ២៩ខែកក្កដា២០២០”៕ ដោយ៖ លឹម ហុង
