ភ្នំពេញ៖ បុរសជាអ្នកលក់ទូរស័ព្ទ និងគ្រឿងអេឡិចត្រូនិក បានបង្ហាញអារម្មណ៍សោកស្តាយយ៉ាងខ្លាំង ព្រោះតែភ្លៀង១មេយ៉ាងចាស់ដៃ កាលពីយប់ថ្ងៃទី២៨ ខែកក្កដា នៅកំពង់សោម បានធ្វើឲ្យលិចលង់ និងខូចខាតទ្រព្យសម្បត្តិរបស់គាត់គិតជាទឹកប្រាក់អស់ជាង 23000$ ។ ប៉ុន្តែ ទោះយ៉ាងណា ការបាត់បង់ប៉ុននេះ គឺមិនស្មើនឹងការឈឺចាប់ខ្លាំងបំផុត ដែលម្ចាស់ផ្ទះជួលនិយាយកុហកថា ផ្ទះមិនលិចទឹកចង់បានតែលុយគេនោះទេ ព្រោះថា នៅពេលដែលគាត់សុំលុយកក់៣ខែ ស្មើនឹង ២៧០០$ ដោយសុំត្រឹម ២០០០$ មកវិញ តែម្ចាស់ផ្ទះដែលគ្មានមនោសញ្ចេតនាសូម្បីបន្តិចសោះ មិនឲ្យដាច់ខាត ខណៈគាត់ទើបតែចូលមកនៅមិនទាន់បាន១ថ្ងៃស្រួលបួលផង ។ ហើយគាត់ (ជនរងគ្រោះ) សុំតែចេញវិញ ដោយពុំគិតថ្លៃជួយធ្វើទ្វារ និងរៀបការ៉ូឲ្យទៀតផង។
នេះបើយោងតាមគណនីហ្វេសប៊ុកឈ្មោះ «អនាគតនៅ ក្នុងដៃ ជីវិតថ្លៃនៅលើមាត់» ជាអ្នកជួលរងគ្រោះ បានបង្ហោះវីដេអូនិយាយទាំងស្រក់ទឹកភ្នែក និងសរសេរលម្អិតរៀបរាប់ឲ្យបងប្អូនបានដឹងបន្ថែម កុំឲ្យជួបម្ចាស់ផ្ទះបែបនេះ ដូចរូបគាត់ដែលមិនធ្លាប់ជួបពីមុនមក ដែលមានខ្លឹមសារយ៉ាងដូច្នេះថា៖ «ខ្ញុំក្រ ខ្ញុំគ្មានលទ្ធភាពទិញផ្ទះផ្ទាល់ខ្លួនឯងនៅ ដើរជួលផ្ទះគេតែតាំងពីដើរជួលផ្ទះគេមកមិនដែលជួបម្ចាស់ផ្ទះណា ឃើញតែផលប្រយោជន៍ផ្ទាល់ខ្លួនឯង ដល់ថ្នាក់មិនប្រាប់ថាផ្ទះបងលិចទឹកអញ្ចឹងទេ ប្រាប់ខ្ញុំថាផ្ទះគាត់អត់លិចទេ តាំងពីគេកាយប្រឡាយមក ដល់យប់ថ្ងៃ28 ខែកក្កដា ឆ្នាំ2020 ក៏មានភ្លៀងធ្លាក់ ស្រាប់តែលិចអស់ពេញទាំងផ្ទះ ខូចខាតទ្រព្យសម្បត្តិខ្ញុំអស់70% ពេលជួលខ្ញុំបានបញ្ជាក់គាត់ទៀតថា បើផ្ទះបងលិចទឹកខ្ញុំមិនហ៊ាននៅទេ ព្រោះអីវ៉ាន់របស់របររបស់ខ្ញុំមិនត្រូវគ្នាជាមួយទឹកទេ ព្រោះជាទូរស័ព្ទ និងគ្រឿងអេឡិចត្រូនិច គាត់ថាមិនអីទេ ទាំងប្ដីទាំងប្រពន្ធ ចុងក្រោយខ្ញុំ សុំជួបគាត់ក្រោយមានបញ្ហាសុំឲ្យជួយសម្រួល បែរជាដេញបន្ថែមឲ្យធ្វើតាមច្បាប់ គាត់ថែមទាំងថាទៀតថា គ្មានចៅហ្វាយខេត្តណាធានារឿងទឹកជំនន់ ខ្ញុំក៏តបថាមិនឲ្យបងធានាទេ តែពេលមកជួលបងត្រូវប្រាប់ដំណឹងខ្ញុំមុនថា ផ្ទះនេះលិចទឹក ហើយបងមិនធានាទេថាលិចទៀត ឬក៏មិនលិច ហើយបងគួរណាតែត្រង់ ឬ ក៏សួរខ្ញុំមកថា អូនអាចជួលបាន ឬមិនបានតែប៉ុណ្ណឹងមក ខ្ញុំយល់ពេកថាផ្ទះបងមានបញ្ហាបែបហ្នឹង មិនមែនពេលមានបញ្ហា ខ្ញុំទៅជួបបងបែរជានិយាយថា បងមិនបានចាប់បង្ខំខ្ញុំឲ្យជួលអីណា មុនខ្ញុំជួលម៉េចមិនសិក្សាមុនឲ្យច្បាស់ ទៅអ៊ីចឹងឲ្យប្រុយ ផ្ទុយពីមិនទាន់មកនៅ ខ្ញុំទទួលថាប្អូនក្មេងល្ងង់មិនសិក្សា ប៉ុន្តែក្មេងខ្ញុំនេះម៉ាត់ណាម៉ាត់ហ្នឹង មិនមែនបាតដៃខ្នងដៃដូចចាស់មួយចំនួនទេ ខ្ញុំទុកចិត្តបង ព្រោះបងជាម្ចាស់ផ្ទះផ្ទាល់ មកជួលនិយាយថ្លៃអីក៏ជាមួយបង ព្រោះតែបងជាម្ចាស់ ហេតុអីបានត្រូវកុហក ក្រែងបងទាំងពីរជាមនុស្សធ្វើបុណ្យទានណាស់ហី ម៉េចក៏បែបហ្នឹង រំលោភសេចក្ដីទុកចិត្តមនុស្សទាំងរស់ ត្រឹមតែលុយប្រាក់ឈ្នួលមួយខែ 900$ សោះ មិនគិតថាគ្នារងគ្រោះខាតបង់ប៉ុណ្ណា បែរជាថាឲ្យខ្ញុំថែមទៀត ឡៅតឿមានម៉េចមិនដាក់ មកដាក់អីនឹងក្រោមហ៎ សួរដូចឆោត ជួលផ្ទះបងលក់ទូរស័ព្ទខ្ញុំជួលទាំងមូល ហើយឲ្យយកទៅដាក់ឡៅតឿលក់ឲ្យអ្នកណា បើអីវ៉ាន់ខ្ញុំត្រូវរៀបចំនៅលក់ខាងក្រោមនឹងខ្ញុំមិនទុកនៅហ្នឹង មួយក្បាច់នេះសឹងតែឲ្យមកសម្លាប់ខ្ញុំល្អជាង ព្រោះខ្ញុំក្រណាស់
សម្ដីតាមឆាតផ្សេង គាត់ទទួលថាខុសមិនបានប្រាប់ខ្ញុំមុនឲ្យប្រយ័ត្ន ដល់ពេលជួបផ្ទាល់ផ្សេង ខ្ញុំពិបាកណាស់ដល់ពេលអីចឹង ខ្ញុំក៏យល់ដែរថាទឹកវាជន់ តែខ្ញុំចង់ឲ្យបងទទួលខុសត្រូវនូវពាក្យសម្ដី ដែលបងទាំងពីរនិយាយមុនពេលខ្ញុំចូលមកនៅផ្ទះនេះ ខ្ញុំចាំតែបងថាអត់លិចទេអូន មិនអីទេលែងលិចហើយ ត្រង់ហ្នឹងទើបខ្ញុំហ៊ានមកនៅ។ បងទាំងពីរគួរណាតែពិចារណាផង បងថាបងនិយាយអ្វីពីមុន ហើយបងនិយាយអ្វីក្រោយពេលមានបញ្ហា ហ៎ ខ្ញុំទើបមកនៅផ្ទះបងថ្ងៃដំបូងផងបងអ្ហើយ បងផ្លាស់ប្ដូរលឿនម្ល៉េះ ឆាកជីវិតខ្ញុំអើយគេបោកលុយអស់ជាង 10ម៉ឺនដុល្លារម្ដងហើយ ឥឡូវមកជួបរឿងបែបនឹងទៀត ធ្វើមនុស្សហេតុអីមិនទៀងត្រង់បន្តិចទៅ ហើយមកដល់ថ្ងៃ29 ខ្ញុំសុំតែលុយកក់កុងត្រាបីខែវិញ ក៏គាត់មិនឲ្យដែរ ហួសហេតុណាស់ បើខ្ញុំនៅយូរ១ខែក៏ខ្ញុំមិនថា តែនេះមួយថ្ងៃមកចូលនៅរៀបចំមិនទាន់ហើយផង មានបញ្ហាខាតអស់ទ្រព្យសម្បត្តិ 23000$ ខ្ញុំមិនមាត់មិនទារសំណងអីទេ សុំតែលុយកុងត្រា ហើយចេញពីផ្ទះរបស់របរខូចខាត ចាត់ទុកថាវាឲ្យជ្រះភាពស៊យរបស់ខ្ញុំទៅចុះតែគាត់មិនអោយ» ៕ ដោយ៖ លឹម ហុង
