ភ្នំពេញ៖ រដ្ឋសភាជាតិ បានចេញលិខិតដោយសូមគោរពជូន សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងសំណើសុំចាត់វិធានការចំពោះអតីតតំណាងរាស្ត្រនៃអតីតគណបក្សសង្គ្រោះជាតិ ដែលលួចប្រើប្រាស់រូបសញ្ញារដ្ឋសភាលើលិខិតផ្សេងៗ។
បើតាមលិខិតរបស់រដ្ឋសភា ៖ សម្តេចក្រឡាហោម មេត្តាជ្រាបថា អតីតតំណាងរាស្ត្រនៃអតីតគណបក្សសង្គ្រោះជាតិ ត្រូវបាត់បង់ទាំងស្រុងនូវសិទ្ធិ បុព្វសិទ្ធិ និងសមាជិកភាពជាសមាជិករដ្ឋសភា នីតិកាលពីទី៥ ចាប់តាំងពីថ្ងៃទី១៧ខែវិច្ឆិកាឆ្នាំ២០១៧ មក តាមសេចក្តីប្រកាសលេខ១៣៤រសចុះថ្ងៃទី១៧ខែវិច្ឆិកាឆ្នាំ២០១៧ របស់រដ្ឋសភា។ កន្លងទៅថ្មីនេះ មានអតីតតំណាងរាស្ត្រ នៃអតីតគណបក្សសង្គ្រោះជាតិ បានលួចប្រើប្រាស់នូវរូបសញ្ញារដ្ឋសភាលើលិខិតផ្សេងៗ ដែលរំលោភរដ្ឋធម្មនុញ្ញ ច្បាប់ស្តីពីលក្ខន្តិកៈតំណាងរាស្ត្រ បទបញ្ជាផ្ទៃក្នុងនៃរដ្ឋសភា និងច្បាប់ជាធរមានផ្សេងៗទៀត។ ទង្វើនេះធ្វើឲ្យមានការភាន់ច្រឡំពីសាធារណជនជាតិ និងអន្តរជាតិ ព្រមទាំងប៉ះពាល់ដល់ស្ថាប័នរដ្ឋសភាទៀតផង។
តាមរយៈលិខិតរដ្ឋសភាជាតិកាលពីថ្ងៃទី៣០ខែមករាឆ្នាំ២០១៨នេះ លោកឡេង ប៉េងឡុង អគ្គលេខាធិការរដ្ឋសភា បានស្នើសុំដល់សម្តេចក្រឡាហោម ជួយចាត់វិធានការតាមច្បាប់ ៕ ដោយ៖បញ្ញាស័ក្តិ