ភ្នំពេញ ៖ ពិធីការិនីជើងចាស់ និងជាអគ្គនាយិការរង២រូប នៅស្ថានីយទូរទស្សន៍ជាតិកម្ពុជា(ទទក) កាលពីពេលថ្មីៗនេះ បានបញ្ចេញប្រតិកម្មជាខ្លាំង ចំពោះទង្វើរបស់ពិធីករវីជេ តាប៊ុយ និងពិធីការិនីជាដៃគូរបស់ខ្លួនម្នាក់ នៅក្នុងកម្មវិធីពេញចិត្ត ឬអត់ របស់ស្ថានីយ៍ទូរទស្សន៍ MYTV ដោយបានប្រើភាសាឌឺដង យកតម្លៃនៃអត្តចរិត សីលធម៌ សុជីវធម៌ និង ក្រមវិជ្ជាជីវៈរបស់ពួកគាត់ មកលេងសើចបែបនេះ។
ប្រតិកម្មនេះ បានកើតឡើង គឺបន្ទាប់ពីពិធីករជំនាន់ថ្មីទាំងពីរ បានយករឿងចំអន់គ្នាលេង ក្នុងកម្មវិធីពេញចិត្តឬអត់ ត្រង់ឃ្លាថា៖ “និយាយសុភាព អីចឹងអាចទៅធ្វើការនៅ (ទទក) បាន…” និងពិធីការិនី និយាយតបជាមួយសំឡេងសើចថា៖ “ខ្លាចគេដេញទៅធ្វើការនៅ ទទក “។
នេះបើតាមគណនីហ្វេសប៊ុករបស់អ្នកស្រី Leakhena OR បានបញ្ចេញប្រតិកម្មយ៉ាងដូច្នេះថា៖ «ថាមិនខឹងទេ តែមើលហើយមើលទៀតទ្រាំមិនបាន! ក្នុងនាមជាពិធីការិនីមួយរូបរបស់ស្ថាប័នជាតិ ទទក ខ្ញុំពិតជាសោកស្តាយដែលពិធីករនិងពិធីការិនី កម្មវិធីពេញចិត្តឬអត់ របស់MYTV យកតម្លៃនៃអត្តចរិត សីលធម៌ សុជីវភាព និង ក្រមវិជ្ជាជីវៈរបស់យើងខ្ញុំជាពិធីករ ពិធីការិនី មកលេងសើចកំប្លុកកំប្លែង។
ខ្ញុំសូមឲ្យប្អូនៗសូមទោសជាសាធារណះចំពោះសំដីដែលបាននិយាយទោះជាចេតនាឬអចេតនាក៏ដោយ. ១/ពាក្យដែលពិធីករនិយាយថា: សុភាពអាចទៅធ្វើការនៅទទកបាន(ខ្ញុំមិនចាប់កំហុសទេ) ២/ពិធីការិនី និយាយ និង សំឡេងសើច: ខ្លាចគេដេញទៅធ្វើការនៅទទក (បានន័យថាម៉េចខ្លាចគេដេញហ្នឹង! សូមជួយពន្យល់ ? រួមទាំងសឡេងសើចបានន័យថាម៉េច?)
ខ្ញុំសូមភ្ជាប់សំណេរលោកជំទាវ កុច មារតី ដែលជារៀមច្បងខ្ញុំ
ខ្ញុំមិនមែនជាមនុស្សឥតខ្ចោះដែលមិនចេះខុសឆ្គងនោះទេ តែបទពិសោធការងារជាអ្នកអាន ជាអ្នកអត្ថាធិប្បាយ ជាពិធីការិនី ជាង ២០ឆ្នាំមកនេះ ល្មមអាចចែករំលែកជូនប្អូនៗ ជាអ្នកអត្ថាធិប្បាយ ជាពិធីករ ពិធីការិនី ជំនាន់ក្រោយបាន ដឹងខ្លះៗ ថាជាពិធីករ ពិធីការិនីត្រូវតែ :
ប្រុងប្រយ័ត្នរាល់ពាក្យពេចន៍និយាយស្តីចេញមក ត្រូវដឹងថាវា បានចូលត្រចៀកអ្នកស្តាប់ អ្នកមើលរាប់ពាន់ រាប់ម៉ឺននាក់ ក្នុងពេលតែមួយ ដូច្នេះ ត្រូវប្រាកដក្នុងចិត្ត កុំឲ្យពាក្យពេចន៍ ដែលយើងនិយាយចេញមកក្លាយជាអាវុធមុខ២។
ចាំថា ជាមនុស្សសាធារណៈ គ្រប់យ៉ាងដែលយើងនិយាយ យើងសម្តែងចេញទៅអ្នកស្តាប់ អ្នកមើល ចង់ឬមិនចង់ គេគិតនិងជឿ ថាវាត្រូវ វាល្អ គេនឹងយកតម្រាប់តាម ដូច្នេះត្រូវស្រាវជ្រាវឲ្យច្បាស់ មុននិងនិយាយឬបង្ហាញ។
ចាំថា ខ្លួនយើងជាកោសិកាមួយរបស់សង្គមដែលមានឱកាសជាងមនុស្សទូទៅ ក្នុងការជួយ សង្គមជាតិ តាមរយៈ ការនិយាយ ការសម្តែង ចូលរួមអប់រំ រក្សាវប្បធម៌ ប្រពៃណី ទំនៀមទម្លាប់ ជាគំរូឲ្យមនុស្សជំនាន់ក្រោយៗ ស្របតាម ពាក្យស្លោក « បុរាណមិនយឺត សម័យមិនបរទេស »។
ចាំថា យើងមិនមែនជាតុលាការ មិនមែនជាគ្រូបង្រៀន មិនមែនជាគ្រូពេទ្យ ដែលកាត់ក្តី ដែលបង្រៀន និងផ្តល់ដំបូន្មានលើការព្យាបាល ដល់ប្រិយមិត្តខ្លួនឡើយ យើងត្រឹមជាអ្នកពាំនាំអ្វីដែលពិត មានអំណះអំណាងត្រឹមត្រូវច្បាស់លាស់ ជូនប្រិយមិត្តប៉ុណ្ណោះ រក្សាជំហរកណ្តាល មិនលម្អៀង មានហេតុផល មានទឡ្ហីករណ៍ ច្បាស់លាស់ចំពោះរឿងរ៉ាវដែល លើក យកមកវិភាគក្នុងកម្មវិធីរបស់ខ្លួនមិនវាយប្រហារ ឬ ប៉ះពាល់សិទ្ធិរបស់គេ ។សូមអរគុណ»។
ទោះយ៉ាងណា យើងរង់ចាំតាមដានទាំងអស់គ្នាថា តើនឹងមានការបកស្រាយយ៉ាងណា ពីវីជេ តាប៊ុយ ដែលជាអ្នកកាន់កម្មវិធីពេញចិត្ត ឬអត់ របស់ស្ថានីយ៍ទូរទស្សន៍ MYTV ៕ ដោយ៖ លឹម ហុង