ភ្នំពេញ៖ រដ្ឋមន្ត្រីក្រសួងសុខាភិបាល ជម្រាបជូនអភិបាលរាជធានី ខេត្តទាំងអស់ ជាពិសេសខេត្តជាប់ប្រទេសវៀតណាម ត្រូវបង្កើនការទប់ស្កាត់ COVID-19 ក្រោយជំងឺនេះកាន់តែកើនឡើង និងឆ្លងដល់សហគមន៍នៅវៀតណាម ។
នៅថ្ងៃសុក្រ ទី ៣១ ខែកក្កដា ឆ្នាំ២០២០ លោកម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩
បានជម្រាបជូន ឯកឧត្តម លោកជំទាវ អភិបាលនៃគណៈអភិបាលរាជធានី ខេត្តទាំង ២៥ ក្នុងកម្មវត្ថុ៖ ការបង្កើនការប្រុងប្រយ័ត្ននិងចាត់វិធានការប្រកបដោយប្រសិទ្ធភាពខ្ពស់ ដើម្បីបង្ការការនាំចូលជំងឺកូវីដ-១៩ តាម ច្រកព្រំដែន មកក្នុងព្រះរាជាណាចក្រកម្ពុជា ដើម្បីការពារការចម្លងវីរុសកូវីដ-១៩ ចូលទៅក្នុងសហគមន៍ ដោយយោង តាមការចាំបាច់ និងស្ថានភាពរាតត្បាតនៃជំងឺកូវី៥-១៩។
សេចក្តីដូចមានចែងក្នុងកម្មវត្ថុ និងយោងខាងលើ ក្រសួងសុខាភិបាល សូមជម្រាបជូន ឯកឧត្តម លោកជំទាវ អភិបាល នៃគណៈអភិបាលរាជធានី -ខេត្ត ជ្រាបថា ដោយផ្អែកតាមព័ត៌មានពីប្រទេសវៀតណាមថ្មីៗនេះ បានប្រកាសពីការចម្លងវីរុសជំងឺ កូវីដ-១៩ នៅក្នុងសហគមន៍ ដែលបានកើតឡើងនៅទីក្រុង ដាណាង និងបានរាលដាលដល់ភាគកណ្តាលនៃប្រទេស វៀតណាម ទីក្រុងហូជីមិញ និងទីក្រុងហាណូយ ជាមួយគ្នានោះដែរស្ថានភាពនៃការចម្លងនៅលើពិភពលោក និងក្នុងតំបន់ក៏ មិនទាន់មានការធូរស្បើយ ដោយសារនៅតែមានកំណើននៃការចម្លងវីរុសកូវីដ-១៩ និងការស្លាប់ដោយសារជំងឺនេះ នៅឡើយ។ ដូច្នេះសូម ឯកឧត្តម លោកជំទាវ អភិបាលនៃគណៈអភិបាលរាជធានី-ខេត្ត ទាំងអស់ជាពិសេសខេត្តដែលមានព្រំប្រទល់ ជាប់ប្រទេសវៀតណាម ដូចជាខេត្ត កំពត តាកែវ កណ្តាល ព្រៃវែង ស្វាយរៀង ត្បូងឃ្មុំ ក្រចេះ មណ្ឌលគិរី និងរតនគិរី ត្រូវបង្កើនការប្រុងប្រយ័ត្ន និងចាត់វិធានការដូចតទៅ៖
– អាជ្ញាធរពាក់ព័ន្ធទាំងអស់ជាពិសេសបណ្តាខេត្តដែលមានព្រំដែន ជាមួយប្រទេសវៀតណាម ត្រូវបង្កើនសកម្មភាពត្រួត ពិនិត្យលើអ្នកដំណើរចេញ-ចូលតាមច្រកព្រំដែន ឱ្យបានហ្មត់ចត់ ដោយអនុវត្តទៅតាមសេចក្តីណែនាំរបស់រាជរដ្ឋាភិបាល និង ក្រសួងសុខាភិបាល ជាពិសេសត្រូវត្រួតពិនិត្យសុខភាព និងធ្វើតេស្តរកវីរុសកូវីដ-១៩ សម្រាប់សិស្ស និងនិស្សិត ដែល ត្រឡប់មកពីប្រទេសវៀតណាម និងអ្នកដំណើរដែលសង្ស័យទាំងអស់កុំឱ្យមានការធ្វេសប្រហែសឡើយ។
-ចុះពិនិត្យតាមដាន ឬយកវត្ថុសំណាក និងរាយការណ៍មកទូរស័ព្ទទាន់ហេតុការណ៍ នូវរាល់ករណីសង្ស័យឆ្លងវីរុសកូវីដ-១៩ ឬ ករណីគ្រុនក្តៅ ឬគ្រុនផ្តាសាយដែលកើតមានជាក្រុម ឬអ្នកមានបញ្ហាផ្លូវដង្ហើមជាដើម។
-អាជ្ញាធរ ខេត្ត ស្រុក ក្រុង ខណ្ឌ រដ្ឋបាលឃុំ/សង្កាត់ ត្រូវ ចាត់តាំងកម្លាំងគ្រប់គ្រង ឃ្លាំមើល និងធ្វើការណែនាំការអនុវត្តឱ្យ បានខ្ជាប់ខ្ជួននូវវិធានការការពារការចម្លងជំងឺកូវីដ-១៩ ព្រមទាំងជំរុញលើកទឹកចិត្តប្រជាជនក្នុងដែនសមត្ថកិច្ចទទួល ខុសត្រូវរបស់ខ្លួន ឱ្យស្របតាមរបត់នៃការរស់នៅធម្មតា តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩ ដោយ ប្រកាន់យកនូវការអនុវត្ត អនាម័យដៃស្អាត (លាងដៃឱ្យញឹកញាប់) ពាក់ម៉ាស (ក្នុងករណីចាំបាច់) ប្រើក្រម៉ា ឬក្រដាសជូតមាត់ ខ្ទប់មាត់ពេលមានក្អក កណ្តាស់ បន្តអនុវត្តគម្លាតសុវត្ថិភាពសង្គម និងសុវត្ថិភាពបុគ្គលលើសពីមួយម៉ែត្រកន្លះជាចាំបាច់។
– មិនត្រូវប្រមូលផ្តុំគ្នាច្រើន ឬបង្កសភាពកុះករ ចៀសវាងការធ្វើដំណើរទៅកន្លែងដែលមានមនុស្សច្រើនពេក ហើយត្រូវប្រើ
ប្រាស់ម៉ាសជាប់ជានិច្ចរាល់ពេលធ្វើដំណើរ ។
– ម្ចាស់អាហារដ្ឋាន ភោជនីយដ្ឋាន សណ្ឋាគារ ឬផ្ទះសំណាក់ ព្រមទាំងកន្លែងកម្សាន្តនានា ត្រូវអនុវត្តវិធានការការពារតាមការ ណែនាំរបស់ក្រសួងសុខាភិបាល ដែលបានផ្សព្វផ្សាយជារឿយៗ និងត្រូវធានាថាកន្លែងរបស់ខ្លួនមិនមែនជាទីតាំងបង្កឡើងនូវ ការចម្លងវីរុសកូវីដ-១៩ ឡើយ ។
– រាយការណ៍មកក្រសួងសុខាភិបាលឲ្យបានជាប់ជាប្រចាំនូវរាល់ករណីសង្ស័យ ឬរកឃើញភាពអសកម្មណាមួយដែល អាចជាមូលហេតុនៃការចម្លងវីរុសកូវីដ-១៩ ។
– ត្រូវបន្តអប់រំសុខភាព និងវិធានការ បង្ការការចម្លងវីរុសកូវីដ-១៩ ដល់បងប្អូនប្រជាពលរដ្ឋនៅតាមភូមិ ឃុំ ស្រុក ខេត្ត ក្នុងដែនសមត្ថកិច្ចរបស់ខ្លួនឱ្យបានទូលំទូលាយ និងជាប់ជាប្រចាំ ។
ជាមួយគ្នានោះដែរ ក្រសួងសុខាភិបាល សូមធ្វើការណែនាំដល់បងប្អូនប្រជាពលរដ្ឋទាំងអស់ឱ្យ ផ្អាក ឬពន្យារការធ្វើ
ដំណើរទៅប្រទេសវៀតណាម ជាពិសេសទៅតំបន់ដែលមានការរាតត្បាតនូវជំងឺកូវីដ-១៩នេះ បើមិនចាំបាច់ និងសូមអនុវត្ត តាមសេចក្តីណែនាំរបស់រាជរដ្ឋាភិបាល និងវិធានការណែនាំរបស់ក្រសួងសុខាភិបាលនានា ដែលបានដាក់ចេញដើម្បី បង្ការការឆ្លងជំងឺកូវី៥-១៩នេះ។ ប្រសិនបើមានបញ្ហាសុខភាព ឬចម្ងល់ សុំទាក់ទងទៅលេខទូរស័ព្ទទាន់ហេតុការណ៍ ១១៥៕ ដោយ៖កូឡាប
