នេះជាហេតុការណ៍ដ៏ស្លុតរន្ធត់បំផុតមួយ នៅពេលដែលសាកសពក្មេងប្រុសជំទង់ម្នាក់ ត្រូវបានរកឃើញនៅក្នុងពោះសត្វក្រពើមួយក្បាល ដែលបានអូសចូលទៅក្នុងទឹកទន្លេ ខណៈរូបគេកំពុងដើររើសខ្យងនៅតាមព្រៃដៃទន្លេមួយកន្លែង នៅក្នុងប្រទេសម៉ាឡេស៊ី កាលពីថ្ងៃទី២៦ ខែកក្កដា ឆ្នាំ២០២០។
ក្មេងប្រុសរងគ្រោះមានឈ្មោះ Ricky Ganya អាយុ ១៤ ឆ្នាំ ត្រូវបានដឹងថា បានបាត់ខ្លួនអស់រយៈពេល ៦ បន្ទាប់ពីត្រូវបានសត្វក្រពើចាប់អូសទៅក្នុងទន្លេ ខណៈរូបគេកំពុងដើររើសខ្យងជាមួយមីង និងមិត្តភក្តិរបស់គេពីរនាក់ទៀត ស្ថិតនៅតំបន់ Batang រដ្ឋ Sarawak។
បើតាមមីងរបស់ជនរងគ្រោះ នៅថ្ងៃកើតហេតុនោះ រូបគាត់ពិតជាស្លុតរន្ធត់យ៉ាងខ្លាំងខណៈឃើញក្មួយប្រុសរបស់គាត់ ស្រាប់តែត្រូវបានសត្វក្រពើអូសចូលទៅក្នុងទន្លេយ៉ាងលឿន ប៉ុន្តែ ដោយពុំដឹងធ្វើយ៉ាងម៉េចគាត់ក៏ប្រញាប់រត់មករាយការណ៍ព័ត៌មាននេះដល់អ្នកភូមិ និងបន្ទាប់មក ហៅប៉ូលិសឲ្យជួយ។
ក្រុមស្វែងរក និងសង្គ្រោះ មកពីស្រុក Tanjung Manis បានប្រាប់ឲ្យដឹងថា ពួកគេបានបើកប្រតិបត្តិការស្វែងរកឃើញសត្វក្រពើនោះ ចម្ងាយប្រហែល ៣ គីឡូ ពីកន្លែងកើតហេតុ នៅវេលាម៉ោង ៩ និង ១៥ នាទី ព្រឹកថ្ងៃទី៣១ ខែកក្កដា ឆ្នាំ២០២០។ បន្ទាប់មកបានអូសវាឡើងគោក រួចសម្រេចធ្វើការវះពោះវា និងរកឃើញបំណែកសាកសពក្មេងប្រុសរងគ្រោះដែលបាត់ខ្លួនពិតប្រាកដ។
នេះជាព័ត៌មានក្រើនរំលឹកមួយ ដែលប្រជានេសាទទាំងអស់គ្នា ត្រូវតែមានការប្រុងប្រយ័ត្នសុវត្ថិភាពខ្ពស់ ខណៈចេញទៅរកនៅតាមតំបន់មាត់បឹង ដងស្ទឹងឬ ដៃទន្លេ ព្រោះថាសត្វកាចសាហាវដូចជាក្រពើនេះជាដើម នឹងអាចវាយប្រហារយើងបានគ្រប់ពេល ដោយមិនឲ្យយើងដឹងជាមុនឡើយ៕ ដោយ៖ លឹម ហុង