នេះជាខណៈពេលដ៏ស្លុតរន្ធត់ខ្លាំងណាស់ នៅពេលដែលសត្វឆ្កែកំណាចមួយក្បាលធំ (Pitball) បានរត់ចេញពីផ្ទះ និងចាប់ផ្តើមវាយប្រហារមកលើស្ត្រីម្នាក់ ដែលកំពុងដើរតាមផ្លូវសុខៗ យ៉ាងសាហាវ ឃើញហើយស្ទើរស្លុតបេះដូងតែម្តង។
តាមរយៈកាមេរ៉ាសុវត្ថិភាព បានបង្ហាញឲ្យឃើញស្ត្រីរងគ្រោះឈ្មោះ Kristina បានកំពុងដើរតែម្នាក់ឯង នៅតាមផ្លូវមួយកន្លែង នៅក្នុងតំបន់ Taman Tanjung Minyak Perdana ទីក្រុង Melaka (ម៉ាឡេស៊ី) នៅពេលនោះ ស្រាប់តែឆ្កែក្បាលធំ១ក្បាល បានរត់ចេញពីទ្វារបងផ្ទះម្ចាស់របស់វា រួចចាប់ផ្តើមវាយប្រហារមកលើរូបនាងយ៉ាងសន្ធាប់តែម្តង។ បើទោះជាមានរថយន្ត១គ្រឿងបានបើកឆ្លងកាត់ឃើញក៏ដោយ តែរថយន្តនោះគ្រាន់តែបានឈប់បន្តិច ហើយក៏បានបើកចេញទៅ ដោយពុំមានចិត្តជួយសង្គ្រោះនាងនោះទេ។
ទោះយ៉ាងណា សំណាងល្អហើយ ដែលស្ត្រីរងគ្រោះត្រូវបានបុរសម្នាក់ផ្ទះនៅទល់មុខមានទឹកចិត្តល្អ បានបើករថយន្តរបស់គាត់ចេញពីក្នុងផ្ទះ ហើយបើកចូលបំបែក និងសូម្បីដេញបំបុកវាបំណងឲ្យងាប់ទៀតផង។ ហើយនៅទីបំផុត សត្វឆ្កែនេះក៏បានរត់ចូលទៅក្នុងផ្ទះម្ចាស់របស់វាវិញ ខណៈស្ត្រីរងគ្រោះក៏បានរត់ចូលទៅក្នុងផ្ទះរបស់គាត់។
ជាលទ្ធផល ស្ត្រីរងគ្រោះបានរងរបួសដៃ និងកជើង យ៉ាងធ្ងន់ធ្ងរ និងបច្ចុប្បន្ន កំពុងសម្រាកព្យាបាលនៅមន្ទីរពេទ្យ Hospital Besar និងបន្សល់ទុកនូវភាពតក់ស្លុតដោយសារឧប្បទ្ទវហេតុនេះផងដែរ។
យោងតាម China Press ម្ចាស់ឆ្កែបង្ក ត្រូវបានឃាត់ខ្លួន និងប្រឈមបទចោទប្រកាន់ក្រោមមាត្រា ២៨៩ នៃក្រមព្រហ្មទណ្ឌម៉ាឡេស៊ី ដែលអាចដាក់ទោសពួកគេជាប់ពន្ធនាគារអតិបរមា ៦ ខែ និងពិន័យជាប្រាក់ចំនួន RM2,000 (ស្មើនឹង ៤៧១ ដុល្លារ) ឬ ទាំងពីរ សម្រាប់ការធ្វេសប្រហែសទាក់ទងនឹងសត្វដែលស្ថិតក្រោមការមើលថែរបស់ពួកគេ ដែលធ្វើឲ្យអ្នកដទៃរងរបួស។ ចំណែកសត្វឆ្កែបង្ក ត្រូវបានអាជ្ញាធរនាំយកទៅដាក់ក្នុងកន្លែងដាច់ដោយឡែករយៈពេល ២ សប្តាហ៍ ដើម្បីពិនិត្យមើលថាតើវាបង្ហាញរោគសញ្ញានៃជំងឺឆ្កែឆ្កួតដែរឬទេ៕
ប្រែសម្រួល៖ លឹម ហុង (ប្រភព៖ worldofbuzz)