ខេត្តស្វាយរៀង៖ ករណីបុរសម្នាក់បានស្លាប់ ក្រោយពីបានលេបថ្នាំដែលវេជ្ជបណ្ឌិត បានផ្សំឱ្យគាត់យកទៅលេបនៅផ្ទះចំនួន៧ថ្ងៃ ក្រោយពេលដែលបុរសរងគ្រោះ បានទៅពិនិត្យរោគវិនិច្ឆ័យឃើញថា ជនរងគ្រោះមានជំងឺរលាកក្រពះ ហើយបន្ទាប់ពីចុះស្រាវជ្រាវ ឃើញថា ក្រុមគ្រួសារនៃជនរងគ្រោះ បានសម្របសម្រួលបញ្ចប់រឿងជាមួយវេជ្ជបណ្ឌិត ហ៊រ សុវណ្ណា ដោយមិនប្តឹងផ្តល់រករឿងតទៅទៀតទេ ដោយក្រុមគ្រួសាររបស់ជនរងគ្រោះ យល់ឃើញថា នេះជាកំហុសដោយអចេតនា។
ក្រោយចុះធ្វើការស្រាវជាវយ៉ាងល្អិតល្អន់ ពីសំណាក់សមត្ថកិច្ច និងមន្ត្រីជំនាញ បានឱ្យដឹងថា កាលពីថ្ងៃទី៣០ ខែកក្កដា ឆ្នាំ២០២០ វេលម៉ោង៨និង២០នាទីមានឈ្មោះ ផេង សារ៉ាន់ ភេទប្រុស ឣាយុ៤២ឆ្នាំ ជនជាតិខ្មែរ មានទីលំនៅភូមិខ្នុរខាងត្បូង ឃុំស្វាយឣង្គ ស្រុកស្វាយជ្រំ ខេត្តស្វាយរៀង បានទៅពិនិត្យជំងឺនៅបន្ទប់ពិនិត្យ និងព្យាបាលជំងឺទូទៅ របស់វេជ្ជបណ្ឌិតឈ្មោះ ហ៊រ សុវណ្ណា ដែលមានទីតាំងស្ថិតក្នុងភូមិស្វាយ សង្កាត់ចេក ក្រុងស្វាយរៀង ខេត្តស្វាយរៀង។
ប្រភពខាងលើបានបន្តថា ពេលនោះវេជ្ជបណ្ឌិតឈ្មោះ ហ៊រ សុវណ្ណា ក៏បានពិគ្រោះជាមួយអ្នកជំងឺ និងបានដឹងថា គាត់មានជំងឺឈឺចុកពោះ មានរយៈ៧ថ្ងៃមកហើយ ថែមទាំងបានសម្រាកព្យាបាលនៅផ្ទះដោយព្យូរស៊ឺរ៉ូមអស់ចំនួន២កំប្លោកទៀតផង តែពុំជាសះស្បើយឡើយ។ បន្ទាប់ពីពិគ្រោះយោបល់រួច វេជ្ជបណ្ឌិត ក៏បាននាំអ្នកជំងឺទៅឆ្លុះអេកូ ពិនិត្យឃើញថា ឣ្នកជំងឺមានជំងឺរលាកក្រពះ ខណៈនោះវេជ្ជបណ្ឌិត ក៏បានសួរនាំអ្នកជំងឺថាតើគាត់មានប្រតិកម្មជាមួយថ្នាំលេបអ្វីដែឬទេ? គាត់ឆ្លើយថា គាត់ពុំមានប្រតិកម្មជាមួយថ្នាំលេបទេ។ បន្ទាប់ពីសួរនាំរួចវេជ្ជបណ្ឌិតក៏បានចេញថ្នាំទៅឲ្យអ្នកជំងឺលេបនៅផ្ទះចំនួន៧ថ្ងៃ ក្រោយពីទទួលបានថ្នាំលេបរួចហើយអ្នកជំងឺក៏ត្រឡប់ទៅផ្ទះវិញ លុះដល់វេលាម៉ោង៩ អ្នកជំងឺក៏បានយកថ្នាំដែលវេជ្ជបណ្ឌិត ចេញឲ្យនោះមកលេប បន្ទាប់ពីលេបរួច រហូតដល់វេលាម៉ោង១១ជាង ទើបអ្នកជំងឺមានអាការក្រញ៉ង់ដៃក្រញ៉ង់ជើងស្លាប់តែម្តង។
ក្រោយពីមានហេតុការណ៍នេះកើតឡើង ក្រុមគ្រួសារនៃជនរងគ្រោះ បានសម្របសម្រួលបញ្ចប់រឿងជាមួយវេជ្ជបណ្ឌិត ហ៊រ សុវណ្ណា ចប់សព្វគ្រប់ ដោយមិនប្តឹងផ្តល់រករឿងតទៅទៀតទេ ដោយក្រុមគ្រួសាររបស់ជនរងគ្រោះ យល់ឃើញថា នេះជាកំហុសដោយអចេតនា៕ដោយ៖ វ៉ៃកូ
