ខេត្តកែប៖ ដើម្បីលើកកម្ពស់ខេត្តកែប អភិបាលនៃគណៈអភិបាលខេត្តបានជំរុញមន្ទីរពាក់ព័ន្ធរួមគ្នាបង្កើតផលិតផលកសិកម្ម ដើម្បីផ្គត់ផ្គង់ទីផ្សារក្នុងខេត្ត។
ឯកឧត្តម សោម ពិសិដ្ឋ អភិបាលខេត្តកែប បានឱ្យដឹងថា សព្វថ្ងៃនេះ តម្រូវការសាច់មាន់នៅតាមបណ្តោយឆ្នេរកែប គិតក្នុងមួយថ្ងៃ មានចំនួនពី ១៥០ ទៅ ១៦០គីឡូក្រាមយ៉ាងតិច ហើយបើសរុបជាខែ ក្នុងមួយខែៗ មានចំនួនជាង ៤៥០០គីឡូ ដែលភាគច្រើនទិញមកពីខេត្តកំពត។
ឯកឧត្តម បានថ្លែងថា តាំងពីដើមមក មាន់អាំង និងក្តាមសេះ ជាម្ហូបប្រចាំតំបន់របស់ខេត្តកែប អ្នកណាក៏ដឹង អ្នកណាក៏ទទួលស្គាល់ពីរស់ជាតិថាឆ្ងាញ់ ហេតុដូចនេះ ការផ្តូចផ្តើមឱ្យមានក្រុមផលិតកម្មកសិកម្មនេះឡើង គឺពិតជាអាចជួយលើកស្ទួយវិស័យម្ហូបអាហារក្នុងស្រុក និងការបន្ថយការនាំចូលផងដែរ។
ម្យ៉ាងទៀត ការកាត់បន្ថយបន្លែសាច់ ពីខាងក្រៅ ក៏ជំរុញឱ្យខេត្តកែប កាន់តែទាក់ទាញទេសចរណ៍ក្នុងស្រុកបន្ថែមទៀត ឯកឧត្តមអភិបាល បានជំរុញមន្ទីរពាក់ព័ន្ធរួមគ្នាបង្កើតផលិតផលកសិកម្ម ដើម្បីផ្គត់ផ្គង់ទីផ្សារក្នុងខេត្ត។
ឯកឧត្តម សោម ពិសិដ្ឋ បានបង្កើតគំនិតផ្តូចផ្តើម ដោយជំរុញឱ្យមន្ទីរពាក់ព័ន្ធក្នុងខេត្តដូចជា មន្ទីរកសិកម្ម មន្ទីរពាណិជ្ជកម្ម មន្ទីរឧស្សាហកម្មជាដើម រួមគ្នា ចងក្រងជាក្រុមផលិត ដើម្បីបង្កើតផលិតផលកសិកម្មផ្សេងៗ ដូចជាការចិញ្ជឹមសត្វ និងដាំបន្លែ សម្រាប់ផ្គត់ផ្គង់ទីផ្សារក្នុងស្រុក ជាជាងទិញទំនិញទាំងនោះពីប្រទេសជិតខាង។
គំនិតផ្តូចផ្តើមនេះ ជាផែនការបង្កើនប្រាក់ចំណូលសម្រាប់ប្រជាពលរដ្ឋ ដើម្បីទប់ស្កាត់ការចំណាយក្នុងសម័យកូវីដនេះ ដូចនេះប្រជាពលរដ្ឋត្រូវឧស្សាហ៍ព្យាយាមបង្កើនការងារដាំដុះ ចំណែករឿងទីផ្សារថ្នាក់ខេត្តនឹងធានាទិញ ក្នុងតម្លៃសមរម្យ។
គួរបញ្ជាក់ថា អាជ្ញាធរខេត្តបានបើកយុទ្ធនាការចាក់ថ្នាំការពារជំងឺគោក្របីជូនប្រជាកសិករ នៅភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ដើម្បីចួលរួមលើកស្ទួយវិស័យកសិកម្មជាពិសេសរួមគ្នាបង្កើតផលិតផលកសិកម្ម ដើម្បីផ្គត់ផ្គង់ទីផ្សារក្នុងស្រុក៕
ដោយ៖CEN