ភ្ញៀវមួយក្រុមពិតជាមានការភ្ញាក់ផ្អើល និងស្លុតរន្ធត់បុកពោះយ៉ាងខ្លាំង នៅពេលបានរកឃើញម្ជុលដ៏ធំមួយ នៅក្នុងសាច់ជ្រូក ខណៈពេលដែលពួកគេកំពុងញ៉ាំអាហារនៅហាងសាច់អាំងមួយកន្លែងនៅក្នុងប្រទេសថៃ។
ប៉ុន្តែ អ្វីដែលហួសចិត្តបំផុតនោះ គឺពួកគេបានជូនដំណឹងដ៏ញាក់សាច់នេះ ដល់បុគ្គលិកហាង អំពីការរកឃើញវត្ថុរឹងដ៏មុតស្រួចនេះ បែរជាម្ចាស់ហាងពុំត្រឹមតែពុំធ្វើការសុំទោសអតិថិជនខ្លួននោះទេ តែថែមទាំងហៅពួកគេឲ្យត្រឡប់មកបង់ប្រាក់ពិន័យទៀត នៅពេលពួកគេងើបដើរចេញពីតុអាហារនៅសេសសល់។
ហេតុនេះ ស្ត្រីម្នាក់ក្នុងចំណោមមិត្តភក្តិរបស់នាង បានសម្រេចបង្ហោះពីហេតុការណ៍នេះដែលបានកើតឡើងកាលពីថ្ងៃទី៣១ ខែកក្កដា ឆ្នាំ២០២០ នៅលើបណ្តាញសង្គមហ្វេសប៊ុក ដោយបានបញ្ចេញឲ្យដឹងថា ម្ជុលនេះដែលមើលទៅដូចជាម្ជុលសម្រាប់ចាក់សើរៗស្បែកដ៏ធំមួយដែលប្រើដោយគ្រូពេទ្យអ៊ីចឹង។
ក្រោយជួបហេតុការណ៍ដ៏មិននឹកស្មាននេះ ពួកនាងក៏បាត់បង់ចំណង់លែងឃ្លានអាហារសាច់ជ្រូកតែម្តង ប៉ុន្តែ ផ្ទុយទៅវិញ ម្ចាស់ហាងបែរជាពិន័យពួកនាង សម្រាប់ការចាកចេញ និងទុកអាហារចោល ដែលធ្វើឲ្យពួកនាងពិតជាហួសចិត្តខ្លាំងបំផុត៕
ប្រែសម្រួល៖ លឹម ហុង (ប្រភព៖ Sanook)
