សារព័ត៌មានប្រចាំថ្ងៃភាសាថៃមួយ បានរាយការណ៍កាលថ្ងៃទី ២៩ ខែកក្កដា ឆ្នាំ ២០២០ ឲ្យដឹងថា ជនជាតិថៃមួយចំនួន នៅតែបន្តវិស្សមកាលយូររបស់ពួកគេ នៅតាមតំបន់ឆ្នេរសមុទ្រ។ ហេតុនេះ សម្រាប់អ្នកដែលចូលចិត្តហែលទឹកនៅក្នុងសមុទ្រ នោះគួរមានការប្រុងប្រយ័ត្ន ពោលគឺគួរតែនៅឲ្យឆ្ងាយពីជំពុលទឹក ឬខ្ញាសមុទ្រប្រអប់ (box jellyfish) ។
នៅក្នុងបទសម្ភាសន៍ជាមួយកាសែត នាយកផ្នែកវេជ្ជសាស្ត្រស្បែកលោក Mingkwan Wichaidit បាននិយាយថា ពិសរបស់ពពួកខ្ញាសមុទ្រប្រអប់នេះ គឺមានគ្រោះថ្នាក់បំផុតនៅលើពិភពលោក ដែលមានជាតិពុលវាយប្រហារបេះដូង, ចលនាឈាម, ប្រព័ន្ធសរសៃប្រសាទ និងកោសិកាស្បែក។
លោកវេជ្ជបណ្ឌិត Mingkwan ក៏បានបញ្ជាក់ថា ជនរងគ្រោះ អាចចុះចាញ់នឹងពិសក្នុងរយៈពេល ២០ នាទី។ ហេតុនេះ ដើម្បីឱ្យមានសុវត្ថិភាព ចូរអ្នករាល់គ្នាកុំហែលទឹកសមុទ្រដែលមានខ្ញាសមុទ្រប្រអប់ និងត្រូវស្លៀកសម្លៀកបំពាក់កនៅក្នុងទឹករាក់ ឬឧបករណ៍មុជទឹក ក៏អាចជួយបានដែរ។
គួរបញ្ជាក់ឲ្យដឹងផងដែរថា កាលពីអំឡុងខែសីហា ឆ្នាំ២០១៥ ស្ត្រីជាភ្ញៀវទេសចរណ៍ម្នាក់ ត្រូវបានប្រកាសស្លាប់ដោយសារខ្ញាសមុទ្រនេះ បន្ទាប់ពីស្ត្រីនោះបានហែលទឹកជាមួយមិត្តភក្តិ នៅក្នុងទីកន្លែងងងិត វេលាម៉ោង ៨ និង១៥ នាទីយប់ និងបានស្លាប់នៅម៉ោង ៩ និង៣០នាទីយប់ នៅក្នុងមន្ទីរពេទ្យ៕ ដោយ៖ លឹម ហុង