ស្វាយរៀង៖ ជនល្មើស២នាក់ជាអ្នករត់តាក់ស៊ីខិលខូច ដែលត្រូវបានចោទប្រកាន់ជាប់ពាក់ព័ន្ធ ក្នុងករណីធ្វើសកម្មភាពចាប់រំលោភសម្លាប់នារីបម្រើកាស៊ីណូម្នាក់នៅក្រុងបាវិត កាលពីឆ្នាំ២០១៧ បានកំពុងជាប់ឃុំនៅពន្ធនាគារខេត្តស្វាយរៀង ក្រោមការផ្ដន្ទាទោសពីចៅក្រមអមសាលាដំបូងខេត្តស្វាយរៀងដាក់ពន្ធនាគារអស់មួយជីវិត។
តែទោះយ៉ាងណា ជនល្មើសទាំងពីរត្រូវបានដឹងថា មិនសុខចិត្តនោះទេ ដោយបានប្តឹងឡើងទៅឧទ្ធរណ៍ និងសូម្បីបន្តប្ដឹងទៅតុលាការកំពូលទៀតផង ដែលធ្វើឲ្យសំណុំរឿងនេះ នៅមិនទាន់ទទួលបានភាពយុត្តិធម៌សម្រាប់ជនរងគ្រោះ ក៏ដូចជាគ្រួសារ ក្នុងរយៈពេល៣ឆ្នាំមកនេះ។ ដោយសារតែបែបនេះ បានធ្វើឲ្យគ្រួសារជនរងគ្រោះត្រូវចំណាយលុយអស់ជាច្រើន សម្រាប់ធ្វើដំណើរឡើងតុលាការជាច្រើនដង និងខាតពេលវេលារកស៊ីទៀតផង។
នេះបើតាមពូនារីរងគ្រោះដែលមានគណនីហ្វេសប៊ុកឈ្មោះ បង រី បានបង្ហោះសារត្អូញត្អែរពីចំណាត់យឺតយ៉ាវរបស់តុលាការដែលមានខ្លឹមសារយ៉ាងដូច្នេះថា៖ «ថ្ងៃនេះថ្ងៃទី 2 ខែ 8 ឆ្នាំ 2020 ថ្ងៃគម្រប់ខួប 3 ឆ្នាំរបស់ក្មួយស្រីខ្ញុំ ដែលត្រូវបានអ្នករត់តាក់ស៊ីរំលោភសម្លាប់យ៉ាងព្រៃផ្សៃនៅខេត្តស្វាយរៀង ថ្ងៃទី 2 ខែ សីហា ឆ្នាំ 2017 អស់រយៈពេលបីឆ្នាំហើយ ដែលគ្រួសារខ្ញុំរង់ចាំទទួលយុត្តិធម៌ តើពេលណាទៅទើបផ្ដល់យុត្តិធម៌ពិតប្រាកដដល់គ្រួសារខ្ញុំ។
គ្រួសារខ្ញុំត្រូវឡើងតុលាការខេត្តស្វាយរៀងបីដង ក្រោយមកទៀតឡើងសាលាឧទ្ធរណ៍នៅភ្នំពេញពីរដងទៀត ក្រុមគ្រួសារខ្ញុំត្រូវចំណាយលុយអស់ជាច្រើន សម្រាប់ធ្វើដំណើរឡើងតុលាការជាច្រើនដង និងខាតពេលវេលារកស៊ីច្រើនណាស់។
ក្នុងរយៈពេលបីឆ្នាំនេះការឈឺចាប់នៅតែកើនឡើងដោយសារតែយុត្តិធម៌នៅមិនទាន់ទទួលបាន ខ្ញុំបានបង្ហោះសារនេះតាមប្រព័ន្ធហ្វេសប៊ុកជាច្រើនដង តែដូចគ្មានថ្នាក់ដឹកនាំណាមើលឃើញសោះ នេះហើយដែលធ្វើឲ្យគ្រួសារខ្ញុំមានការឈឺចាប់កាន់តែខ្លាំងទៅៗ សូមថ្នាក់ដឹកនាំ និងក្រសួងយុត្តិធម៌ ជួយរកយុត្តិធម៌និងផ្ដល់យុត្តិធម៌ពិតប្រាកដដល់គ្រួសារខ្ញុំផង សូមបងប្អូនជួយ ស៊ែរផង សូមអរគុណ។»៕ ដោយ៖ លឹម ហុង