បង្កងដ៏ចម្លែកមួយត្រូវបាននាំយកទៅសួនសត្វ បន្ទាប់ពីបុគ្គលិកនៅភោជនីយដ្ឋានមួយកន្លែង នៅសហរដ្ឋអាមេរិក បានកត់សម្គាល់ឃើញថា បង្កងនេះមានសម្បកខាងក្រៅខុសពីបង្កងដទៃ។
យោងតាម USA Today សត្វបង្កងដ៏មានសំណាងនេះ បានរួចផុតពីយកមកច្នៃធ្វើជាម្ហូប នៅភោជនីយដ្ឋាន Ohio Red Lobster បន្ទាប់ពីបុគ្គលិកចាប់ភ្នែកបានរកឃើញសម្បកបៃតងចម្លែករបស់វា។
សាកលវិទ្យាល័យនៃវិទ្យាស្ថានបង្កង Maine និយាយថា អត្រាចាប់បានបង្កងបៃតងនេះគឺ ១ ក្នុង ២០០ លាន។ ពណ៌បៃតងនៃសម្បករបស់វា គឺជាលទ្ធផលនៃការប្រែប្រួលហ្សែន។
ភោជនីយដ្ឋានបានសម្រេចចិត្តមិនចម្អិនវា និងទាក់ទងសួនសត្វ Akron ដើម្បីបរិច្ចាគបង្កងដ៏កម្រមួយនេះ។ លោកស្រី Elena Bell អ្នកនាំពាក្យសួនសត្វបាននិយាយថា អង្គការអភិរក្សអាហារសមុទ្រនៅ Monterey Bay Aquarium ក្នុងរដ្ឋកាលីហ្វ័រញ៉ា បានជួយសំរបសំរួលការដឹកជញ្ជូន។
បង្កងត្រូវបានដាក់នៅក្នុងធុងដាច់ដោយឡែក នៅក្នុងសួនសត្វ មុនពេលជួបមិត្តភក្តិថ្មី។ ទោះយ៉ាងណា ដោយសារតែមានការរឹតត្បិតនៅក្នុង Covid-19 នោះទីកន្លែងសម្រាប់ដាក់បង្កងបៃតងនេះត្រូវបានបិទជាបណ្តោះអាសន្ន សម្រាប់ភ្ញៀវទេសចរ៕ ដោយ៖ លឹមហុង