តាកែវ៖ផ្ទៃអាងស្តុកទឹកស្អាត «បឹងតាកែវ»សម្រាប់បម្រើផលប្រយោជន៍ដល់ប្រជាពលរដ្ឋជិត៤ម៉ឺនគ្រួសារ រស់នៅក្រុងដូនកែវ កាន់តែរួមតូចជាបន្តបន្ទប់ខុសប្លែកពីធម្មតា ក្រោយពីមានការកាយដីស្តាបឹង យកមកចាក់ដីទន្ទ្រាន និងបោះបង្គោលរំលោភយកផ្ទៃបឹងតាកែវ «អាងស្តុបទឹកស្អាត» ធ្វើជាកម្មសិទ្ធិផ្ទាល់ខ្លួន យ៉ាងអាណាធិបតេយ្យ ដោយសារតែមានផ្លូវក្រវ៉ាត់អាងស្តុបទឹក ហើយនៅមិនទាន់មានការកំណត់ឲ្យច្បាស់លាស់ ពីមន្ទីរជំនាញធនធានទឹកនិងឧតុនិយមខេត្តថា ចេញពីមាត់ផ្លូវខ្នងទំនប់ក្រវ៉ាត់អាង តើមានប៉ុន្មានម៉ែត្រជាចំណីមាត់អាងនៅឡើយទេ ខណៈដែរបច្ចុប្បន្ន ការចាក់ដីទន្ទ្រាន គឺមានរយៈចម្ងាយឆ្ងាយគួរសមពីផ្លូវក្រវ៉ាត់អាងស្តុកទឹកបឹងតាកែវនេះ ធ្វើអោយប្រជាពលរដ្ឋរស់នៅក្នុងក្រុងដូនកែវ នាំគ្នានិយាយថា ហេតុអ្វីអ្នកមានលុយមានអំណាចមានសិទ្ធិ ធ្វើអ្វីស្រេចតែអំពើចិត្តនៅក្នុងសម័យប្រទេសជាតិ កំពុងមានសុខសន្តិភាពបែបនេះ ។
ប្រជាពលរដ្ឋរស់នៅក្នុងសង្កាត់បារាយណ៍សូមមិនបញ្ចេញឈ្មោះ បាននិយាយថា ពលរដ្ឋរស់នៅទីនេះ គឺសុទ្ធតែដឹងច្បាស់ថា ដីដែលចាក់ចូលនោះពីមុន គឺជាផ្ទៃកណ្តាលបឹងតាកែវ ហើយក៏ជាប្រភពជម្រកត្រីពង និងជាប្រភពទឹកដ៏សំខាន់សម្រាប់ប្រជាពលរដ្ឋរស់នៅ ក្នុងក្រុងដូនកែវ ប្រើប្រាស់ទឹកស្អាត និងធ្វើស្រែប្រាំង ស្រែវស្សាដែលមានផ្ទៃដីរាប់ពាន់ហិតាផងដែរ ។ ក៏ប៉ុន្តែក្នុងពេលបច្ចុប្បន្ននេះ ស្ថានភាពទឹកបឹងកាន់តែរាក់គោក ហើយក៏មានអ្នកមានលុយ មានអំណាចចូលមកចាក់ដីដាំបង្គោល ធ្វើរបងជាបន្តបន្ទាប់ហើយ លោកថាទៅថ្ងៃខាងមុខប្រជាពលរដ្ឋ អាចនឹងជួបគ្រោះធម្មជាតិរាំងស្ងួតខ្វះទឹកប្រើប្រាស់ សាជាថ្មីជាក់ជាមិនខាន ខណៈដែលរាជរដ្ឋាភិបាលធ្លាបបានចេញសារាចរណ៍ណែនាំអោយថែរក្សានឹងស្តុកទឹកទុក និងហាមឃាត់ប្រជាពលរដ្ឋមិនឲ្យធ្វើស្រែចំការបង្កើនរដូវ ដើម្បីទុកទឹកប្រើប្រាស់ តែបែរជាមានអ្នកមានលុយ មានអំណាចអាងខ្នង អាងខ្សែ មកចាក់ដីលុបបឹង លុបអាងស្តុបទឹកដ៏សំខាន់នេះមកធ្វើជាដីកម្មសិទ្ធិរបស់ខ្លួនទៅវិញ ។
ប្រជាពលរដ្ឋខាងលើបានស្នើសុំដល់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជួយពិនិត្យឡើងលើការស្តារបឹងតាកែវ ហើយយកអាច៍ដីនោះមកលុបលើផ្ទៃបឹងដដែល ដើម្បីជួយដល់ប្រជាពលរដ្ឋក្នុងការរក្សាទឹកបានប្រើប្រាស់ និងទុបស្កាត់ចំពោះជនខិលខូចដែលចាក់ដីលុបបឹងទន្ទ្រានយកនេះផង ។
ជុំវិញករណីនេះ ភ្នាក់ងារយើងបានធ្វើការសម្ភាសន៍តាមទូរស័ព្ទជាមួយលោក ប៊ុន ហ៊ួ ប្រធានមន្ទីរធនធានទឹកនិងឧតុនិយមខេត្ត កាលពីព្រឹកថ្ងៃទី ៣១ ខែកក្កដានេះ ដោយលោកបានបញ្ជាក់ថា ករណីចាក់ដីទន្ទ្រានយកផ្ទៃបឹងតាកែវ កំពុងតែក្លាយទៅជាប្រធានបទក្តៅហើយ ក្នុងនោះលោកបានសុំគោលការណ៍ ពីអភិបាលខេត្ត ដើម្បីចុះពិនិត្យនិងកំណត់ព្រំឲ្យបានច្បាស់លាស់ ក្រោយពេលដែលអាជ្ញាធរខេត្តគ្រោងធ្វើផ្លូវទំនប់ក្រវ៉ាត់បឹងតាកែវ តែធ្វើការណាត់ពីរដងមិនបានជួបជាមួយនឹងអាជ្ញាធរក្រុងនោះទេ ហើយលោកបានធ្វើរបាយការណ៍មួយ ទៅកាន់ក្រសួងស្តីពីការចាក់ដីរំលោភចូលផ្ទៃដីបឹងតាកែវ រួចហើយ។
ចំណែកឯលោក កង អាណាន់ អភិបាលក្រុងដូនកែវ បានឲ្យដឹងថា ដីផ្លូវក្រវ៉ាត់បឹងតាកែវនេះ កំពុងមានបញ្ហាខ្លាំងណាស់ ឃើញប្រជាពលរដ្ឋដាក់ពាក្យបណ្តឹងមកអាជ្ញាធរក្រុងដូនកែវ ខណៈដែលពួកគាត់បានលក់បន្តដីអាស្រ័យផល របស់រដ្ឋទៅឲ្យអ្នកផ្សេងបន្ត ដែលនៅក្នុងផែនទីរបស់មន្ទីរជំនាញ គឺទីតាំងទាំងនោះឋិតនៅជាផ្ទៃបឹងតាកែវ ដែលជាអាងស្តុបទឹកសម្រាប់ប្រជាពលរដ្ឋប្រើប្រាស់ ជិត៤ម៉ឺនគ្រួសារនៅក្នុងក្រុងដូនកែវ ហើយកន្លងមកអាជ្ញាធរក្រុង បានធ្វើការចុះហាមឃាត់មួយដង រួចមកហើយ ដោយឲ្យកម្លាំងគណៈបញ្ជាការឯកភាពក្រុងចុះដកបង្គោលថ្មដែលដាំចំនួន ២៥បង្គោលដាំចូលក្នុងផ្ទៃបឹង មករក្សាទុកនៅភូមិបាលក្រុងរួចមកហើយ ក្រោយមករយៈពេល ២សប្តាហ៍ ក៏កើតមានសាជាថ្មីម្តងទៀត លើការចាក់ទន្ទ្រានយកផ្ទៃបឹង និងមានដាំដើមឈើធំៗ គ្រោងធ្វើរបងថ្មនៅលើដីបឹងជាប់និងផ្លូវទំនប់ក្រវ៉ាត់បឹងនេះ លោកបានបញ្ជាឲ្យគណៈបញ្ជាការឯកភាពក្រុងចុះបញ្ឈប់សកម្មភាពនោះភ្លាម ។
ដោយឡែកពាក់ព័ន្ធនឹងករណីនេះដែរ ឯកឧត្តម អ៊ូច ភា អភិបាលខេត្តតាកែវ បានឲ្យដឹងថា លោកនឹងចាត់ឲ្យអាជ្ញាធរក្រុង សហការជាមួយជំនាញមន្ទីរធនធានទឹក ចុះសិក្សាផលប៉ះពាល់នៅដីអាស្រ័យផល របស់ប្រជាពលរដ្ឋនៅជុំវិញផ្ទៃបឹងតាកែវទាំងអស់ ថាមានផលប៉ះពាល់អ្វីខ្លះ បើសិនជាយើងលើកទំនប់ក្រវ៉ាត់បឹងតាកែវ ដែលមានរយៈចម្ងាយ ១៧គីឡូម៉ែត្រ ក្រោយការសិក្សាមិនមានរបាយការណ៍ ដែលធ្វើឲ្យប៉ះពាល់ធំដុំនោះទេ លុះមកដល់ពេលនេះស្រាប់តែកើតរឿងប្តឹងផ្តល់គ្នា និងរឿងចាក់ដីទន្ទ្រានយកផ្ទៃបឹង ជុំវិញរឿងអាចនិងត្រូវពិនិត្យមើលឡើងវិញ ដើម្បីដោះស្រាយបញ្ហាជាមួយនិងប្រជាពលរដ្ឋ ។
សូមបញ្ជាក់ដែរថា បើតាមផែនទីរបស់ភូមិបាលក្រុងដូនកែវ កន្លែងដែលកំពុងចាក់ដីនោះ គឺជាផ្ទៃបឹង ដោយឡែកមន្ទីរជំនាញធនធានទឹក នៅមិនទាន់កំណត់បាននៅទំហំអាងស្តុកទឹក ឲ្យបានពិតប្រាកដនៅឡើយទេ ទើបកើតរឿងចាក់ដីទន្ទ្រានយកបឹងដោយគ្មានខ្លាចញញើតច្បាប់នោះទេ ខណៈដែលពេលថ្មីៗនេះមានអ្នកមាលុយមានអំណាច និងអាជ្ញាធរ ត្រូវបានប្រឈរមុខ នឹងផ្លូវច្បាប់នៅខេត្តបាត់ដំបង លើករណីការទន្ទ្រានកាន់កាប់ដីរបស់រដ្ឋដែរ ។
ប្រជាពលរដ្ឋរស់នៅទីនោះ បាននាំគ្នានិយាយពីមាត់មួយទៅមាត់មួយថា បងអើយទៅឆ្ងល់អី តើប្រជាពលរដ្ឋធម្មតាណា ទៅមានលទ្ធភាពចាក់រំលោភយកដីបឹង បានយ៉ាងស្រួលបែបនេះនោះ ចាក់ដីតែ ៣ ឬ៤ឡាននឹង មេភូមិ មេឃុំគេមកសួរនាំបាត់ទៅហើយ គឺមានតែអ្នកដុល្លារក្រាស់ៗទាំងបាច់ៗ និងអ្នកមានអំណាចទេ ទើបធ្វើបែបនេះបាន ហើយគ្មានមន្ត្រីបម្រើរាស្ត្រណាហ៊ានមកអើតមើលឬសួរនាំនោះទេ ដូច្នេះមានតែអង្គភាពប្រឆាំងអំពើពុករលួយ ចុះពិនិត្យលើសកម្មភាពដែលមិនប្រក្រតីនេះទេទើបដឹងច្បាស់ ៕ដោយ៖តាកែវ
