ភ្នំពេញ៖ ឯកឧត្តម បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានអនុញ្ញាតឲ្យ អគ្គនាយកក្រុមហ៊ុនធានារ៉ាប់រងហ្វតតេ លោក យុគ ចំរើនឬទ្ធិ និងតំណាងប្រធានសមាគមធានារ៉ាប់រងនៅកម្ពុជា ផ្តោតលើការផ្សព្វផ្សាយលក់ផលិតផលធានារ៉ាប់រងសុខភាព ដែលមានឈ្មោះថា « ប័ណ្ណសន្យារ៉ាប់រងជីវិតកូវីដ១៩»។
កិច្ចជំនួបពិភាក្សា ផ្តោតលើការផ្សព្វផ្សាយលក់ផលិតផលធានារ៉ាប់រងសុខភាព ដែលមានឈ្មោះថា « ប័ណ្ណសន្យារ៉ាប់រងជីវិតកូវីដ១៩» ដើម្បីឲ្យការផ្សព្វផ្សាយលើផលិតផលនេះ ឲ្យមានភាពទូលំទូលាយសំដៅសម្រួលដល់អ្នកដំណើរបរទេស ដែលមិនទាន់មាន ប័ណ្ណសន្យារ៉ាប់រងជីវិតកូវីដ១៩។
ឯកឧត្តមរដ្ឋមន្ត្រីបានគាំទ្រ ការផ្សព្វផ្សាយលក់ ប័ណ្ណសន្យារ៉ាបរងជីវិតកូវីដ១៩ ដែលស្របនឹងវិធានការរបស់រាជរដ្ឋាភិបាល ដែលតម្រូវឲ្យអ្នកដំណើរបរទេស មានឯកសារធានារ៉ាប់រងសុខភាពគ្រប់គ្រាន់ក្នុងអំឡុងពេលចូលមក និងស្នាក់នៅក្នុងប្រទេសកម្ពុជា។
លើសពីនេះទៅទៀត ឯកឧត្តម រដ្ឋមន្ត្រី នឹងបន្តផ្សព្វផ្សាយផលិតផលនេះ ដល់បណ្តាក្រុមហ៊ុនអាកាសចរណ៍ ដែលធ្វើប្រតិបត្តិការនៅប្រទេសកម្ពុជា។
អគ្គនាយកក្រុមហ៊ុនធានារ៉ាប់រងហ្វតតេ និងតំណាងប្រធានសមាគមធានារ៉ាប់រងនៅកម្ពុជា បានថ្លែងថា
ប័ណ្ណសន្យារ៉ាបរងជីវិតកូវីដ១៩មានតម្លៃ ៩០ដុល្លារក្នុងរយៈពេល ២០ថ្ងៃនៃការធានា។ លោកថា ក្រុមហ៊ុន ហ្វតតេជាអ្នកនាំដឹកនាំគម្រោងដែលមានក្រុមហ៊ុនធានារ៉ាប់រងប្រមាណ ០៩ទៀត ដែលបានចូលរួមជាមួយ ហ្វតតេ។ លោកថា ប័ណ្ណសន្យារ៉ាបរងជីវិតកូវីដ១៩ ចាប់ផ្តើមដំណើរការជាផ្លូវការតាំងពីចុងខែមុននេះ។ អតិថិជនអាចចូលទៅកាន់គេហទំព័រហ្វតតេ ដើម្បីទទួលបានព័ត៌មានលម្អិត។ លោកនិងក្រុមការងារក៏បាន អំណរគុណដល់ឯកឧត្តម រដ្ឋមន្ត្រីដែលចំណាយពេលវេលាដ៏មានតម្លៃ អនុញ្ញាតចូលជួបសំដែងការគួរសម និងពិភាក្សាការងារ ប្រកបដោយលទ្ធផលផ្លែផ្កា។
ក្រសួងសុខាភិបាល នៅព្រឹកថ្ងៃទី០៣ ខែសីហា ឆ្នាំ២០២០នេះ បានចេញសេចក្ដីប្រកាសព័ត៌មាន ស្ដីពីករណីព្យាបាលជាសះស្បើយអ្នកជំងឺកូវីដ១៩ម្នាក់ និងមិនមានអ្នកឆ្លងថ្មីឡើយ។ បើតាមក្រសួងសុខាភិបាល អ្នកជំងឺម្នាក់ដែលជាសះស្បើយនេះ ជាស្ត្រីជនជាតិខ្មែរអាយុ ៣៨ឆ្នាំ មានអាសយដ្ឋាននៅសង្កាត់បឹងកេងកង៣ ខណ្ឌចំការមន រាជធានីភ្នំពេញ ជាអ្នកធ្វើដំណើរមកពីប្រទេសឥណ្ឌូណេស៊ី តាមជើងហោះហើរមកកម្ពុជា ត្រូវបានព្យាបាលជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ-១៩ ចំនួន០២ដង ត្រូវបានអនុញ្ញាតឱ្យចេញ ពីមណ្ឌលសុខភាពចាក់អង្រែ រាជធានីភ្នំពេញ។
សូមជម្រាបថា គិតត្រឹមម៉ោង ០៧៖០០ព្រឹក ថ្ងៃទី០៣ ខែសីហា ឆ្នាំ២០២០ ស្ថានភាពជំងឺកូវីដ-១៩ នៅកម្ពុជា បានរកឃើញអ្នកជំងឺសរុប២៤០នាក់ (ស្ត្រី ៤៦នាក់ និងបុរស១៩៤នាក់) ក្នុងនោះចំនួនអ្នកព្យាបាលជាសះស្បើយ សរុបទូទាំងប្រទេសមានចំនួន ១៩៧នាក់ (ស្រី ៤៣នាក់ និងបុរស១៥៤នាក់) និងអ្នកសម្រាកព្យាបាលនៅក្នុងមន្ទីរពេទ្យរដ្ឋ មានចំនួនសរុប៤១នាក់ និងអ្នកសម្រាកព្យាបាល នៅបន្ទប់ដោយឡែក ក្នុងស្ថានទូតអាមេរិកប្រចាំកម្ពុជា២នាក់៕
ដោយ៖CEN
