ភ្នំពេញ៖ របាយការណ៍ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្នុងរយៈពេល ៧ខែ ឆ្នាំ២០២០នេះ កម្ពុជា បាននាំចេញផលិតផលកសិកម្មប្រមាណ ២.៦លានតោន ទៅកាន់ទីផ្សារក្រៅប្រទេស។ ផលិតផលកសិកម្មទាំងនោះ រួមមាន អង្ករ បាននាំចេញទៅប្រទេសចិន ចំនួនជាង ១សែនតោន, អឺរ៉ុបជាង ១សែនតោន, អាស៊ាន ជាង ៥ម៉ឺន តោន និងនាំទៅប្រទេសដទៃទៀតជាង ៦ម៉ឺនតោន។
ដោយឡែកដំឡូងមីក្រៀមជាង ១លានតោន និងដំឡូងមីស្រស់ ជាង ៤សែនតោន បាននាំចេញទៅប្រទេសថៃ និង វៀតណាម។ ម្សៅដំឡូងមីជាង ១ម៉ឺនតោន បាននាំចេញទៅឥណ្ឌា, ចិន, បែលហ្សិក, អ៊ីតាលី, ហូឡង់, ប៉ាគីស្ថាន និងសាធារណរដ្ឋឆេក។ កាកសំណល់ដំឡូងមី ជាង ៧ពាន់តោន បាននាំចេញទៅប្រទេសចិន។
បើតាមរបាយការណ៍ដដែលនេះ បានឲ្យដឹងទៀតថា គ្រាប់ស្វាយចន្ទីជិត ២សែន នាំចេញទៅប្រទេសវៀតណាម, ជប៉ុន, រុស្ស៊ី, ចិន, ហុងកុង, ថៃ, បារាំង និងកូរ៉េ។ គ្រាប់ពោតជាង ១សែនតោន នាំចេញទៅថៃ, កូរ៉េ និងតៃវ៉ាន់។ គ្រាប់សណ្ដែកបាយជាង ៣ពាន់តោន នាំចេញទៅតៃវ៉ាន និងវៀតណាម។ ចេកស្រស់ជាង ១សែនតោន នាំចេញទៅចិន, វៀតណាម និងជប៉ុន។ ផ្លែក្រូចថ្លុងជាង ១ម៉ឺនតោន នាំចេញទៅប្រទេសថៃ។ ផ្លែស្វាយជាង ៤ម៉ឺនតោន នាំចេញទៅថៃ, វៀតណាម, បារាំង, រុស្ស៊ី, កូរ៉េ និងហុងកុង។ ដំណាប់ស្វាយជាង ៤ពាន់តោន នាំចេញទៅចិន, ជប៉ុន, ថៃ, កូរ៉េ, វៀតណាម និងហ្វីលីពីន។ ដូងប្រេងជាង ៣ម៉ឺនតោន នាំចេញទៅម៉ាឡេស៊ី, ឥណ្ឌា, ស្រីលង្កា, ចិន, ស្វីស និងប៉ាគី ស្ថាន។ ម្រេចជាង ៣ពាន់តោន នាំចេញទៅជប៉ុន, ប៊ែលហ្សិក, ហូឡង់, បារាំង, អាល្លឺម៉ង់, ស្វីស, រៀតណាម, អាមេរិច, រុស្ស៊ី, អង់គ្លេស, ឥណ្ឌា, បេឡារូស, កូរ៉េ, ឆេក, ណូវែហ្សែឡង់, អូស្ត្រាលី និងថៃ។
ចំណែកឯ ថ្នាំជក់ជាង ៤ពាន់តោន នាំចេញទៅវៀតណាម, ហ្គ្រិច, បែលហ្សិក, ឥណ្ឌូណេស៊ី និងហុងហ្គារី។ បន្លែជាង ៧៣,៨៥តោន នាំចេញទៅបារាំង, ឆេក, ហូឡង់។ ដំឡូងជ្វាជាង ២ពាន់តោន, ម្ទេចស្រស់ជាង ៤ម៉ឺនតោន, ម្ទេស ក្រៀមជាង ១ពាន់តោន នាំចេញទៅប្រទេសថៃ និងផលិតផលផ្សេងៗ នាំចេញបានជាង ៤ម៉ឺនតោន៕
ដោយ៖CEN
