ភ្នំពេញ៖ ក្រសួងសុខាភិបាល និងទីប្រឹក្សាសេដ្ឋកិច្ច និងពាណិជ្ជកម្មនៃស្ថានទូតចិន បានចុះហត្ថលេខា លើកិច្ចព្រមព្រៀងអនុវត្តគម្រោងជំនួយគ្លីនិកចល័តដែលជាជំនួយឥតសំណងរបស់សាធារណរដ្ឋប្រជាមានិតចិន ជូនក្រសួងសុខាភិបាល។
តាមខ្លឹមសារដើមទាំងស្រុងនៃសេចក្តីប្រកាសព័ត៌មានរបស់ក្រសួងសុខាភិបាល នាថ្ងៃព្រហស្បតិ៍ ទី១ ខែកុម្ភៈ ឆ្នាំ២០១៨ វេលាម៉ោង ១១ព្រឹក នៅទីស្តីការក្រសួងសុខាភិបាល លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអញ្ជើញចុះហត្ថលេខាលើកិច្ចព្រមព្រៀងអនុវត្តគម្រោងជំនួយគ្លីនិកចល័ត ជាមួយ លោក លី អាន ទីប្រឹក្សាសេដ្ឋកិច្ច និងពាណិជ្ជកម្មនៃស្ថានទូតសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា។ គម្រោងនេះ គឺជាជំនួយឥតសំណងរបស់សាធារណរដ្ឋប្រជាមានិតចិន ជូនក្រសួងសុខាភិបាល នៃព្រះរាជាណាចក្រកម្ពុជា។
បើតាមលោក លី អាន បានបញ្ជាក់ថា កិច្ចព្រមព្រៀងអនុវត្តគម្រោងខាងលើនេះ គឺជាសមិទ្ធផលថ្មីមួយទៀត ដែលមិត្តចិននឹងផ្តល់ជូននូវគ្លីនិកចល័តចំនួន៤០គ្រឿង ដែល២០គ្រឿងដំបូងនឹងមកដល់កម្ពុជានាដំណាច់ខែ មេសា ឆ្នាំ២០១៨ ខាងមុខ ហើយ២០គ្រឿងបន្ទាប់នឹងមកដល់នាដំណាច់ខែ តុលា ឆ្នាំ២០១៨។ គ្លីនិកចល័តនេះ គឺជាប្រភេទរថយន្តធំបំពាក់ដោយ សម្ភារៈ បរិក្ខាពេទ្យ និងសម្ភារៈ បរិក្ខាផ្សេងៗ ដែលអាចបំពេញភារកិច្ចជាមន្ទីរពេទ្យ ក្នុងនោះរួមមាន ផ្នែកជំងឺកុមារ ផ្នែកវះកាត់ទូទៅ ផ្នែកសម្ភព និងរោគស្ត្រី ផ្នែកត្រចៀក ច្រមុះ បំពង់ក ផ្នែកទន្តសាស្ត្រ ផ្នែករូបភាព និងផ្នែកពិសោធន៍។
លោករដ្ឋមន្ត្រីក្រសួងសុខាភិបាលបានថ្លែងអំណរគុណយ៉ាងជ្រាលជ្រៅចំពោះមិត្តចិន ដែលតែងតែផ្តល់ការគាំទ្រដល់វិស័យសុខាភិបាលកម្ពុជា ហើយនេះជាគម្រោងថ្មីមួយទៀតបន្ទាប់ពីគម្រោងសាងសង់មន្ទីរពេទ្យចំនួនពីរត្រូវបានចុះហត្ថលេខា គឺមន្ទីរពេទ្យមិត្តភាពកម្ពុជា-ចិន ព្រះកុសុមៈ និងមន្ទីរពេទ្យខេត្តត្បូងឃ្មុំ។ លោករដ្ឋមន្ត្រី ក៏បានគូសបញ្ជាក់បន្ថែមថា កិច្ចសហប្រតិបត្តិការនេះ ក៏ជាការឆ្លើយតបទៅនិងការប្តេជ្ញាចិត្តរបស់ថ្នាក់ដឹកនាំកំពូលនៃប្រទេសទាំងពីរ ស្តីពីការពង្រឹងកិច្ចសហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ និងគំនិតផ្តួចផ្តើមខ្សែក្រវ៉ាត់មួយផ្លូវមួយ។ លើសពីនេះ លោករដ្ឋមន្ត្រី បានមានប្រសាសន៍ថា គម្រោងនេះនឹងរួមចំណែកផ្តល់សេវាថែទាំសុខភាពជូនប្រជាពលរដ្ឋ កានតែរហ័ស និងកាន់តែមានប្រសិទ្ទភាព៕ ដោយ៖បញ្ញាស័ក្តិ
