ភ្នំពេញ ៖ “នៅពេលកម្ពុជាសម្របខ្លួនទៅនឹងបញ្ហាសេដ្ឋកិច្ច ដោយសារជំងឺ COVID-១៩ អូស្ត្រាលីនៅតែជាមិត្ត និងដៃគូជិតស្និទ្ធ” នេះជាការបញ្ជាក់របស់ឯកអគ្គរាជទូតអូស្ត្រាល លោកឯកអគ្គរាជទូត ប៉ាប្លូ កាំង(Pablo Kang) បានចូលជួបសំដែងការគួរសមជាមួយ ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ទេសរដ្ឋមន្ត្រី និងជារដ្ឋមន្ត្រី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
ជំនួបនេះវាជាឱកាសមួយដែលលោកឯកអគ្គរាជទូត ប៉ាប្លូ កាំង(Pablo Kang) ដើម្បីជំរាបជូន ឯកឧត្តមទេសរដ្ឋមន្ត្រី ពីកម្មវិធីវិនិយោគក្នុងវិស័យហេដ្ឋារចនាសម្ព័ន្ធ (3i) របស់អូស្ត្រាលី ដែលផ្តល់ថវិកាជំនួយ ដល់ប្រតិបត្តិករទឹកឯកជនកម្ពុជា ឱ្យមានសក្តានុពលផ្នែកពាណិជ្ជកម្ម ក្នុងការផ្គត់ផ្គង់ទឹកស្អាតដល់គ្រួសារកម្ពុជា។ កម្មវិធី 3i បានធ្វើការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ អស់រយៈពេល ៥ ឆ្នាំមកហើយ រួមមានការចេញអាជ្ញាប័ណ្ណ និងការបណ្តុះបណ្តាលដល់ប្រតិបត្តិករ។
យោងតាមស្ថានទូតអូស្ត្រាលីប្រចាំនៅកម្ពុជាបញ្ជាក់ថាក្នុងអំឡុងពេលនេះ កម្មវិធី បានចុះហត្ថលេខាលើកិច្ចព្រមព្រៀងចំនួន ៨១ ជាមួយប្រតិបត្តិករទឹកឯកជន – ដែលស្មើនឹងចំនួន ៥៧% នៃថវិកាគម្រោងសរុបទាំងអស់ និងកំពុងដំណើរការល្អទៅតាមផែនការ ក្នុងការផ្គត់ផ្គង់ទឹកស្អាត ដល់ប្រជាជនកម្ពុជាបានចំនួន ១លាននាក់ នៅឆ្នាំ ២០២១។ អូស្ត្រាលីគាំទ្រដល់គោលដៅ ឱ្យពិភពលោកមានលទ្ធភាពទទួលបានទឹកស្អាត រួមទាំងប្រជាជនកម្ពុជាទាំងអស់។
បើតាមក្រសួងឧស្សាហកម្មបានបញ្ជាក់ថា៖ ក្រុមហ៊ុន TCU Polys Enterprise Co., Ltd ត្រូវបានបង្កើតឡើងនៅកម្ពុជាក្នុងឆ្នាំ២០១៦ និងបានបម្រើសេវាផលិត និងផ្គត់ផ្គង់បំពង់ទឹកស្អាត និងទឹកលូមកដល់ពេលនេះមានរយៈពេលជិត ៥ ឆ្នាំហើយ ដែលមានដើមទុនវិនិយោគ សរុបប្រហែល ចំនួន ១០ លានដុល្លារសហរដ្ឋអាមេរិក។ ផលិតផលរបស់រោងចក្រមានបំពង់បង្ហូរទឹកលូមុខកាត់ពី ៣០០មិល្លិម៉ែត្រ – ២០០០មិល្លីម៉ែត្រ; បំពង់ទឹកស្អាត HDPE មុខកាត់ពី ២០មិល្លីម៉ែត្រ – ៨០០មិល្លីម៉ែត្រ; ប្រភេទបំពង់ PPR (Polypropylene-Random) មុខកាត់ពី ២០មិល្លីម៉ែត្រ – ២០០មិល្លីម៉ែត្រ ដែលប្រើសម្រាប់ទឹកត្រជាក់ ទឹកក្តៅ និងមានផលិតបំពង់សម្រាប់ដាក់ខ្សែភ្លើង បំពង់ UPVC និង PVC…។
ក្រុមហ៊ុនបានផ្គត់ផ្គង់ផលិតផលដែលមានគុណភាព ដោយប្រើវត្ថុធាតុដើមជាប្រភេទគ្រាប់ជ័រថ្មី នាំចូលពីប្រទេសថៃ (ប្រភពដើមពីប្រទេសអារ៉ាប់) ដែលមានបន្ទប់ពិសោធន៍ និងធ្វើតេស្តត្រួតពិនិត្យគុណភាពផលិតផលតាមបទដ្ឋានបច្ចេកទេស និងស្តង់ដារអន្តរជាតិ។ បច្ចុប្បន្នក្រុមហ៊ុនបានផលិតសម្ភារបំពង់គ្រប់ប្រភេទ ដើម្បីបម្រើសេចក្តីត្រូវការក្នុងស្រុក ជាពិសេសបំពង់ទឹកកខ្វក់កំពុងត្រូវបានប្រើប្រាស់សម្រាប់ប្រព័ន្ធលូនៅខេត្តព្រះសីហនុ។
នាឱកាសនោះដែរ ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី បានបញ្ជាក់បន្ថែមថា ផលិតផលបំពង់ទឹកទាំងនេះ គឺជាប្រភេទផលិតផលដែលរាជរដ្ឋាភិបាលលើកទឹកចិត្ត ដើម្បីចូលរួមអភិវឌ្ឍវិស័យទឹកស្អាតនៅកម្ពុជា។
បន្ទាប់ពីដំណើរត្រួតពិនិត្យជាក់ស្តែងរួច ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ក្នុងនាមរាជរដ្ឋាភិបាល និងក្រសួងសូមវាយតម្លៃ និងកោតសរសើរខ្ពស់ ព្រមទាំងចាត់ទុកគម្រោងវិនិយោគនេះ មានសារសំខាន់ណាស់ក្នុងការរួមចំណែកបំពេញតម្រូវការក្នុងវិស័យទឹកស្អាតនៅកម្ពុជា ។ ពីព្រោះឃើញថា៖ ក្រុមហ៊ុនបានអភិវឌ្ឍន៌ផលិតផលរបស់ខ្លួនឈរលើគុណភាពជាចំបង តាមរយៈការប្រើប្រាស់វត្ថុធាតុដើមសុទ្ធពិតប្រាកដ ដោយមានប្រព័ន្ធត្រួតពិនិត្យគុណភាព និងស្តង់ដារនៃប្រព័ន្ធគ្រប់គ្រងផលិតកម្មបានល្អប្រសើរតាមរយៈបទបង្ហាញរបស់ខ្លួន៕ ដោយ៖ ស័ក្តិ
