តាកែវ៖ ដោយអនុវត្តតាមអនុសាសន៍ដ៏ខ្ពង់ខ្ពស់របស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងអនុវត្តតាមការចង្អុលបង្ហាញ ណែនាំបញ្ជាផ្ទាល់ពី ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ។
នៅព្រឹកថ្ងៃព្រហស្បតិ៍ ១រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនិងថ្ងៃទី០១ ខែគុម្ភ ឆ្នាំ២០១៨ ឯកឧត្តម ឧត្តមសេនីយ៍ឯក ប៉ែន វិបុល អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិក បានដឹកនាំប្រតិភូ អមដំណើដោយ លោក ឧត្តមសេនីយ៍ទោ សុខ សំណាង ស្នងការ នៃស្នងការដ្ឋាននគរបាលខេត្តតាកែវ អញ្ជើញគោរពវិញ្ញាណខណ្ឌ សពលោក ធុល ខ្នា ជាមន្ត្រី G I S ការពារសត្វព្រៃ នៃអង្កការ W.C.S ជាអង្កការហសគមន៍អភិរក្សសត្វព្រៃ ដែលបានមរណៈភាពកាលពីថ្ងៃទី៣០ ខែមករា ឆ្នាំ២០១៨ នៅខេត្តមណ្ឌលគីរី។ ដោយខ្មាន់កាំភ្លើងបាញ់សម្លាប់នៅតំបន់អូរលែ ស្ថិតក្នងភូមិ ពូហ្យាម ឃំុសែនមនោរម្យ ស្រុកអូរាំង ខេត្តមណ្ឌលគីរី ក្នុងពេលបំពេញភារកិច្ច។
ក្នុងឱកាសនោះដែរ ឯកឧត្តម ប្រធាន គណៈប្រតិភូបាននាំយកថវិការបស់សម្តេចក្រឡាហោមចំនួន៣លានរៀល និងថវិការបស់ ឯកឧត្តម នាយឧត្តមសេនីយ៍សន្តិបណ្ឌិត អគ្គស្នងការនគរបាលជាតិ២លានរៀល ព្រមទាំងថវិកាស្នងការដ្ឋាននគរបាលខេត្តតាកែវ អធិការដ្ឋាននគរបាលស្រុកត្រាំកក់ ៧០ម៉ឺនរៀល ជូនដល់ក្រុមគ្រួសារសព គឺលោកស្រី អឹម ស្រីនាថ ត្រូវជាភរិយាសពលោក ធុល ខ្នា ស្ថិតនៅក្នងភូមិប៉ែនមាស ឃុំសំរោង ស្រុកត្រាំកក់ ខេត្តតាកែវ ។
ក្នុងការចូលរួមរំលែកមរណៈទុក្ខដ៏ក្រៀមក្រំនោះដែរ ឯកឧត្តម នាយឧត្តមសេនីយ៍ឯក ប៉ែន វិបុល អគ្គស្នងការរង បានពាំនាំនូវការសួរសុខទុក្ខ និងសារចូលរួមរំលែកមរណៈទុក្ខរបស់សម្តេចក្រឡាហោម ស ខេង ក៏ដូចជា អគ្គស្នងការនគរបាលជាតិ ចំពោះគ្រួសារសពលោកធុល ខ្នា មន្ត្រីបម្រើការងារនៅអង្គការសមាគមន៍អភិរក្សសត្វ ព្រោះការមរណៈភាពរបស់ លោក ធុល ខ្នា គឺជាការបាត់បង់នូវស្វាមី និងឪពុក ជាទីស្រឡាញ់ដ៏ជ្រាវជ្រៅ និងប្រកបដោយព្រហ្ម វិហារធម៌របស់ក្រុមគ្រួសារ។ ជាងនេះទៅទៀត ការមរណៈភាពរបស់លោក គឺជាការបាត់ បង់នូវកម្លាំងការពារ ថែរក្សាបរិស្ថានធម្មជាតិដ៏សំខាន់មួយរូប ដែលកន្លងមកក្នុង នាមជាមន្ត្រីក្រៅរាជរដ្ឋាភិបាលក៏ពិតមែន តែលោកបានយកចិត្តទុកដាក់យ៉ាងសកម្មចូលរួមចំណែកជាមួយរាជរដ្ឋាភិបាលកម្ពុជា ក្នុងការការពារបរិស្ថាន និងធនធានធម្មជាតិជូនជាតិ មាតុភូមិ។ ទោះជាយ៉ាងណាក៏ដោយ សមត្ថកិច្ចទាំងអស់ មិនព្រងើយកន្តើយចំពោះការស្លាប់របស់មន្ត្រីទាំងបីនាក់នេះទេ សមត្ថកិច្ចជំនាញនិងខិតខំស្រាវជ្រាវចាប់ជនល្មើសយកមកផ្តល់ន្ទាទោសទៅតាមច្បាប់ឲ្យខានតែបាន៕ តាកែវ