ព្រះសីហនុ៖ មួយរយៈចុងក្រោយនេះ គេសង្កេតឃើញថា តារាហ្វេសប៊ុកល្បីៗជាច្រើន និងជាបុគ្គលកំពុងជោគជ័យជាមួយមុខជំនួញផ្សេងៗ បាននិងកំពុងប្រជែងគ្នាបង្អួតពីភាពមានបានរបស់ខ្លួន តាមរយៈការបង្ហាញផ្ទះវីឡា ឡានទំនើបៗមានតម្លៃកប់ៗពពក និងក៏ដូចគ្រឿងអលង្ការមាសពេជ្រពាក់ជ្រែកៗខ្លួនផងដែរ។
បើទោះជាការបង្ហោះបង្អួតភាពមានបាន គឺជាសិទ្ធិរបស់គេយ៉ាងណា តែមនុស្សមួយចំនួនធំ ហាក់មិនសូវជាចូលចិត្តស៊ីជោរតាមប៉ុន្មាននោះទេ ដោយគេបានលើកឡើងដូចៗគ្នានេះថា «ខ្លាចគេមិនដឹងថា ខ្លួនឯងហ្នឹងមានក៏អី»។
ជុំវិញរឿងនេះផងដែរ ឯកឧត្តម ម៉ុង រិទ្ធី ដោយសារតែឃើញហួសចិត្តពេក និងស្របពេលដែលអ្នកខ្លះក៏ចោរកំពុងតាមឃ្លាំ ឯកឧត្តមក៏បានមានមតិលើកឡើង និងក៏ដូចជាជួយផ្តល់ជាគំនិតល្អៗ ងាកមកគិតធ្វើរឿងទាំងនេះ ជាប្រយោជន៍ច្រើនទៅដល់សង្គមល្អជាង ដោយមានខ្លឹមសារយ៉ាងដូច្នេះថា៖ «នៅក្នុងគ្រាដ៏សែនមហាវិនាសកម្ម ដោយសារតែជំងឺ ឆ្លងកូរ៉ូណា កូវីដ-១៩ ដ៏មហាប្រល័យ នៅលើ ភពផែនដី យើងនេះក្នុងនោះក៏មានព្រះរាជាណាចក្រកម្ពុជាយើងផងដែរ ដូច្នេះហើយខ្ញុំសូមអភ័យទោស មុននិងនិយាយ ក្រែងលោមានអារម្មណ៍មិនល្អ ដល់ប្រិយមិត្តនៅក្នុងបណ្តាញសង្គមfbនេះ។ ខ្ញុំសុំចិត្ត សុំថ្លើម អ្នកដែលចូលចិត្តឈ្លោះប្រកែកគ្នា និយាយរឿងមិនល្អ បង្ហោះបង្អួតទ្រព្យសម្បត្តិ ឡានវីឡា លុយកាក់ មាសពេជ្រ និងរឿងដែលមិន សមរម្យមួយចំនួនទៀត បង្ហោះតាមបណ្តាញសង្គម fb សូមមេត្តាឈប់បង្ហោះទៀតទៅ ព្រោះអីយើងត្រូវដឹងថា មិនមែនមើលឃើញតែនៅក្នុងប្រទេសយើងទេ គឺគេមើលឃើញទូទាំងពិភពលោក មានទ្រព្យសម្បត្តិច្រើនប៉ុណ្ណាក៏ដោយ រក្សាវាទុកទៅ ចង់ទិញអីក៏ស្រេចតែចិត្តចង់ទៅមិនចាំបាច់បង្អួតប្រាប់គេឯងទេ បើខ្លួនពិតជាស្រឡាញ់ដល់ប្រជាជនក្រីក្រមែន គួរណាតែយក ទ្រព្យសម្បត្តិ ដែលមាននេះយកទៅវិនិយោគ លើវិស័យកសិកម្ម កសិឧស្សាហកម្ម តាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា យើងដើម្បីបង្កើតការងារឲ្យដល់ប្រជាពលរដ្ឋក្រីក្រធ្វើ និងបានចូលរួមចំណែក មួយផ្នែកជាមួយរាជរដ្ឋាភិបាល ក្នុងការកាត់បន្ថយភាពក្រីក្ររបស់ប្រជាជនកម្ពុជាយើង ព្រមទាំងមិនបានរំខានដល់សន្តិសុខសុវត្ថិភាព សង្គមផងដែរ » ៕ ដោយ៖ លឹម ហុង