ប្រទេសថៃ ៖ ភ្លៀងធ្លាក់យ៉ាងគំហុក បានបង្កជាទឹកជំនន់ភ្លាមៗ កាលពីថ្ងៃទី៣ ខែសីហា ឆ្នាំ២០២០ នៅក្នុងខេត្តឈាងម៉ៃ និងឈាងរ៉ៃ ប្រទេសថៃ ដែលបណ្តាលឲ្យមនុស្ស ៣០០ នាក់ ត្រូវជាប់គាំងក្នុងទឹកជំនន់ ខណៈផ្ទះសម្បែងរបស់ពួកគេត្រូវលិចលង់។
តាមប្រភពព័ត៌មានបានឲ្យដឹងថា ទឹកជំនន់ដ៏សាហាវបានបិទផ្លូវធំៗ ហើយអ្នកស្រុកនៅក្នុងតំបន់នេះមិនអាចចាកចេញពីផ្លូវបានឡើយ និងក៏បានកាត់ផ្តាច់ពីតំបន់ផ្សេងទៀត។
លោកឧត្តមសេនីយ៍ទោ Suepsakun Buarawong មេបញ្ជាការរងកងពលតូចយោធាលេខ ៣៣ បានចុះទៅពិនិត្យទឹកជំនន់ភ្លាមៗ នៅក្នុងភូមិ Mae Wan ស្រុក Doi Saket ខេត្តឈៀងម៉ៃ បន្ទាប់ពីបានដឹងថាអ្នកស្រុកនៅតែជាប់នៅខាងក្នុង ខណៈទឹកនៅតែបន្តកើនឡើងនៅតាមផ្លូវ ស្របពេលភ្លៀងធ្លាក់ជាបន្តបន្ទាប់ ដែលជះឥទ្ធិពលដល់ការជួសជុលចាំបាច់។
ដោយឡែក បើយើងក្រឡេកមើលជ្រុងមួយ នៃជំនន់ទឹកភ្លៀងដ៏សាហាវនេះ នៅថ្ងៃទី៤ ខែសីហា ឆ្នាំ២០២០ សេចក្តីរាយការណ៍ព័ត៌មានមួយបានបង្ហាញថា ក្រុមអ្នកស្ម័គ្រជួយសង្គ្រោះកូនៗសិស្សចាកចេញពីសាលារៀននៅក្នុងស្រុក Wang Nuea ខេត្ត Lampang ខណៈតំបន់ជុំវិញសាលារៀនរបស់ពួកគេត្រូវទឹកជំនន់លិចស្ទើរលេចក្បាលមនុស្សចាស់ទៅហើយ៕ ដោយ៖ លឹម ហុង