ថ្មីៗនេះ ប្រធានាធិបតីហ្វីលីពីន លោក Rodrigo Duterte បានធ្វើឲ្យអ្នកប្រើប្រាស់អ៊ិនធើរណិត ផ្ទុះការភ្ញាក់ផ្អើល និងហួសចិត្តយ៉ាងខ្លាំង គ្រាដែលបានលឺគាត់បានប្រាប់ប្រជាជនហ្វីលីពីនឲ្យប្រើប្រាស់ប្រេងឥន្ធនៈ ជាថ្នាំសម្លាប់មេរោគ សម្រាប់ម៉ាស់មុខ។
ជាការពិតណាស់ មេដឹកនាំនិយាយឥតសំចៃមាត់រូបនេះ បានធ្វើការកត់សម្គាល់ស្រដៀងគ្នានេះ កាលពីសប្តាហ៍មុន ដែលអ្នកនាំពាក្យរបស់គាត់ បាននិយាយថាគឺជាការលេងសើចប៉ុណ្ណោះ ដោយរម្លឹកដល់សាធារណជនបានជ្រាបថា លោក Duterte ច្រើនតែនិយាយអ្វីដែលចម្លែក។ ប៉ុន្តែ នៅក្នុងសន្ទរកថាតាមទូរទស្សន៍កាលពីម្សិលមិញ លោក Duterte បានប្រកាសយ៉ាងដូច្នេះថា៖ «អ្វីដែលខ្ញុំបាននិយាយ គឺជាការពិត។ គ្រាន់តែទៅស្ថានីយ៍ប្រេងឥន្ធនៈ ហើយបន្ទាប់មក បន្តក់ប្រេងមួយចំនួនដែលជាថ្នាំសម្លាប់មេរោគ។ ខ្ញុំមិននិយាយលេងទេ នោះជាការពិត។ អ្នកគិតថា ខ្ញុំគ្រាន់តែនិយាយលេងមែនទេ!» ។
ទោះយ៉ាងណា ប្រធានសមាគវេជ្ជសាស្ត្រហ្វីលីពីន បានប្រាប់ Asia One ថា៖ «គ្រប់គ្នាមិនអាចប្រើសាំង ដើម្បីធ្វើជាថ្នាំសម្លាប់មេរោគបានទេ ។ ការស្រូបដង្ហើមចូលវា គឺអាចបណ្តាលឲ្យមានគ្រោះថ្នាក់ ហើយក៏នាំឲ្យមានបញ្ហាជាច្រើនដូចជា ជំងឺផ្លូវដង្ហើមជាដើម»។ ចំណែកអ្នកជំនាញសុខភាពក៏បានណែនាំឲ្យប្រើសាប៊ូ និងទឹកសម្រាប់លាងសម្អាតម៉ាស់មុខ ដែលអាចប្រើឡើងវិញបាន និងទឹកអាល់កុល ៧០% សម្រាប់សម្លាប់មេរោគដ៏ត្រឹមត្រូវ។
ជាការឆ្លើយតបនឹងដំបូន្មានលើកដំបូងហាក់ខុសរបៀបនេះ របស់លោក Duterte ស្រាប់តែក្រុមអ្នកជំទាស់បានសម្តែងនូវការហួសចិត្តជាខ្លាំង ដោយបានហៅយោបល់របស់គាត់ថាជាដំបូន្មានដ៏គ្រោះថ្នាក់។ នេះបើយោងតាមសមាជិកព្រឹទ្ធសភា Risa Hontiveros បានសរសេរនៅលើ Twetter៕ ដោយ៖ លឹម ហុង