កាលពីយប់ថ្ងៃទី៣ ខែសីហា មានករណីអំពើបាញ់ប្រហារដ៏សាហាវមួយ នៅក្នុងកាស៊ីណូមួយកន្លែង នៅក្នុងទីក្រុងបាងកក ប្រទេសថៃ ។ ករណីនេះបណ្តាលឲ្យមនុស្ស ៤ នាក់ ស្លាប់ (ស្រី២ ប្រុស២) ហើយក្នុងនោះ ត្រូវបានដឹងមានប៉ូលីសម្នាក់ស្លាប់ និងស្ត្រីខ្មែរម្នាក់ឈ្មោះ ម៉ៅ ស្រីពៅ ជាអ្នកចែកបៀរ (ស្លាប់អង្គុយនៅលើកៅអី)។
ទោះយ៉ាងណា រហូតមកទល់ពេលនេះ គេនៅមិនទាន់រកឃើញថាជនល្មើសជាអ្នកណាឡើយទេ ខណៈគេជឿថាបានរត់គេចខ្លួនបាត់ទៅហើយ។ រីឯចំពោះហេតុផលនៃបទឧក្រិដ្ឋនេះ គេក៏បានគេសន្និដ្ឋានថា អាចបណ្តាលមកពីរឿងបំណុល ឬបញ្ហាផ្ទាល់ខ្លួនណាមួយ ខណៈដែលបុរសជនជាតិចិនម្នាក់ ប្រដាប់ដោយកាំភ្លើង ត្រូវបានរបាយការណ៍ជាច្រើនបានលើកឡើងថា បានជាប់ពាក់ព័ន្ធក្នុងអំពើបាញ់ប្រហារនេះ។
ដោយឡែក ងាកមកចាប់អារម្មណ៍រឿងដ៏គួរឲ្យកត់សម្គាល់មួយនេះវិញ ត្រូវបានផេកមួយមានឈ្មោះ Red Skull Forever បានចោទឡើងថា មានភាពមិនប្រក្រតីសម្រាប់កាមេរ៉ាសុវត្ថិភាព ដែលត្រូវបានឃើញបំពាក់ស្អេកស្អះ នៅក្នុងកាស៊ីណូរ៉ាម៉ា៣។
ផេកខាងលើនេះបាននិយាយថា «ប្រធាននាយកដ្ឋាននិយាយថា បន្ទាប់ពីឆែកកាស៊ីណូរ៉ាម៉ា៣ ពុំរកឃើញមានកាមេរ៉ាសុវត្ថិភាពណាមួយនោះ… កាស៊ីណូគ្មានកាមេរ៉ា តែចុះហេតុអ្វីបានជាយកជណ្តើរ និងដែកស្វាន ឡើងធ្វើបែបនេះ…? ដោយសឹងតែមិនខ្វល់មនុស្សដែលបានស្លាប់នៅក្នុងកាស៊ីណូ។ កាមេរ៉ាទាំងអស់ត្រូវបានគេសម្អាត ព្រោះប្រសិនបើមានកាមេរ៉ា នោះអ្វីៗនឹងធ្លាក់ចូលក្នុងដៃប៉ូលិស។
ជាមួយគ្នានេះផងដែរ អ្នកខមិនក៏បានលើកឡើងថា រូបភាពឡើងច្បាស់ប៉ុណ្ណឹងហើយ នៅថាអត់ទៀត។ នរណាក៏បានដឹងដែរថា នៅក្នុងកាស៊ីណូនេះមានបំពាក់កាមេរ៉ារួចស្រេចទៅហើយ គឺគ្រប់ជ្រុងទាំងអស់៕ ដោយ៖ លឹម ហុង
