ភ្នំពេញ៖ ឥឡូវនេះ ក្រុមហ៊ុនសរុបចំនួន ៦៥១ បានស្នើសុំចុះបញ្ជីអាជីវកម្ម តាមប្រព័ន្ធបច្ចេកវិទ្យាព័ត៌មានរបស់រាជរដ្ឋាភិបាលកម្ពុជា ក្នុងនោះក្រុមហ៊ុនដែលបានចុះបញ្ជីដោយជោគជ័យនៅក្រសួងពាណិជ្ជកម្ម, អគ្គនាយកដ្ឋានពន្ធដារ និងក្រសួងការងារ និងបណ្តុះបណ្តាលវិជ្ជាជីវៈ មានចំនួន ៣៦៩ និងក្រុមហ៊ុនដែលកំពុងត្រូវបានត្រួតពិនិត្យមានចំនួន ២៨២ បើគិតត្រឹមថ្ងៃទី៤ ខែសីហា ឆ្នាំ២០២០នេះ។
មន្ត្រីក្រសួងសេដ្ឋកិច្ច និងហិរញ្ញវត្ថុ បានឱ្យដឹងនៅថ្ងៃទី៥ ខែសីហានេះថា ការចុះបញ្ជីអាជីវកម្មតាមប្រព័ន្ធបច្ចេកវិទ្យាព័ត៌មានថ្មីនេះ មានសំណើរបម្រុងទុកនាមករណ៍ចំនួន ១២៦៨ សំណើ ក្នុងនោះ១០៧៧ សំណើរទទួលបានការឯកភាព, ១៩០សំណើរកំពុងត្រូវបានត្រួតពិនិត្យ និង១សំណើត្រូវបានបដិសេធ។
ឯកឧត្តម គង់ ម៉ារី អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា យោងស្ថិតិខាងលើនេះ បញ្ជាក់ឲ្យឃើញពីលទ្ធផល និងកិច្ចខិតខំប្រឹងប្រែងយ៉ាងមុតមាំរបស់រាជរដ្ឋាភិបាលកម្ពុជា ក្នុងការលើកកម្ពស់ភាពប្រកួតប្រជែងរបស់កម្ពុជា និងបង្កើតបរិយាកាសទាក់ទាញសម្រាប់អ្នកវិនិយោគ និងធុរជន នៅពេលដែលប្រទេសកម្ពុជា ក៏ដូចជាពិភពលោកទាំងមូលកំពុងជួបវិបត្តិសេដ្ឋកិច្ច ដែលបណ្តាលមកពីជម្ងឺកូវីដ១៩។
ប្រព័ន្ធផ្លាស់ប្តូរទិន្នន័យកម្ពុជា(CamDX) ដែលធ្វើប្រតិបត្តិការផ្លាស់ប្តូរទិន្នន័យរវាងក្រសួង-ស្ថាប័នពាក់ព័ន្ធដែលរួមមានក្រសួងពាណិជ្ជកម្ម, អគ្គនាយកដ្ឋានពន្ធដារ, ក្រសួងការងារ និងបណ្តុះបណ្តាលវិជ្ជាជីវៈ និងក្រសួងមហាផ្ទៃ, បាននិងកំពុងប្រព្រឹត្តិទៅដោយរលូន។ ប៉ុន្តែប្រាកដណាស់ថា កិច្ចការងារប្រកបដោយមោទនៈនេះ នឹងមិនអាចសម្រេចទៅបានឡើយ ប្រសិនបើមិនមានការចូលរួមសហការយ៉ាង សកម្មបំផុតពីក្រសួង-ស្ថាប័នពាក់ព័ន្ធទាំងអស់ ជាមួយនឹងឆន្ទះនយោបាយខ្ពស់ របស់ថ្នាក់ដឹកនាំក្នុងការកែទម្រង់ដ៏សំខាន់នេះ។
អ្នកចុះបញ្ជី និងធុរជនបានសាទរ និងផ្តល់ការគាំទ្រលើការដាក់ឲ្យដំណើរការនូវប្រព័ន្ធចុះបញ្ជីថ្មីនេះ ដោយហេតុថាប្រព័ន្ធចុះបញ្ជីថ្មីនេះ មាននីតិវិធីងាយស្រួលជាងមុន (ការចុះបញ្ជីបានដល់ទៅ ៣ក្រសួង-ស្ថាប័នក្នុងពេលតែមួយតាមអនឡាញ), ពេលវេលាទទួលបានការសម្រេចពីក្រសួង-ស្ថាប័នខ្លីជាងមុនច្រើន (ត្រឹម៨ថ្ងៃនៃថ្ងៃធ្វើការ) និងតម្លៃសេវាទាបជាងមុនប្រមាណ ៤០ភាគរយ។
គួរបញ្ជាក់ថា ការកែទម្រង់ថ្មីនេះ បានបង្ហាញឲ្យឃើញថា ការប្រើប្រាស់បច្ចេកវិទ្យាព័ត៌មាន (IT) ដើម្បីផ្តល់សេវាសាធារណៈ ពិតជាមានប្រសិទ្ធភាព និងអាចជួយដោះស្រាយបញ្ហាប្រឈមផ្សេងៗ មានជាអាទិ៍ តម្លាភាព និងការកាត់បន្ថយពេលវេលាក្នុងការចុះបញ្ជីអាជីវកម្ម៕
ដោយ៖CEN
