ខេត្តកណ្ដាល ៖ នគរបាលប៉ុស្ដិ៍លើកដែក បានឲ្យដឹងថា បុរសជាបងប្រុសបង្កើតម្នាក់ បានយកស្នរមុខពីរ ចាក់ទៅលើប្អូនប្រុស បណ្ដាលឲ្យរងរបួសធ្ងន់ ត្រូវសមត្ថកិច្ចប៉ុស្ដិ៍នគរបាលរដ្ឋបាលើកដែក នៃអធិការដ្ឋាននគរបាលស្រុកកោះធំ ចាប់ខ្លួន នៅថ្ងៃពុធ ថ្ងៃទី៣១ ខែមករា ឆ្នាំ២០១៨ វេលាម៉ោង២២.៣០នាទី នៅចំនុចភូមិឃ្លាំងលិច ឃុំលើកដែក ស្រុកកោះធំ ខេត្តកណ្ដាល ។
បើតាមជនរងគ្រោះជាប្អូនប្រុសបង្កើតបានឲ្យដឹងថា បងប្រុសបង្កើតមានឈ្មោះ អ៊ុយ រ៉េន អាយុ៥០ឆ្នាំ ជនជាតិខ្មែរ មុខរបមិនពិតប្រាកដ មានទីលំនៅភូមិឃ្លាំងលិច ឃុំលើកដែក ស្រុកកោះធំ ខេត្តកណ្ដាល ជាមនុស្សញៀនស្រា ផឹកស្រាស្រវឹងរាល់ថ្ងៃ បានមកលេងផ្ទះរបស់ខ្លួនប្រមាណ១០ថ្ងៃមកហើយ និងបាននិយាយស្រែកឡូឡា រំខានបងប្អូន ដល់អ្នកជិតខាងពុំបានដេកពួនឡើយ នៅរាល់ពេលផឹកស្រវឹង ។ ដោយទ្រាំពុំបាន ខ្លួនជាប្អូនបាននិយាយណែនាំឲ្យឈប់ផឹក និងកុំស្រែកឡូឡារំខានគេឯងទៀត បើពុំដូច្នោះទេ ខ្លួននឹងមិនឲ្យស្នាក់នៅលេងផ្ទះបន្តទៀតឡើយ និងដេញឲ្យត្រឡប់ទៅផ្ទះវិញ ។ ស្រាប់តែបងប្រុសខឹង រួចស្ទុះទៅយកស្នរមុខពីរ ដែលសៀតជាប់ជញ្ជាំងផ្ទះរបស់ខ្លួន ចាក់មកលើខ្លួនជាប្អូន ត្រូវចំផ្ទៃមុខខាងឆ្វេងបណ្ដាលឲ្យជាប់ផ្លែស្នរនៅលើមុខ ហើយបងរបស់ខ្លួន បានដើរចុះដើរឡើងស្រែកឡូឡាពេញភូមិ ។
ក្រោយទទួលព័ត៌មាននេះ សមត្ថកិច្ចនគរបាលប៉ុស្ដិ៍រដ្ឋបាលលើកដែក បានចុះធ្វើអន្តរាគមន៍ ចាប់ខ្លួនជនសង្ស័យ បញ្ជូនមកកាន់អធិការដ្ឋាននគរបាលស្រុក ដើម្បីចាត់ការតាមនីតិវិធី ។ ចំណែកជនរងគ្រោះ ឈ្មោះ អ៊ុយ សំណាន ភេទប្រុស អាយុ៤១ឆ្នាំ ជនជាតិខ្មែរ មុខរបរនេសាទ មានទីលំនៅភូមិឃ្លាំងលិច ឃុំលើកដែក ស្រុកកោះធំ ខេត្តកណ្ដាល រងរបួសធ្ងន់ ត្រូវបានក្រុមគ្រួសារ យកមកសង្គ្រោះបន្ទាន់ នៅឯមន្ទីពេទ្យបង្អែកស្រុកកោះធំ ទាំងមានផ្លែស្នរជាប់នឹងផ្ទៃមុខ និងបញ្ជូនបន្តទៅព្យាបាលនៅមន្ទីរពេទ្យរាជធានីភ្នំពេញ ៕ ដោយ៖បញ្ញាស័ក្តិ
