ទីក្រុងឈៀងម៉ៃ ប្រទេសថៃ៖ ថ្ងៃទី ១ ខែ កុម្ភៈ ឆ្នាំ ២០១៨ រដ្ឋមន្ត្រីក្រសួងបរិស្ថាន មកពីប្រទេសទាំង ៦ នៃមហាអនុតំបន់ទន្លេមេគង្គ (GMS) បានអនុម័តលើរបៀបវារៈបរិស្ថាន រយៈពេល ៥ ឆ្នាំ ក្នុងទំហំទឹកប្រាក់ជាង ៥៤០ លានដុល្លារ សម្រាប់គម្រោងអាទិភាពមួយចំនួន ដើម្បីជម្រុញឱ្យមានការវិនិយោគបៃតង និងបង្កើនកិច្ចសហ-ប្រតិបត្តិការក្នុងវិស័យបរិស្ថាន ដែលជួយឱ្យតំបន់នេះសម្រេចនូវកំណើនប្រកបដោយចីរភាព។
រដ្ឋមន្ត្រី បានអនុម័តលើក្របខ័ណ្ឌយុទ្ធសាស្ត្រ និងផែនការសកម្មភាពនៃ កម្មវិធីបរិស្ថានស្នូល (CEP) ២០១៨-២០២២ ក្នុងកំឡុងកិច្ចប្រជុំរដ្ឋមន្ត្រីក្រសួងបរិស្ថាន នៃមហាអនុតំបន់ទន្លេមេគង្គលើកទី ៥ ដែលរៀបចំធ្វើឡើង ពីថ្ងៃទី ៣០ ខែ មករា ដល់ថ្ងៃទី ១ ខែ កុម្ភៈ នៅទីក្រុងឈៀងម៉ៃ។ កម្មវិធី ដែលត្រូវបានប្រកាសចាប់ផ្តើមអនុវត្តក្នុងឆ្នាំ ២០០៦ និងគ្រប់គ្រងដោយធនាគារអភិវឌ្ឍន៍អាស៊ីនេះ កំពុងចាប់ផ្តើមដំណាក់កាលទី ៣ របស់ខ្លួន។ កម្មវិធីនេះបានជួយរំដោះប្រជាពលរដ្ឋជាង ៣០.០០០ នាក់ពីភាពក្រីក្រ នៅតំបន់ជនបទ ក្នុងមហាអនុតំបន់។
ឧត្តមសេនីយ៍ Surasak Karnjanarat រដ្ឋមន្ត្រីក្រសួងបរិស្ថាន និងធនធានធម្មជាតិរបស់ប្រទេសថៃ មានប្រសាសន៍ថា “កម្មវិធី CEP នេះ មានតួនាទីយ៉ាងសំខាន់ ក្នុងការកសាងការជឿទុកចិត្ត និងការយោគយល់គ្នា រវាងបណ្តាប្រទេសនៃមហាអនុតំបន់ទន្លេមេគង្គ ក្នុងការអនុវត្តកិច្ចខិតខំប្រឹងប្រែងក្នុងវិស័យបរិស្ថាន ហើយយើងនឹងធ្វើការងាររួមគ្នាបន្ថែមទៀត ដើម្បីពង្រឹងកិច្ចសហប្រតិបត្តិការរបស់អនុតំបន់នេះ ក្នុងការឆ្លើយតបចំពោះបញ្ហាប្រឈមនានា ដែលកើតមានក្នុងវិស័យបរិស្ថាន។ កិច្ចប្រជុំនេះ ផ្តល់ឱ្យយើងនូវកាលានុវត្តភាព ដើម្បីបូកសរុបវឌ្ឍនភាព និងសមិទ្ធិផលដែលសម្រេចបានកន្លងមក ព្រមទាំងចែករំលែកចំណេះដឹង និងធ្វើការពិភាក្សាអំពីនិន្នាការ ទិសដៅ និងបញ្ហាថ្មីៗ ដែលកំពុងកើតឡើងក្នុងវិស័យបរិស្ថាន។”
ក្រៅពីការវិនិយោគក្នុងទឹកប្រាក់ ៥៤០ លានដុល្លារ ដែលផ្តោតលើការគ្រប់គ្រងការប្រើប្រាស់ដីធ្លី ការគ្រប់គ្រងសំណល់ ការត្រួតពិនិត្យការបំពុលបរិស្ថាន និងការកសាងហេដ្ឋារចនាសម្ព័ន្ធជនបទ ដែលធន់ទៅនឹងអាកាសធាតុ យុទ្ធសាស្ត្ររយៈពេល ៥ ឆ្នាំនេះក៏នឹងត្រួសត្រាយផ្លូវបង្កើតនូវកម្មវិធីរៀបចំគម្រោងថ្មីមួយ ដើម្បីជួយប្រទេសក្នុងមហាអនុតំបន់ទន្លេមេគង្គស្វែងរកធនធានថវិកា ដើម្បីបំពេញកង្វះថវិកាសម្រាប់ការវិនិយោគលើការអភិវឌ្ឍបៃតង ជាពិសេស តាមរយៈការរៀបចំគម្រោង និងការផ្តល់ហិរញ្ញប្បទានដល់គម្រោង។ វេទិកាបច្ចេកវិទ្យាបៃតងក៏នឹងត្រូវបង្កើតឡើងផងដែរ ដើម្បីបំពេញតួនាទី ទីផ្សារសម្រាប់ភ្ជាប់ទំនាក់ទំនង អ្នកផ្តល់សេវាបច្ចេកវិទ្យាជាមួយនឹងអ្នកប្រើប្រាស់បច្ចេកវិទ្យា ដែលផ្តោតលើបច្ចេកវិទ្យាគ្រប់គ្រងសំណល់ ថាមពលក៏កើតឡើងវិញ ប្រសិទ្ធភាពថាមពល ភាពធន់ទៅនឹងអាកាសធាតុ និងការគ្រប់គ្រងហានិភ័យគ្រោះមហន្តរាយ។ល។
កម្មវិធី CEP បានរៃអង្គាសទឹកប្រាក់ប្រមាណជាង ១០០ លានដុល្លារ ផ្តល់ហិរញ្ញប្បទានបន្ថែម ដែលក្នុងនោះ ៩៨ លានដុល្លារ សម្រាប់ការអភិរក្សជីវចម្រុះ បានបង្កើតនូវច្រករបៀងជីវចម្រុះលើផ្ទៃដីទំហំ ២,៦ លានហិចតា ក្នុងតំបន់ទេសភាពឆ្លងដែនចំនួន ៧ និងបានបណ្តុះបណ្តាលដល់អ្នកពាក់ព័ន្ធជាង ១៩.០០០ នាក់ ក្នុងវគ្គបណ្តុះបណ្តាល និងបង្កើនចំណេះដឹងជាង ៥០០ លើក។
លោក Ramesh Subramaniam អគ្គនាយក នៃនាយកដ្ឋានអាស៊ីអាគ្នេហ៍របស់ធនាគារអភិវឌ្ឍន៍អាស៊ី មានប្រសាសន៍ថា “ចាប់តាំងពីឆ្នាំ២០០៦ មក កម្មវិធី CEP បានពង្រឹងខ្លួនជាគំនិតផ្តួចផ្តើមផ្នែកបរិស្ថានដ៏សំខាន់ជាងគេមួយ នៅក្នុងមហាអនុតំបន់ទន្លេមេគង្គនេះ។ យើងនឹងបន្តអនុវត្តសកម្មភាពសំខាន់ៗ ដែលត្រូវបានដាក់ចេញក្នុងកិច្ចប្រជុំនេះ ដើម្បីជួយសម្រេចឱ្យបាននូវការអភិវឌ្ឍប្រកបបរិយាប័ន្ន និងចីរភាព នៅក្នុងមហាអនុតំបន់ទន្លេ
មេគង្គ។”
នៅក្នុងព្រឹត្តិការណ៍នេះ ក៏មានការរៀបចំវេទិការយៈពេល ២ ថ្ងៃ ស្តីពីកំណើនបៃតង ក្រោមប្រធានបទ កំណើនបៃតងប្រកបដោយបរិយាប័ន្ន៖ ការវិនិយោគដើម្បីអនាគតប្រកបដោយចីរភាព ផ្តោតលើកិច្ចពិគ្រោះយោបល់កម្រិតគោលនយោបាយ និងព្រឹត្តិការណ៍ស្តីពីបច្ចេកវិទ្យាបៃតង ថាមពលបៃតង ហេដ្ឋារចនាសម្ព័ន្ធប្រកបដោយចីរភាព ភាពធន់ទ្រាំទៅនឹងអាកាសធាតុ និងការវិនិយោគលើធនធានធម្មជាតិ។
កិច្ចប្រជុំលើកទី៥ ថ្នាក់រដ្ឋមន្ត្រីបរិស្ថាន មហាអនុតំបន់មេគង្គ ដែលធ្វើឡើងឈៀងម៉ៃ-ប្រទេសថៃ ថ្ងៃទី ១ ខែកុម្ភៈ ឆ្នាំ២០១៨ លោកសាយ សំអាល់ រដ្ឋមន្ត្រីក្រសួងបរិស្ថាននៃព្រះរាជាណាចក្រកម្ពុជា បានដឹកនាំគណៈប្រតិភូអន្តរក្រសួងនៃព្រះរាជាណាចក្រកម្ពុជា ចូលរួមក្នុងកិច្ចប្រជុំលើកទី៥ ថ្នាក់រដ្ឋមន្ត្រីបរិស្ថាន មហាអនុតំបន់មេគង្គ នៅទីក្រុងឈៀងម៉ៃនៃព្រះរាជាណាចក្រថៃ ដែលមានថ្នាក់ដឹកនាំនិងមន្ត្រីនៃប្រទេសមហាអនុតំបន់មេគង្គនិងដៃគូអភិវឌ្ឍន៍ ប្រមាណ ២៥០នាក់ រៀបចំរួមគ្នារវាងក្រសួងធនធានធម្មជាតិ និងបរិស្ថាននៃព្រះរាជាណាចក្រថៃ និងមជ្ឈមឈ្ឌលប្រតិបត្តិការបរិស្ថាននៃកម្មវិធីបរិស្ថានស្នូលរបស់ធនាគារអភិវឌ្ឍន៍អាស៊ី។
ជាលទ្ធផល កិច្ចប្រជុំនេះបានអនុម័តលើសេចក្តីថ្លែងការណ៍រួមរបស់រដ្ឋមន្ត្រីបរិស្ថាននៃប្រទេសមហាអនុតំបន់មេគង ទៅការងារដែលប្រទេសទាំងអស់នៃមហាអនុតំបន់សម្រេចបានតាមរយៈការអនុវត្តកម្មវិធីបរិស្ថានស្នូល និងក្របខណ្ឌយុទ្ធសាស្ត្រ និងផែនការសកម្មភាព ឆ្នាំ២០១៨-២០២២ដែលមានគម្រោង ៦សំខាន់ៗ សម្រាប់អនុវត្តន៍នៅដំណាក់កាលទី ៣នៃកម្មវិធីបរិស្ថានស្នូល។ អង្គប្រជុំបានសង្កត់ធ្ងន់ទៅលើកិច្ចសហប្រតិបត្តិការល្អរវាងប្រទេសមហាអនុតំបន់មេគង្គ និងភាគឹពាក់ព័ន្ធ លើ ១) ការអភិវឌ្ឍសេដ្ឋកិច្ចបៃតង ២) ការគ្រប់គ្រង និងធនធានធម្មជាតិ និង ៣) ការពង្រឹងសមត្ថភាពបន្សាំនឹងការប្រែប្រួលអាកាសធាតុ។
ប្រទេសដែលជាសមាជិកមហាអនុតំបន់ទន្លេមេគង្គរួមមាន កម្ពុជា សាធារណរដ្ឋប្រជាមានិតចិន (ជាពិសេស ខេត្តយូណាន និងតំបន់ស្វ័យយ័តគ័ងស៊ីជ័ង) សាធារណរដ្ឋប្រជាមានិតប្រជាធិបតេយ្យឡាវ មីយ៉ាន់ម៉ា ថៃ និងវៀតណាម៕ ដោយ៖បញ្ញាស័ក្តិ