ភ្នំពេញ៖ កាលពីប៉ុន្មានថ្ងៃមុននេះ ឯកឧត្តមបណ្ឌិត ឧកញ៉ា ម៉ុង ឫទ្ធី បានបង្ហោះសារដ៏ចាក់ដោតមួយ ដើម្បីផ្ញើ និងក៏ដូចចង់ដាស់តឿនដល់អ្នកចូលចិត្តបង្ហោះអួតទ្រព្យសម្បត្តិ មេត្តាឈប់ធ្វើសកម្មភាពខ្លាចគេមិនដឹងខ្លួនមែនបែបនេះទៀត ដោយគួរណាស់យកទ្រព្យសម្បត្តិទៅវិនិយោគលើវិស័យកសិកម្មកសិឧស្សាហកម្មដើម្បីបង្កើតឱកាសការងារបានដល់ប្រជាពលរដ្ឋក្រីក្រមានការងារធ្វើ និងក៏ដូចចូលរួមចំណែកមួយផ្នែកជាមួយរាជរដ្ឋាភិបាលក្នុងការកាត់បន្ថយភាពក្រីក្ររបស់ប្រជាជនកម្ពុជាយើង និងព្រមទាំងមិនបានរំខានដល់សន្តិសុខសុវត្ថិភាពសង្គមផងដែរ។
ដោយឡែក ជាថ្មីម្តងទៀត ឯកឧត្តមបណ្ឌិត ឧកញ៉ា ម៉ុង ឫទ្ធី បានបង្ហោះស្រដៀងគ្នានេះ តាមរយៈទំព័រហ្វេសប៊ុកផ្លូវការរបស់លោកឧកញ៉ា ដោយបានសរសេររៀបរាប់បង្កប់ន័យប្រៀបធៀបយ៉ាងចាក់ដោត ដែលមានខ្លឹមសារយ៉ាងជ្រាលជ្រៅថា៖ «នៅរដូវរំហើយឆ្នាំ២០១៩ដោយមានការព្រួយបារម្ភខ្លាចមានគ្រោះរាំងស្ងួត មិនប្រក្រតីណាមួយអាចនិងកើតឡើងជាយថាហេតុ ខ្ញុំបានផ្តួចផ្តើមគំនិតវាស់វែងកំណត់យកផ្ទៃដីប្រមាណជាជាង៥០ហិកតា ដែលមានទីតាំងស្ថិតនៅចុងខាងលិចភ្នំបូកគោភូមិអន្លង់ក្រពើ ឃុំតានៃ ស្រុកព្រៃនប់ ខេត្តព្រះសីហនុ យកមកសាងសង់ទំនប់ទឹកចំនួន២កន្លែង គឺទំនប់ទឹកម៉ុង ឫទ្ធីទី១ប្រវែង 428m កម្ពស់ 12m ខ្នងលើជាមធ្យម 12m ប្រើប្រាស់អាចម៍ដីអស់ចំនួន 122.000m3 អាចស្តុបទឹកបានជាមធ្យម 250.000ម៉ែត្រគូប ចំណាយថវិការអស់ចំនួន 350.000.00USD ។
ទំនប់ទឹកម៉ុង ឫទ្ធីទី២ប្រវែង 1.736m កម្ពស់11m ខ្នងលើជាមធ្យម 6m ទៅ 10m ដែលអាចស្តុបទឹកបានជាមធ្យម 1.250.000 ម៉ែត្រគូប ចំណាយថវិកាអស់ចំនួន 850.000.00USD បញ្ចប់ការងារសាងសង់ថ្ងៃទី១១ ខែកក្កដា ឆ្នាំ២០២០ ។
ទំនប់ទឹកទាំងពីរនេះអាចស្តុបទឹកបានប្រមាណជា 1.500.000m3 ការចំណាយថវិកាអស់ចំនួន USD1.172.020,00 បើប្រៀបធៀបទៅនិងរថយន្តរ៉ូសរ៉យ RR សារីថ្មីទំនើបឥឡូវមានគេប្រាប់ខ្ញុំថាតម្លៃរហូតទៅដល់ 1.500.000.00ដុល្លារឯណោះ ចំពោះគំនិតរបស់ខ្ញុំគិតថាយកលុយមកសាងសង់ទំនប់ទឹកមានផលប្រយោជន៍ជាង មិនតែប៉ុណ្ណោះវាជាកេរមរតកដ៏មានតម្លៃបំផុត សម្រាប់ចម្រើសេចក្តីត្រូវការទឹករបស់ប្រជាជននាពេលបច្ចុប្បន្ន ក៏ដូចជាតំណតទៅអនាគតកូនចៅជាច្រើនជំនាន់តទៅ»៕ ដោយ៖ លឹម ហុង